មូលហេតុទាំង៥ចំណុចនេះ ធ្វើឲ្យអ្នកជួបបញ្ហាដដែលៗរាប់មិនអស់ក្នុងជីវិត
អ្នកណាក៏មិនចង់ជួបរឿងអាក្រក់នោះទេ ពោលគឺសុទ្ធតែចង់បាន ឬ ជួបអ្វីដែលល្អៗសម្រាប់ជីវិត។ ប៉ុន្តែក្នុងជីវិតជាក់ស្តែង វាមិនអាចដូចអ្វីដែលយើងចង់បាននោះឡើយ។ អ្នកខ្លះតែងជួបបញ្ហាមិនចេះចប់មិនចេះហើយ ដែលធ្វើឲ្យជីវិតមានសភាពអាប់អួរខ្លាំង។ បញ្ហាទាំងនេះ មិនមែនកើតឡើងដោយគ្មានមូលហេតុនោះឡើយ ពោលគឺប្រាកដជាមានបញ្ហាអ្វីមួយមិនខានដែលរុញច្រានឲ្យបញ្ហាកើតឡើង។ ខាងក្រោមនេះគឺជាមូលហេតុសំខាន់ៗដែល ធ្វើឲ្យអ្នកជួបរឿងអាក្រក់មិនចេះចប់៖
១) ខ្វះព័ត៌មាន៖ មានរឿងរ៉ាវជាច្រើនកើតឡើងប្រចាំថ្ងៃ ហើយខ្លះក៏មានប្រយោជន៍ និង ខ្លះទៀតនឹងធ្វើឲ្យខូចប្រយោជន៍របស់អ្នក។ ដូច្នេះហើយ បើកាលណាអ្នកសម្រេចចិត្តធ្វើអ្វីមួយដោយ ខ្វះព័ត៌មាននោះវានឹងបង្កឲ្យអ្នក ជួបបញ្ហាមិនខាន។ វាជាចំណុចសំខាន់មួយដែល មនុស្សគ្រប់គ្នាត្រូវតែ ទទួលស្គាល់ ព្រោះបើមិនដូច្នេះទេប្រាកដជា ត្រូវប្រឈមនឹងបញ្ហារាប់មិនអស់មិនខាន។
២) មិនស្តាប់ហេតុផលអ្នកដទៃ៖ មានមនុស្សច្រើនណាស់ដែលគិតថា មានតែខ្លួនទេដែលមានគំនិតល្អជាងគេ។ ការគិតបែបនេះ គឺនឹងនាំមកនូវភាពអន្តរាយមិនខាន ព្រោះថាមនុស្សមិនអាចធ្វើរឿងសម្រេចគ្រប់យ៉ាងតាមគំនិតខ្លួនឯងឡើយ ដោយហេតុថា គិតមិនដល់ តែងតែកើតមានឡើង។ ដូច្នេះហើយបើអ្នក មិនព្រមស្តាប់ហេតុផលអ្នកដទៃ ហើយធ្វើតាមតែចិត្តខ្លួនឯងតែមួយមុខ ប្រាកជាជួបការបរាជ័យធ្ងន់ធ្ងរមិនខាន។
៣) ខ្វះការជឿជាក់លើខ្លួនឯង៖ ភាពជឿជាក់គឺពិតជាសំខាន់ ត្បិតអីវាជាកម្លាំងចិត្តដែលមិនអាចខ្វះបាន ក្នុងការជំនះរាល់ការលំបាកក្នុងជីវិត។ វាគ្មានបរាជ័យណាស្មើនឹង ការខ្វះទំនុកចិត្តលើខ្លួនឯងនោះទេ។ វាជាគំនិតអវិជ្ជមានមួយដែល មនុស្សគ្រប់រូបត្រូវតែកែប្រែ ព្រោះវាមានន័យថា ចាញ់មុនការប្រកួតបាត់ទៅហើយ។
៤) ធ្វេសប្រហែស៖ មិនថារឿងតូច ឬ ធំឡើយ បើកាលណាអ្នកមិនមានការប្រុងប្រយ័ត្នទេ នោះរឿងអាក្រក់ៗងាយនឹងកើតឡើងខ្លាំងណាស់។ មនុស្សជាច្រើន តែងធ្វេសប្រហែសចំពោះអ្វីដែលពួកគេកំពុងធ្វើ ដោយគិតថា វាគ្រាន់តែជារឿងតូចតាច។ ប៉ុន្តែរឿងតូចតាចនឹងក្លាយជាលធំគ្រប់ពេល ដែលធ្វើឲ្យអ្នកខកបំណងម្តងហើយម្តងទៀត។
៥) ខ្វះការតស៊ូ៖ ការតស៊ូគឺជាចំណុចមួយដែលមិនអាចខ្វះបាននោះទេ សម្រាប់មនុស្សទាំងឡាយណាដែលប្រាថ្នាចង់សម្រេចគោលដៅតាមក្តីប្រាថ្នា។ ពេលខ្លះមិនមែនដោយសារតែ គ្មានសមត្ថភាពនោះទេប៉ុន្តែមកពីខ្វះការតស៊ូ និង អំណត់អត់ធន់ ព្រោះថា រឿងមួយចំនួនពិតជាទាមទាពេលវេលាសមស្របមួយ ដើម្បីសម្រេចតាមបំណង។ ប៉ុន្តែបើធ្វើមិនទាន់ដឹងក្រូចដឹងអំពិលផងក៏បោះបង់ នោះ អ្នកនឹងត្រូវជួបភាពបរាជ័យដដែលៗមិនខាន៕
