ហេតុអ្វីត្រូវសិក្សាពី ឥរិយាបថរបស់អង្គភាព (Organizational Behavior)?
ការស្វែងយល់ពីបុគ្គលិក និងការសិក្សាពីធម្មជាតិដ៏សែនស្មុគស្មាញរបស់មនុស្សម្នាក់ៗជារឿងមួយចាំបាច់ខ្លាំងណាស់ដើម្បីឲ្យការគ្រប់គ្រងក្នុងស្ថាប័នមួយកាន់តែល្អប្រសើរ ក៏ដូចជាបង្កើនតម្លៃធនធានមនុស្សក្នុងស្ថាប័នមួយផងដែរ។ ឥរិយាបថរបស់អង្គភាពជួយអ្នកសិក្សាពីដើមហេតុដែលមានឥទ្ធិពលលើឥរិយាបថរបស់បុគ្គលិកក្នុងកន្លែងការងាររបស់អ្នក។ ខាងក្រោមនេះជាហេតុផល ៥យ៉ាងដែលអ្នកគួរយល់ដឹងពីឥរិយាបថរបស់អង្គភាព÷
១) យល់ដឹងពីទំនាក់ទំនងរវាងស្ថាប័ននិងបុគ្គលិក÷ ជួយឲ្យយុទ្ធសាស្ត្រនៃការគ្រប់គ្រងបុគ្គលិកបានកាន់តែប្រសើរឡើង ជួយបង្កើនបរិយាកាសការងារឲ្យកាន់តែល្អ និងជួយឲ្យបុគ្គលិកមានភាពស្មោះត្រង់នឹងអង្គភាព។ ដោយនិយាយជារួមគឺការលើកកម្ពស់ផ្នែកធនធានមនុស្សក្នុងស្ថាប័ន។
២) លើកទឹកចិត្តដល់បុគ្គលិក÷ ការសិក្សាពីឥរិយាបថរបស់អង្គភាពជួយឲ្យអ្នកគ្រប់គ្រងយល់ពីបុគ្គលិកឬអ្នកក្រោមបង្គាប់ខ្លួន ហើយលើកទឹកចិត្តពួកគេ ផ្តល់នូវការលើកទឹកចិត្តផ្សេងៗដល់បុគ្គលិកម្នាក់ៗតាមតម្រូវការរបស់ពួកគេក្នុងគោលបំណងបង្កើនផលិតភាពការងាររបស់ស្ថាប័នទាំងមូល។
៣) ពង្រឹងទំនាក់ទំនងក្នុងស្ថាប័នឲ្យកាន់តែប្រសើរឡើង÷ ជួយឲ្យអ្នកឲ្យដឹងពីដើមចមនៃបញ្ហា ព្យាករណ៍ពីអនាគតនិងគ្រប់គ្រងលើអ្វីដែលជាផលវិបាក។ ជាលទ្ធផលអ្នកគ្រប់គ្រងនឹងអាចរក្សាបាននូវទំនាក់ទំនងល្អ ស្អិតល្មួតរវាងបុគ្គលិកនឹងបុគ្គលិក និងបុគ្គលិកទៅស្ថាប័ន។
៤) ប្រសិទ្ធិភាពនៃការប្រើប្រាស់ធនធានមនុស្ស÷ ចំណេះដឹងដែលបានមកពីការសិក្សាលើឥរិយាបថអង្គភាពជួយអ្នកគ្រប់គ្រងសម្រេចបាននូវប្រសិទ្ធិភាពនិងភាពស័ក្តសិទ្ធក្នុងការគ្រប់គ្រងបុគ្គលិក បំផុសគំនិតនិងលើកទឹកចិត្តបុគ្គលិកដើម្បីទទួលបានផលិតភាពការងារកាន់តែប្រសើរ។
៥) ទស្សន៍ទាយ ព្យាករណ៍ពីឥរិយាបថមនុស្ស÷ នេះអាចជាហេតុផលមួយដ៏សំខាន់ដើម្បីសិក្សាពីឥរិយាបថអង្គភាពក្នុងការគ្រប់គ្រង ដោយជួយឲ្យអ្នករៀនបានក្លាយជាអ្នកគ្រប់គ្រងមួយដ៏ល្អ ដែលអាចធ្វើឲ្យសំរេចគោលបំណងនិងទស្សនវិស័យរបស់ស្ថាប័ន ក៏ដូចជាចូលរួមចំណែកក្នុងការស្វែងរកប្រាក់ចំណេញដល់ស្ថាប័នយ៉ាងមានប្រសិទ្ធិភាព៕
ដោយ៖ យ៉ាយ៉ា
