ចង់រកស៊ីលើមុខជំនួញដែលអ្នកគ្មានជំនាញ តើត្រូវធ្វើដូចម្តេច?
ដូចការលើកឡើងរបស់អតីតអ្នកជំនួញល្បីល្បាញរបស់អាមេរិក John D. Rockefeller ចង់ក្លាយជាសហគ្រិនដ៏ជោគជ័យម្នាក់មិនចាំបាច់ត្រូវការសញ្ញាបត្រនោះឡើយ។ ដូចនេះចង់បើកមុខជំនួញណាមួយដែលអ្នកគ្មានជំនាញ ឬមិនមានបទពិសោធន៍ក៏មិនមែនប្រាកដថា អ្នកនឹងបរាជ័យនោះដែរ។ ទន្ទឹមនឹងនេះបើអ្នកគិតថា ទាល់តែដូចមហាសេដ្ឋី Bill Gates ទើបអ្នកអាចចូលប្រឡូកក្នុងវិស័យបច្ចេកវិទ្យាបាន នោះប្រហែលលោក Steve Jobs និងលោក Michael Dell ដែលមិនមានបទពិសោធន៍លើមុខជំនួញមួយនេះកាលពីនៅក្មេងនោះប្រហែលជាមិនជោគជ័យលើវិស័យនេះឡើយ។
ការគិតបែបនេះគឺមិនត្រឹមត្រូវទាំងស្រុងនោះឡើយ។ វាមានវិធីជាច្រើនដែលអាចជួយឲ្យអ្នកសម្រេចបានក្តីសុបិន្តនៅក្នុងអាជីវកម្មមួយដែលអ្នកមិនមានជំនាញគ្រប់គ្រាន់។ ៤វិធីខាងក្រោមនេះ អាចផ្តល់ពន្លឺមួយចំនួនសម្រាប់អ្នកប្រសិនបើអ្នកពិតជាចង់ប្រឡូកក្នុងអាជីវកម្មមួយដែលអ្នកមិនមានជំនាញមែននោះ៖
១. ចាប់ផ្តើមសិក្សាស្រាវជ្រាវលើមុខជំនួញដែលអ្នកចង់ធ្វើឲ្យកាន់តែច្បាស់
អ្នកមិនចាំបាច់ទៅស្វែងយល់ថា តើផលិតផលដែលមានស្រាប់ទាំងនោះផលិត និងលក់ដោយរបៀបណានោះទេ។ ប៉ុន្តែអ្វីដែលអ្នកត្រូវតែដឹងនោះគឺថា តើអតិថិជនចង់បានអ្វី? តើអាជីវកម្មដឹកនាំដែលមានស្រាប់នៅលើទីផ្សារទាំងនោះនៅខ្វះចន្លោះកន្លែងណាខ្លះ? ហើយថា តើអ្នកអាចធ្វើអ្វីខ្លះដើម្បីចាប់យកឱកាសពីចំណុចខ្វះខាតទាំងនោះ? ប្រសិនបើអ្នកកត់សម្គាល់ឃើញថា អ្នកនៅមានភាពខ្វះខាតដើរមិនទាន់គេនៅឡើយ អ្នកត្រូវបង្កើនចំណេះដឹងតាមរយៈការស្វែងរកអ្នកប្រឹក្សាយោបល់ ចូលរួមសិក្ខាសាលាផ្សេងៗ ការបណ្តុះបណ្តាល ឬចូលរួមក្នុងបណ្ដាញអាជីវកម្មនានាដើម្បីសិក្សារៀនសូត្របន្ថែម។
នៅពេលដែលអ្នកកំពុងសិក្សារៀនសូត្រ អ្នកត្រូវព្យាយាមឲ្យខ្លាំងជាងគេបន្តិច ហើយមិនចាំបាច់ទទួលយកគ្រប់យ៉ាងដែលគេផ្តល់ឲ្យអ្នកនោះឡើយ។ សូមចាំថា នេះមិនមែនរៀនយកសញ្ញាប័ត្រនោះទេ ប៉ុន្តែជាការសិក្សារៀនសូត្រដើម្បីរកចម្លើយយ៉ាងសុក្រឹតមួយសម្រាប់យកមកអនុវត្តក្នុងអាជីវកម្មរបស់អ្នក។ ឧទាហរណ៍ថា បើអ្នកចង់ចាប់អាជីពក្នុងវិស័យម៉ូតសម្លៀកបំពាក់ អ្នកត្រូវរៀនស្រាវជ្រាវពីចង្វាក់នៃការផ្គត់ផ្គង់ ធនធានសម្ភារៈ និងដំណើរការនៃការផលិតជាដើម។
២. ជួលមនុស្សដែលមានសមត្ថភាពជាងអ្នកមកធ្វើការ
នៅពេលធ្វើអាជីវកម្មដែលអ្នកគ្មានជំនាញ អ្នកពិតជាត្រូវការមនុស្សដែលមានសមត្ថភាពជាងអ្នកមកធ្វើការឲ្យអ្នក។ នៅក្នុងមុខជំនួញរបស់អ្នក អ្នកអាចដឹងពីមធ្យោបាយដើម្បីដឹកជញ្ជូនទំនិញទៅកាន់អតិថិជន។ ប៉ុន្តែនៅក្នុងផ្នែកបច្ចេកទេសវិញ អ្នកត្រូវតែរកមនុស្សដែលយល់ច្បាស់ពីរបៀបដែលផលិតផល ឬសេវាកម្មរបស់អ្នកត្រូវបានផលិតឡើងប្រកបដោយគុណភាពខ្ពស់ស្របតាមការចង់បានរបស់អ្នក។ ហេតុដូច្នេះហើយនៅក្នុងចំណុចនេះ អ្នកត្រូវរៀបចំគោលបញ្ជីមួយរាយរាប់ពីការងារមួយចំនួនដែលអ្នកមានជំនាញ និងការងារផ្សេងទៀតដែលអ្នកគ្មានជំនាញដើម្បីងាយស្រួលរកមនុស្សមកធ្វើការសម្រាប់បំពេញចំណុចខ្វះខាតទាំងនោះដូចជា បុគ្គលិកចាត់ការ បុគ្គលិកក្រៅម៉ោង ឬអ្នកជំនាញជាដើម។
៣. ដាក់ភាពជឿជាក់លើអ្នកជំនាញរបស់អ្នក
បន្ថែមពីលើការធ្វើឲ្យទំនាក់ទំនងការងាររបស់អ្នកកាន់តែងាយស្រួល ការផ្តល់ទំនុកចិត្តដល់អ្នកជំនាញ ឬក្រុមការងាររបស់អ្នកគឺពិតសំខាន់ណាស់ចំពោះការចាប់ផ្ដើមភាពជោគជ័យនៅក្នុងអាជីវកម្មរបស់អ្នក។ អ្នកត្រូវតែមានជំនឿលើពួកគេនៅពេលដែលពួកគេនិយាយថា អ្វីមួយពិតជាអាចទៅរួច ឬមិនអាចទៅរួច ឬថាមានវិធីល្អប្រសើរជាងមុនដើម្បីអាចឈានទៅដល់គោលដៅនោះ។ ប្រសិនបើអ្នក ព្យាយាមចាប់បង្ខំពួកគេទាំងដែលអ្នកមិនបានផ្តល់ភាពជឿជាក់ទៅឲ្យពួកគេទេនោះ វាស្មើនឹងអ្នកកំពុងរុញច្រានឲ្យខ្លួនឯងបរាជ័យ។
អ្នកត្រូវផ្តល់ភាពជឿជាក់ដល់ពួកគេដោយហេតុថា ដើម្បីបង្ហាញពួកគេថា អ្នកមានអ្វីដែលអ្នកត្រូវការដើម្បីធ្វើឲ្យអាជីវកម្មរបស់អ្នកលូតលាស់ និងធ្វើឲ្យជំនាញរបស់ពួកគេកាន់តែមានការអភិវឌ្ឍ។ ចំណុចនេះអាចធ្វើឡើងតាមរយៈការទំនាក់ទំនងដោយបើកចំហ និងញឹកញាប់បំផុត។ អ្នកត្រូវពន្យល់មូលហេតុដែលនៅពីក្រោយការសម្រេចចិត្តធំៗ របស់អ្នក ហើយអ្នកក៏ត្រូវសុំឲ្យពួកគេពន្យល់មូលហេតុដែលនៅពីក្រោយពួកគេវិញផងដែរ។ ប្រសិនបើក្រុមការងាររបស់អ្នកនិយាយថា គម្រោងមួយនឹងត្រូវចំណាយពេល ៦ ខែទើបអាចបញ្ចប់បាននោះវាពិតជាអាចទៅរួចដែលអ្នកត្រូវនិយាយប្រាប់ពួកគេវិញថា ពួកគេនឹងទទួលបានអ្វីខ្លះប្រសិនបើពួកគេអាចធ្វើបានលឿនជាងនេះ។ នោះអ្នកនឹងសង្កេតឃើញថា អ្នកនឹងទទួលបានចម្លើយថ្មីនៅពេលអ្នកបានសួរសំនួរមួយនេះ។
៤. ពង្រីកបណ្ដាញទំនាក់ទំនងអាជីវកម្មរបស់អ្នកជាមួយម្ចាស់អាជីវកម្មផ្សេងៗទៀត
ការកសាងទំនាក់ទំនងអាជីវកម្មរបស់អ្នកទៅកាន់ម្ចាស់អាជីវកម្មផ្សេងៗទៀតដែលផ្ដោតលើប្រភេទអាជីវកម្មប្រហាក់ប្រហែលគ្នា អាចជួយបង្កើនចំណេះដឹងរបស់អ្នកឲ្យកាន់តែរឹងមាំឡើងនៅក្នុងមុខជំនួញរបស់អ្នក។ ហេតុដូច្នេះហើយអ្នកមិនគួរស្ទាក់ស្ទើរនោះឡើយនៅក្នុងការចូលរួមជាសមាជិកនៃសមាគមន៍អាជីវកម្ម ចូលរួមកម្មវិធីសិក្ខាសាលាអាជីវកម្ម ឬចូលរួមស្ម័គ្រចិត្តនៅក្នុងកម្មវិធីផ្សេងៗ។ អ្នកត្រូវចាំថា ដើម្បីឲ្យអាជីវកម្មរបស់អ្នកកាន់តែទទួលបានការគាំទ្រ ពីមហាជន អ្នកក៏ត្រូវតែទទួលបានការគាំទ្រ និងជឿជាក់ពីម្ចាស់អាជីវកម្មដែលប្រឡូកក្នុងវិស័យ អាជីវកម្មរបស់អ្នកដូចគ្នាដែរ។ ក្រៅពីអ្នក និងអតិថិជន ដៃគូអាជីវកម្មនេះហើយដែលជាមនុស្សសំខាន់ជំរុញឲ្យអាជីវកម្មរបស់អ្នកកាន់តែមានសក្ដានុពលខ្លាំងឡើង៕
ប្រភព៖ entrepreneur
