អ្នកចង់បង្កើតអាជីវកម្មថ្មីថ្មោងមិនគួរមើលរំលងមេរៀន ១០ ជំហាននេះឡើយ
ជីវិតដែលពឹងផ្អែកលើអាជីវកម្មមិនមែនជារឿងមួយងាយស្រួលនោះឡើយ បើមិនដូច្នេះទេប្រហែលមនុស្សគ្រប់គ្នាសុទ្ធតែអាចធ្វើជំនួញបានហើយ។ ប្រសិនបើអ្នកយល់ថា អ្នកមានភាពជឿជាក់ និងមានជំនាញលើការប្រកបអាជីវកម្មណាមួយនោះហើយ វាដល់ពេលដែលអ្នកគួរតែសាកល្បងម្តងហើយ។ ប៉ុន្តែអ្នកគួរពិនិត្យមើលមេរៀន ១០ ខាងក្រោមនេះជាមុនសិនដើម្បីត្រៀមខ្លួនសម្រាប់ធ្វើអាជីវកម្មនៅពេលខាងមុខ។
១."ជំហានដំបូង” គឺជាកូនសោសំខាន់បំផុត
ដំបូន្មានសំខាន់មួយសម្រាប់សហគ្រិនគ្រប់គ្នានៅទីនេះ គឺការបំបាត់ចោលភាពភ័យខ្លាចជាជំហានដំបូងដែលត្រូវធ្វើមុនគេ។ នៅពេលអ្នកអាចយកឈ្នះភាពភ័យខ្លាចបាន មានន័យថា អ្នកអាចជោគជ័យបានពាក់កណ្តាល។ គ្មានសហគ្រិនណាម្នាក់កើតមកជាមួយនឹងអំណាចខ្លាំងពូកែនោះឡើយ ហើយបើទោះបីជាបុគ្គលនោះខ្លាំងពូកែស្ទាត់ជំនាញនៅក្នុងជំនួញយ៉ាងណាក៏ដោយ បើមិនមានមហិច្ឆតាដើរតាមក្តីសុបិនរបស់ខ្លួនដែលខ្លួនចង់ធ្វើ និងស្រលាញ់នោះទេ គឺពិតជាមិនអាចទៅរួចឡើយ។ សូមកុំគិតច្រើនពេក ហើយឈប់ភ័យខ្លាចងាកមកផ្តោតលើគោលដៅដែលអ្នកចង់ធ្វើវិញជារឿងសំខាន់។
២. ចាប់ផ្តើមពីក្រុមការងារតូចមួយ
ក្រុមការងារដំបូងដែលចាប់ផ្តើមធ្វើដៃគូអាជីវកម្មជាមួយអ្នកមិនចាំបាច់ទាល់តែមានមនុស្សចូលរួមច្រើននោះទេ អ្វីដែលសំខាន់អ្នកគួរចាប់ផ្តើមចេញពីក្រុមហ៊ុនមនុស្សមួយក្រុមតូចដែលមានចក្ខុវិស័យ ឆន្ទៈ គំនិត យុទ្ធសាស្ត្រ ភាពជឿជាក់និងមហិច្ឆតាដើរជាមួយអ្នកទៅបានហើយ។ អ្នកត្រូវប្រាកដថា ក្រុមការងារដ៏តូចនេះនឹងក្លាយជាដៃគូអាជីវកម្មសំខាន់នៅពេលខាងមុខដែលអាចធ្វើឲ្យក្រុមហ៊ុនកាន់តែលូតលាស់ខ្លាំងឡើង។
៣. គោរពទស្សនៈ ឬមតិយោបល់ផ្សេងៗពីក្រុមការងាររបស់អ្នក
គំនិត ទស្សនៈ មតិយោបល់នឹងត្រូវបានលើកឡើងផ្សេងៗគ្នាចេញពីក្រុមការងាររបស់អ្នក។ សូមកុំយកបញ្ហាផ្ទាល់ខ្លួនដាក់ជាបញ្ហារួម ឬកុំលើកតម្កើងទស្សនៈរបស់ក្រុមការងារម្នាក់ ហើយមិនឲ្យតម្លៃគំនិតយោបល់របស់ក្រុមការងារផ្សេងទៀត។ អ្នកត្រូវបង្កើតយុទ្ធសាស្ត្រមួយដែលមានលក្ខណៈទូលំទូលាយជាងមុនដើម្បីបង្កើតបរិយាកាសការងារមួយដែលមានភាពឯកភាពគ្នានៅទីបំផុតនៅពេលមានទស្សនៈផ្សេងៗគ្នាចេញពីក្រុមការងារ ហើយត្រូវតម្កល់ផលប្រយោជន៍ក្រុមហ៊ុនជាធំ។
៤. បង្កើតវប្បធម៌ល្អមួយនៅក្នុងក្រុមហ៊ុន
ក្នុងនាមអ្នកជាអ្នកកាន់ភ្លើងគប់ឲ្យក្រុមហ៊ុន អ្នកគួរចំណាយពេលដើម្បីកសាងវប្បធម៌ដ៏ល្អមួយនៅក្នុងក្រុមហ៊ុន។ បើទោះបីជាក្រុមហ៊ុនរបស់អ្នកមានត្រឹមមនុស្ស ២នាក់ ឬ ១ ០០០ នាក់ក៏ដោយ ការកសាងវប្បធម៌ដ៏ល្អមួយនៅក្នុងក្រុមហ៊ុនគឺជាមូលដ្ឋានគ្រឹះដ៏សំខាន់សម្រាប់អនាគតជោគជ័យនៅពេលខាងមុខ។
៥. អំណាចនៃបច្ចេកវិទ្យា
នៅសតវត្សទី ២១ នេះ ការផ្សារភ្ជាប់អាជីវកម្មទៅនឹងបច្ចេកវិទ្យាគឺមិនអាចខ្វះបាននោះឡើយ ពីព្រោះថា វាអាចជួយឲ្យអាជីវកម្មរបស់អ្នករីកលូតលាស់ទៅមុខបានកាន់តែប្រសើរជាងមុន។ ប៉ុន្តែអ្នកក៏ត្រូវដឹងដែរថា បច្ចេកវិទ្យាមានការផ្លាស់ប្ដូរលឿនជាងមនុស្សឆ្ងាយណាស់។ ហេតុដូច្នេះហើយអ្នកត្រូវតែឧស្សាហ៍ធ្វើបច្ចុប្បន្នភាពអាជីវកម្ម ស្រាវជ្រាវ និងបណ្តុះបណ្តាលដៃគូអាជីវកម្ម បុគ្គលិក និងអ្នកពាក់ព័ន្ធ ផ្សេងៗទៀតឲ្យយល់ដឹងពីបច្ចេកវិទ្យាឲ្យបានកាន់តែច្រើន។
៦. លើកទឹកចិត្តក្រុមការងារ
ក្រុមការងារមួយដែលមានកម្លាំងចិត្តខ្លាំង គឺជាក្រុមការងារដែលជោគជ័យ។ ហេតុដូច្នេះហើយអ្នកត្រូវរក្សាក្រុមការងាររបស់អ្នកឲ្យមានថាមភាពជាប្រចាំ និងឧស្សាហ៍លើកទឹកចិត្តពួកគេឲ្យបានទៀងទាត់។ ចំណុចនេះអ្នកត្រូវជ្រើសរើសបុគ្គលិកដោយប្រុងប្រយ័ត្ន បណ្តុះបណ្តាលជំនាញបន្ថែម និងពិនិត្យមើលពីចំណុចខ្វះខាតផ្សេងៗដែលជាតម្រូវការចាំបាច់សម្រាប់ធ្វើឲ្យការងារមានផលិតភាព។ សម្រាប់ក្រុមការងារស្នូលរបស់អ្នក អ្នកត្រូវលើកទឹកចិត្តឲ្យមានភាពដឹកនាំដ៏ល្អមួយនៅពេលអនាគត ហើយជៀសវាងដាច់ខាតការគ្រប់គ្រងមួយតាមបែបផ្ដាច់ការ។
៧. បង្កើតគោលការណ៍គ្រឹះដើម្បីដោះស្រាយបញ្ហាក្នុងក្រុមហ៊ុន
បញ្ហាផ្សេងៗនឹងកើតមាន ដូចនេះហើយអ្នកត្រូវបង្កើតគោលការណ៍គ្រឹះមួយសម្រាប់ដោះស្រាយបញ្ហាដែលកើតមានឡើង។ នៅត្រង់នេះអ្នកត្រូវធ្វើឲ្យមានថាមភាពនៅក្នុងអាជីវកម្មរបស់អ្នកតាមរយៈបំផុសឲ្យមានទស្សនៈ ឬគំនិតសុទិដ្ឋិនិយម ហើយត្រូវចែករំលែក ឲ្យតម្លៃ និងយកទៅអនុវត្តឲ្យបានទូលំទូលាយនៅក្នុងស្ថាប័នទាំងមូលតាមដែលអាចធ្វើបាន។
៨.កុំបោះបង់
សូមចាំថា នៅពេលអ្នកធ្វើជំនួញ អ្នកគឺត្រូវតាំងខ្លួន ជាអ្នកប្រយុទ្ធ មិនមែនជាអ្នកចុះញ៉មដោយសារតែមានឧបសគ្គ ឬភាពបរាជ័យនៅខាងមុខអ្នកនោះទេ។ អ្នកត្រូវចាំថា បរាជ័យផ្តល់មកឲ្យអ្នកនូវមេរៀនដ៏ល្អ រីឯឧបសគ្គវិញគឺជាថ្នាំប៉ូវធ្វើឲ្យអ្នកកាន់តែរឹងមាំ បន្ទាប់មកអ្វីៗនឹងក្លាយជារឿងអស្ចារ្យសម្រាប់អ្នក។
៩. រីករាយនូវអ្វីដែលជាសមិទ្ធផលបន្តិចបន្តួចរបស់អ្នក
រាល់ភាពជោគជ័យរបស់អ្នកបើទោះបីជាវាបន្តិចបន្តួចក៏ដោយ អ្នកគួរតែអរគុណខ្លួនឯង និងរីករាយនឹងទទួលយកវា។ ភាពជោគជ័យបន្តិចបន្តួចនេះ វានឹងរីកធំធាត់បន្តិចម្តងៗរហូតដល់ធ្វើឲ្យស្ថាប័នទាំងមូលជោគជ័យ។ អ្នកត្រូវចែករំលែកនូវចំណុចល្អៗទាំងនេះទៅកាន់ក្រុមការងារទាំងមូលដើម្បីលើកទឹកចិត្ត និងប្រាប់ពួកគេថា ពួកគេក៏មានចំណែកក្នុងភាពជោគជ័យជាមួយអ្នកដែរ។
១០.កសាងបណ្ដាញទំនាក់ទំនងឲ្យកាន់តែធំ
ចំណុចសំខាន់បំផុតចុងក្រោយមួយទៀតដែលសហគ្រិនទាំងអស់ត្រូវស្វែងយល់នោះគឺថា អាជីវកម្មមួយមានស្ថិរភាពយូរអង្វែងត្រូវពឹងអាស្រ័យជាសំខាន់លើភាពវៃឆ្លាត និងប៉ិនប្រសព្វរបស់អ្នកដឹកនាំនៅក្នុងការពង្រីកបណ្ដាញទំនាក់ទំនងជាមួយមនុស្សថ្មីៗ ជាពិសេសដៃគូអាជីវកម្មដែលជោគជ័យ។ ដូច្នេះ អ្នកត្រូវចំណាយពេលមួយចំនួនដើម្បីលៃលកសិក្សារៀនសូត្របន្ថែម ចែករំលែក និងបង្កើតចំណងមិត្តភាពឲ្យបានច្រើនបំផុតពីមនុស្សជុំវិញខ្លួនតាមដែលអាចធ្វើបាន៕
ប្រភព៖ cnbc
