ក្បួនសំខាន់បំផុតទីមួយនៅក្នុងអាជីវកម្មដែលសហគ្រិនគួរតែដឹង
តើអ្វីទៅជាក្បួនសំខាន់បំផុតមួយនៅក្នុងអាជីវកម្មដែលអ្នកគួរតែដឹង? ប្រសិនបើអ្នកបានសួរសំនួរនេះទៅកាន់សហគ្រិន ឬអ្នកមានជំនួញផ្ទាល់ខ្លួន ចម្លើយដែលទូទៅនោះ គឺត្រូវរកលុយឲ្យបានច្រើន។ ចម្លើយបែបនេះវាមិនខុសទេ ប៉ុន្តែវាមិនមែនជាចម្លើយដែលអ្នកទទួលបានពីសៀវភៅ និងមេរៀនអាជីវកម្មដែលអ្នកបានរៀននៅសាលានោះឡើយ។
តើអ្នកមានធ្លាប់គិតដល់ការបង្កើនតម្លៃដៃគូភាគហ៊ុន (Shareholder)របស់អ្នកដែរឬទេ? ប្រសិនបើនេះជាចម្លើយ អ្នកប្រហែលជាអាចសួរទៀតថា បើធ្វើអាជីវកម្មមិនរកលុយតើធ្វើដើម្បីអ្វី? ជាការពិតទោះក្រុមហ៊ុនរបស់អ្នកជាក្រុមហ៊ុនស្វែងរកប្រាក់ចំណេញ ឬមិនស្វែងរកប្រាក់ចំណេញក៏ដោយ ការរកចំណូលគឺជាចំណុចសំខាន់ដែលអ្នកត្រូវដាក់នៅខាងមុខគេ និងយុទ្ធសាស្ត្រគឺជាចំណុចស្នួលនៃអាជីវកម្ម។ បើក្រុមហ៊ុនអ្នករកចំណូលមិនបាន អ្នកមិនអាចឈរជើងនៅលើទីផ្សារបានទេ។ និយាយឲ្យស្រួលស្តាប់ ចំណូលជាដង្ហើមអុកស៊ីហ្សែនរបស់ក្រុមហ៊ុន។
ប៉ុន្តែរឿងសំខាន់មួយដែលអ្នកត្រូវយកមកពិចារណានោះគឺថា តើដៃគូជំនួញរបស់អ្នកជានរណា? មិនចំពោះថា បុគ្គលិក នៅក្នុងក្រុមហ៊ុន អ្នកផ្គត់ផ្គង់ អ្នកលក់ អ្នកចែកចាយ មនុស្សនៅក្នុងសហគមន៍របស់អ្នក ធនាគារ អាជ្ញាធរផ្សេងៗដែលទទួលខុសត្រូវលើផ្នែកច្បាប់បង្កើតក្រុមហ៊ុន ពន្ធអាករ ជាដើម គឺបុគ្គលទាំងនេះសុទ្ធតែមានប្រយោជន៍ដោយផ្ទាល់ និងមិនផ្ទាល់ចេញពីអាជីវកម្មរបស់អ្នក។
នៅពេលអ្នកសិក្សាលើជំនាញអាជីវកម្ម អ្នកនឹងយល់ថា ដៃគូភាគហ៊ុនសំខាន់បំផុតរបស់អ្នកគ្មានអ្នកណាក្រៅតែពីដៃគូវិនិយោគ (Investor) ដែលបោះទុនជាប្រាក់ ឬជាចំណេះដឹងចូល ភាគហ៊ុនរកស៊ី ជាមួយអ្នកនោះឡើយ។ មានសហគ្រិនច្រើនណាស់ដែលជឿជាក់ថា ដៃគូវិនិយោគគឺជាមនុស្សសំខាន់នៅក្នុងក្រុមហ៊ុន ហេតុដូច្នេះហើយនៅពេលអ្នកដាក់ចេញយុទ្ធសាស្ត្ររកស៊ី ភារកិច្ចសំខាន់របស់អ្នកនោះគឺប្រាកដណាស់ថា ត្រូវតែធ្វើឲ្យតម្លៃរបស់ដៃគូភាគហ៊ុនទាំងនោះមានការកើនឡើង (ប្រាក់ចំណេញ)។
ចំណុចដំបូង និងសំខាន់បំផុតនោះគឺថា ប្រាក់ចំណេញគឺជារឿងចាំបាច់ដែលត្រូវតែមាននៅក្នុងគោលដៅក្រុមហ៊ុនរបស់អ្នក។ ជាថ្មីម្តងទៀតអាចនិយាយបានថា លុះត្រាតែមានអុកស៊ីហ្សែន ទើបមានចំហេះភ្លើង។ ប្រាក់ចំណេញកើតចេញពីការបង្កើតប្រាក់ចំណូលមួយដែលគ្រប់គ្រាន់សម្រាប់ទូទាត់លើការចំណាយនានា ហើយសង្ឃឹមថា នឹងអាចមានលទ្ធភាពវិនិយោគបន្ថែមទៀតលើអាជីវកម្មរបស់អ្នកនៅពេលវាលូតលាស់ទៅមុខ។ ហេតុដូច្នេះហើយយុទ្ធសាស្រ្តរបស់អ្នកគួរតែដាក់បញ្ចូលនូវគោលដៅចំនួន២ គឺទី១) ការបង្កើនប្រាក់ចំណូលបន្ថែម និងទី២) ត្រូវកាត់បន្ថយចំណាយ។
ច្រកផ្លូវមួយដែលអាចឲ្យគោលដៅរបស់អ្នកខាងលើអាចទៅរួច គឺទាមទារឲ្យអ្នកមានភាពច្នៃប្រឌិត និងត្រូវមានសមត្ថភាពជាអ្នកដឹកនាំដ៏ប៉ិនប្រសព្វមួយរូបដើម្បីទទួលខុសត្រូវលើអនាគតអាជីវកម្មរបស់អ្នក។ ជាឧទាហរណ៍ ការបង្កើនប្រាក់ចំណូលបន្ថែម មានន័យថា អ្នកត្រូវតែធ្វើឲ្យកាន់តែប្រសើរឡើងដល់ការផ្តល់សេវាកម្មដល់អតិថិជនដែល អាចជួយលើកកម្ពស់ និងលើកទឹកចិត្តដល់អតិថិជនឲ្យត្រឡប់មកគាំទ្រសេវាកម្មរបស់អ្នកវិញ។ ជាទូទៅវាមិនតម្រូវឲ្យអ្នកត្រូវចាយប្រាក់ច្រើននោះឡើយដើម្បីផ្តល់ទំនុកចិត្តឡើងវិញពីអតិថិជន ដែលវាប្រសើរជាងការព្យាយាមយកចិត្តយកថ្លើមប្រើវិធីសាស្ត្រផ្សេងៗទៀតដើម្បីចាប់យកអតិថិជនថ្មីៗមកជំនួសអតិថិជនចាស់ៗ។
ចំណុចមួយទៀតទាក់ទងទៅនឹងការកាត់បន្ថយការចំណាយក៏អាចជួយរំដោះអ្នកបានខ្លះផងដែរ។ មានសហគ្រិនច្រើនណាស់ដែលយកវិធីសាស្ត្រកាត់បន្ថយបុគ្គលិក ឬ កាត់បន្ថយការនាំចូលសេវាកម្មផ្សេងៗសម្រាប់ប្រើប្រាស់នៅក្នុងក្រុមហ៊ុន។ ចំណុចនេះវាអាចជួយកាត់បន្ថយការចំណាយរបស់អ្នកក៏ពិតមែន ក៏ប៉ុន្តែយូរៗទៅវានឹងក្លាយជារឿងមួយឈឺក្បាលសម្រាប់អ្នកត្បិតអីអ្នកត្រូវការសេវាកម្មថ្មី បុគ្គលិកថ្មី ឧបករណ៍ថ្មី សម្រាប់យកមកពង្រីកជំនួញដើម្បីប្រកួតប្រជែងនៅលើទីផ្សារ។
ក្បួនសំខាន់បំផុតមួយដែលសហគ្រិនគ្រប់រូបត្រូវដឹងនៅទីនេះ គឺដាក់គោលដៅថា ប្រាក់ចំណូលនៅខាងមុខគេ បន្ទាប់មកយុទ្ធសាស្ត្រជាចំណុចស្នួលសំខាន់បំផុតមួយ។ គោលដៅនីមួយៗរបស់អ្នកគួរតែឆ្លើយតបទៅនឹងសំនួរនេះគឺថា "តើយុទ្ធសាស្ត្រនេះអាចជួយឲ្យខ្ញុំបង្កើតប្រាក់ចំណូលបានកាន់តែច្រើនឲ្យក្រុមហ៊ុនដែរឬទេ?” ប្រសិនបើវាមិនអាចទេ អ្នកមិនត្រូវទម្លាក់ចោលគោលដៅនោះចោលឡើយ ហើយសាកឆ្លើយទៅនឹងសំនួរមួយទៀតថា " តើគោលដៅនេះអាចជួយខ្ញុំបង្កើនតម្លៃដៃគូភាគហ៊ុនដោយរបៀបណា?”
សរុបមកវិញ កិច្ចពិភាក្សាលើប្រធានបទនេះ គឺមានគោលបំណងចង់ឲ្យសហគ្រិនមានតុល្យភាពនៅក្នុងអាជីវកម្មរបស់ខ្លួន និងមានមហិច្ឆតាដើម្បីរកលុយដែលជាក្បួនសំខាន់បំផុតមួយនៅក្នុងអាជីវកម្ម៕
ប្រភព៖ entrepreneur
