មូលហេតុធំៗទាំង ៧ ដែលបណ្តាលឲ្យអាជីវកម្មខ្នាតតូចទទួលបរាជ័យ និងវិធីចៀសវាងការបរាជ័យ
យោងតាមស្ថិតិដែលចេញផ្សាយជាសាធារណៈសិក្សាដោយស្ថាប័ន Small Business Administration (SBA) ក្នុងឆ្នាំ 2017 បានឲ្យដឹងថា មួយភាគប្រាំនៃអាជីវកម្មថ្មីថ្មោង Startup បានដួលរលំនៅក្នុងឆ្នាំដំបូង ខណៈដែលពាក់កណ្តាលនៃអាជីវកម្មប្រភេទនេះ សរុបអាចនឹងដួលរលំក្នុងឆ្នាំទី៥ និងមួយភាគបីប៉ុណ្ណោះដែលអាចបន្តររស់រានបានបន្ទាប់ពីឆ្នាំទី7 ឬលើសពីនេះ។ នេះក៏ដោយសារអាជីវកម្ម Startup បានធ្វើនូវកំហុសមួយចំនួនដូចជា៖
១ អ្នកបានបង្កើតអាជីវកម្មរបស់អ្នកខុសមូលហេតុ÷ អ្នកគិតថាការបង្កើតអាជីវកម្មមួយដំបូងគឺក្នុងគោលបំណងដើម្បីរកចំណូលឲ្យបានច្រើនមែនទេ? ឬក៏អ្នកគិតថា ការដែលបើកអាជីវកម្មមួយធ្វើឲ្យអ្នកអាចមានពេលវេលាច្រើននៅជាមួយគ្រួសាររបស់អ្នក? ឬក៏អ្នកអាចធុញទ្រាន់នឹងការឆ្លើយសំនួរទាំងឡាយដែលតែងសួរថា ”ពេលណាទើបចេញរកស៊ី” អ្នកអាចនឹងមិនចាំបាច់ឆ្លើយសំនួរទាំងនេះទេ។ សហគ្រិនជោគជ័យមិនមែនចំណាយពេលត្រឹមមួយឆ្នាំពីរឆ្នាំដើម្បីកើបលុយទាំងដុលទេ។ ដើម្បីចាប់ផ្តើមអ្នកត្រូវប្រើហេតុផលទាំងនេះ÷
ក អ្នកចង់បង្កើតវាឡើង អ្នកស្រលាញ់អ្វីដែលអ្នកកំពុងតែធ្វើនេះខ្លាំង អ្នកជឿជាក់ថាអ្នកអាចធ្វើវាបានដោយផ្អែកលើចំណេះដឹងរួមទាំងបទពិសោធន៍ដែលអ្នកមាន ហើយប្រាកដថាផលិតផលឬសេវាកម្មរបស់អ្នកគឺពិតជាមានតម្រូវការលើទីផ្សារ
ខ អ្នកត្រូវមានការប្តេជ្ញាចិត្តខ្ពស់ អត់ធ្មត់ មានគំនិតវិជ្ជមាន មិនធ្វើយ៉ាងណាទៅឲ្យដល់អតិថិជនគោលដៅរបស់អ្នក
គ ភាពបរាជ័យមិនអាចរារាំងអ្នកបានឡើយ អ្នកនឹងសិក្សាពីកំហុសហើយកែប្រែវាឲ្យបានល្អប្រសើរឡើងវិញ
ឃ អ្នកមានភាពឯករាជ្យ និងមានគំនិតច្នៃប្រឌិតអាចដោះស្រាយបញ្ហាបានឆាប់រហ័ស
ង ប្រកាន់ខ្ជាប់នូវភាពស្មោះត្រង់
២ ការគ្រប់គ្រងរបស់អ្នកខ្សោយ÷ មិនថាតែអាជីវកម្មខ្នាតតូខទេ ទោះខ្នាតធំក៏ដោយបើការគ្រប់គ្រងខ្សោយវាច្បាស់ជាដួលរលំមិនខាន។ បញ្ហាដែលនាំឲ្យអាជីវកម្មបរាជ័យគឺបណ្តាលមកពីម្ចាស់អាជីវកម្មមិនបានគ្រប់គ្រងហិរញ្ញវត្ថុឲ្យបានល្អ ការទិញ ការលក់នៅខ្វះខាតច្រើន ការផលិតមិនត្រូវតាមស្តង់ការឬតម្រូវការ គ្មានបុគ្គលិកល្អធ្វើការឬការគ្រប់គ្រងបុគ្គលិកនៅខ្សោយ។ អ្វីដែលម្ចាស់អាជីវកម្មត្រូវធ្វើគឺ សិក្សាពីផែនការ ការគ្រប់គ្រងនិងរាល់សកម្មភាពប្រតិបត្តិការ បូករួមទាំងការសិក្សាពីទីផ្សារនិងកំណត់ឲ្យបានជាក់កលាក់ពីទិន្នន័យអតិថិជន។
៣ ដើមទុនមិនគ្រប់គ្រាន់÷ អ្នកណាថារកស៊ីមិនចាំបាច់លើដើមទុនអាស្រ័លលើគំនិត បើអ្នកមានតែគំនិតមកប្រើ តែខ្វះសកម្មភាព គឺអ្នកនឹងទទួលភាពបរាជ័យជាមិនខាន។ បរាជ័យក៏បណ្តាលមកពីអ្នកមិនទាន់យល់ពីលំហូរនៃសាច់ប្រាក់សំរាប់អាជីវកម្ម អ្នកខ្លះគ្រាន់តែត្រូវការដើមទុនបើកអាជីវកម្មតែ មិនបានត្រៀមដើមទុនបំរុងសំរាប់អាជីវកម្ម។
៤ ទីតាំងអាជីវកម្មខុស÷ ការរើសទីតាំងខុសមានន័យថាអ្នកបានកំណត់អតិថិជនគោលដៅអ្នកខុសហើយសម្រាប់ប្រភេទអាជីវកម្មមួយចំនួនដូចជាកាហ្វេ និងភោជនីយដ្ឋានជាដើម។ ដូច្នេះអ្វីដែលអ្នកគួរពិចារណាគឺត្រូវមើលដោយលម្អិតលើចំណុចប៉ុន្មានខាងក្រោមនេះ៖
ក អតិថិជនអ្នកនៅទីណា?
ខ ចរាចរណ៍ ការដែលអាចចូលមកដល់របស់អតិថិជន ការចត និងភ្លើងបំភ្លឺនានាដែលសុទ្ធតែជាការបង្កលក្ខណៈងាយស្រួលដល់អតិថិជន
គ ឃ្លាំងផ្ទុក ឬស្ដុកទំនិញ
ឃ ទីតាំងនៃដៃគូប្រកួតប្រជែង
ង លក្ខខណ្ឌនិងសុវត្ថិភាពនៃអគារ
ច ទីតាំងអំណោយផលសំរាប់អាជីវកម្ម Startup ទេ
ឆ សង្គម ប្រវត្តិសាស្ត្រតំបន់ និងជាកន្លែងដែលអាចឲ្យយើងឈរជើងបាន
៥ កង្វះផែនការ÷ អាជីវកម្មខ្នាតតូចភាគច្រើនទទួលបរាជ័យដោយសារម្ចាស់អាជីវកម្មភាគច្រើនមិនបានរៀបចំផែនការឲ្យបានច្បាស់លាស់ វាជាបញ្ហាស្លាប់រស់បើយើងមិនដឹងថាតើយើងត្រូវចាប់ផ្តើមអ្វីមុន ហើយធ្វើអ្វីបន្ទាប់ទៀត។ ត្រូវចាំថាបើអ្នកចង់ប្រើកម្ចីធនាគារដើម្បីជាដើមទុនសំរាប់បើកអាជីវកម្មនោះគឺទាមទារឲ្យអ្នកមានផែនការអាជីវកម្មជាចាំបាច់ ដូច្នេះការងារដែលយើងត្រូវធ្វើគឺ÷
ក ពិព៌ណនាពីអាជីវកម្ម ទស្សនៈវិស័យ គោលដៅ និងគន្លឹះជោគជ័យសំរាប់អាជីវកម្ម
ខ វិភាគទីផ្សារ
គ តម្រូវការការងារ
ឃ បញ្ហាដែលជាសក្តានុពល និងដំណោះស្រាយ
ង ហិរញ្ញវត្ថុ: ដើមទុន និងការផ្គត់ផ្គង់ របាយការណ៍តុល្យការណ៍ របាយការណ៍ចំណូល និងការវិភាគលំហូរសាច់ប្រាក់ រួមទាំងព្យាករណ៍ការលក់និងចំណាយ
ច វិភាគពីដៃគូប្រកួតប្រជែង
ឆ ធ្វើទីផ្សារ ផ្សព្វផ្សាយ និង promotion
ឆ គម្រោងថវិកា និងគ្រប់គ្រងការរីកលូតលាស់នៃអាជីវកម្ម
៦ រំពឹងខ្ពស់ពេក÷ ការរំពឹងខ្ពស់ហួសថាអាជីវកម្មនឹងរីកចម្រើនលឿន ធ្វើឲ្យយើងប្រឹងចំណាយកាន់តែច្រើនដោយគ្មានផែនការ ជាហេតុធ្វើឲ្យអាជីវកម្មងាយនឹងដាំក្បាលចុះ។
៧ អ្នកគ្មាន Website គ្មានបណ្តាញសង្គមអ្វីទាំងអស់ដើម្បីជួយលើកកម្ពស់ម៉ាកយីហោរបស់អ្នក÷ ដោយសារសម័យនេះ ជាសម័យបច្ចេកវិទ្យា ព័ត៌មាន ទិន្នន័យនានា មានច្រើននៅលើអ៊ីនធើណេត ការផ្សព្វផ្សាយដែលរហ័សគឺត្រូវធ្វើឡើងនៅតាមបណ្តាញសង្គម។ វាពិតជាចាំបាច់ខ្លាំងណាស់ដែលអ្នកត្រូវមានការរៀបចំរចនាទៅលើគេហទំព័ររអាជីវកម្មរបស់អ្នកឲ្យបានល្អ មានភាពងាយស្រួលនិងទាក់ទាញដើម្បីងាយស្រួលដល់អតិថិជនអ្នក៕
ដោយ៖ យ៉ាយ៉ា
ប្រភព÷ Partricia Schaefer
