តិចនិក ៤ សំខាន់សម្រាប់អ្នកដែលចង់ផ្សារភ្ជាប់ជីវិតក្នុងអាជីវកម្ម
ការកសាងជីវិតមួយដែលយកមុខជំនួញ ឬអាជីវកម្មមកធ្វើជាមុខរបរចិញ្ចឹមជីវិត ពិតជារឿងមួយមិនងាយស្រួលនោះឡើយ។ តើមានមនុស្សប៉ុន្មានអ្នកក្នុងចំណោម ១០នាក់ដែលជោគជ័យក្នុងអាជីវកម្ម? ចម្លើយគឺមនុស្សប្រហែល ៨ នាក់បានបរាជ័យ ខណៈដែលអ្នកជោគជ័យអាចមានត្រឹមតែ ២ នាក់ប៉ុណ្ណោះ។ នេះក៏ដោយសារតែនៅពីក្រោយអាជីវកម្ម វាមានរឿងរ៉ាវ និងមូលហេតុជាច្រើនបានកើតមានឡើងដែលមានតែអ្នកធ្វើអាជីវកម្មតែប៉ុណ្ណោះដែលដឹងច្បាស់ជាងគេថា តើវាជាអ្វី?
យ៉ាងណាមិញ ប្រសិនបើអ្នកជោគជ័យ ជីវិតអាជីវកម្មផ្តល់គុណសម្បត្តិយ៉ាងច្រើនដល់អ្នក ដែលនោះគឺចំណេះដឹង បទពិសោធន៍ និងជាពិសេសប្រាក់ចំណូលយ៉ាងច្រើនត្រឡប់មកវិញ។ តើអ្នកហ៊ានសាកល្បងទេ? ប្រសិនបើអ្នកក្លាហាន ចង់ប្រឡូកក្នុងជីវិតមួយដែលយកអាជីវកម្មជាឆ្នាំងបាយ អ្នកមិនគួរភ្លេចយុទ្ធសាស្ត្រ ៤ខាងក្រោមនេះ៖
១. មានចក្ខុវិស័យច្បាស់លាស់ពីអាជីវកម្មរបស់អ្នក
ទៅកន្លែងណាក៏ដោយ អ្នកត្រូវដឹងថា អ្នកកំពុងចង់ទៅណាឲ្យប្រាកដ។ អ្នកអាចរកលុយតាមអនឡាញបាន ប៉ុន្តែនេះមិនមែនមានន័យថា អ្នកមានអាជីវកម្មផ្ទាល់ខ្លួននោះឡើយ។ ដើម្បីកសាងអាជីវកម្មប្រកបដោយភាពជោគជ័យមួយ អ្នកត្រូវមើលសម្លឹងឲ្យបានវែងឆ្ងាយពីមូលហេតុ និងគោលបំណងដែលអ្នកចង់ធ្វើអាជីវកម្ម។ អ្នកត្រូវយល់ថា តើអ្នកណាខ្លះដែលអ្នកអាចជួយបាន? ហើយថាតើអ្នកអាចជួយអ្នកទាំងនោះបានអ្វីខ្លះ? សាររបស់អ្នក វាមិនអាចជួយមនុស្សគ្រប់គ្នាបានទេ ប៉ុន្តែនេះមិនមែនជាបញ្ហានោះឡើយ។ បើទោះបីជាវិធីកសាងជីវិតផ្សារភ្ជាប់ទៅនឹងមុខជំនួញ វាមិនមែនជារឿងងាយស្រួលក៏ដោយ ប្រសិនបើអ្នកមានចក្ខុវិស័យមួយវែងឆ្ងាយ និងច្បាស់លាស់ អ្នកពិតជាអាចធ្វើបាន។ ប្រសិនបើអ្នកនៅមានភាពស្រពិចស្រពិល អ្នកត្រូវចំណាយពេលបង្កើតវាឡើង និងរៀបចំគម្រោងចេញធ្វើអាជីវកម្ម។
២. កសាងមូលដ្ឋានគ្រឹះអាជីវកម្មខ្លួនឯង
មូលដ្ឋាននៃជីវិតអាជីវកម្មរបស់អ្នកចាប់ផ្តើមឡើងពីរចនាសម្ព័ន្ធអាជីវកម្ម។ អ្នកត្រូវសម្រេចចិត្តថា អ្នកត្រូវកសាងមូលដ្ឋានគ្រឹះនៃអាជីវកម្មមួយចេញពីខ្លួនឯង ហើយការកសាងមូលដ្ឋានគ្រឹះនោះគឺត្រូវពឹងអាស្រ័យលើហេតុផលមួយគឺថា តើអ្នកចង់ទៅណា? មិនមែនពឹងលើទិដ្ឋភាពជាក់ស្តែងនៅពេលបច្ចុប្បន្ននេះឡើយ។ មូលដ្ឋានគ្រឹះនេះគឺត្រូវធ្វើវាឲ្យសកម្មផងដែរនៅលើបណ្តាញអនឡាញដូចជា បង្កើតគេហទំព័រក្រុមហ៊ុនផ្ទាល់ខ្លួន បង្កើតបណ្តាញសង្គម បង្កើតអ៊ីមែលក្រុមហ៊ុន និងបង្កើតបណ្តាញផ្សព្វផ្សាយទាំងនៅអនឡាញ និងមិនអនឡាញជាដើម។ នៅក្នុងជីវិតអាជីវកម្ម អ្នកត្រូវការមូលដ្ឋានគ្រឹះដ៏រឹងមាំមួយដើម្បីត្រៀមខ្លួនឲ្យបានគ្រប់គ្រាន់ចូលទៅប្រឡូកនៅលើទីផ្សារ។
៣. បង្កើនការយល់ដឹងដល់អតិថិជនថា មនុស្សគ្រប់គ្នាមិនមែនសុទ្ធតែអតិថិជនរបស់អ្នកឡើយ
មានមនុស្សច្រើនណាស់បានប្រើប្រាស់បណ្ដាញសង្គម និងប្រព័ន្ធអ៊ីនធឺណិតនៅលើ ពិភពលោកនៅពេលបច្ចុប្បន្ននេះ។ ដើម្បីឲ្យអតិថិជនស្គាល់អាជីវកម្មរបស់អ្នកកាន់តែច្បាស់ អ្នកនឹងត្រូវការផ្សព្វផ្សាយនៅតាមបណ្ដាញព័ត៌មាន បណ្ដាញសង្គម ចែកខិត្តប័ណ្ណ បង្កើតបណ្ដាញទីផ្សារជាដើម។ ប៉ុន្តែអ្នកមិនត្រូវធ្វើឲ្យអតិថិជនភ័ន្តច្រឡំពីអាជីវកម្មរបស់អ្នកនោះឡើយ។ អ្នកត្រូវចងចាំថា គោលដៅអាជីវកម្មរបស់អ្នកមិនមែនសម្រាប់មនុស្សគ្រប់គ្នានោះឡើយ ហើយមានមនុស្សមួយក្រុមដែលនឹងប្រើប្រាស់សេវាកម្ម ឬផលិតផលរបស់អ្នក។ ដូចនេះ អ្នកត្រូវប្រាកដថា តើអ្នកគួរពង្រីកការយល់ដឹងនៃអាជីវកម្មរបស់អ្នកទៅអ្នកណាខ្លះ? នៅកន្លែងណា?
៤. បង្កើតប្រភពចំណូលឲ្យបានច្រើនដែលនឹងធ្វើឲ្យ អ្នកមានសេរីភាពហិរញ្ញវត្ថុ
វិធីដ៏ល្អបំផុតមួយនៅក្នុងចំណោមវិធីផ្សេងទៀតដើម្បីធ្វើឲ្យជីវិតរបស់អ្នកមានសុវត្ថិភាពហិរញ្ញវត្ថុនោះ គឺការរៀបចំ និងកសាងប្រភពចំណូលចេញពីអាជីវកម្មរបស់អ្នកឲ្យបានច្រើនបំផុតតាមដែលអាចធ្វើបាន។ នៅក្នុងពិភពអាជីវកម្មអ្នកអាចបង្កើតប្រភពចំណូលបានលើស ២០ នៅក្នុងពេលដំណើរគ្នានេះដែលមានទាំងនៅលើអនឡាញ និងដោយផ្ទាល់ក្តី។ ការលក់ផលិតផល និងសេវាកម្មតាមវិធីសាស្ត្រជាច្រើន នឹងជួយបង្កើនប្រាក់ចំណូលរបស់អ្នក ហើយវានឹងអាចជួយការពារហានិភ័យផ្សេងៗដែលនឹងកើតមានឡើងចំពោះអាជីវកម្មផ្សេងទៀតដែលនឹងអាចដួលរលំ។
តាមពិតទៅ ដើម្បីទាក់ទាញអតិថិជនមកទិញផលិតផល ឬសេវាកម្មរបស់អ្នក អ្នកអាចមានវិធីច្រើនយ៉ាងណាស់ ហើយអ្វីដែលសំខាន់គឺត្រូវកសាងកេរ្តិ៍ឈ្មោះអាជីវកម្មរបស់អ្នកឲ្យកាន់តែល្បីល្បាញជាមុនសិន។ នៅពេលអ្នកមានកេរ្តិ៍ឈ្មោះល្អហើយនោះ ការគាំទ្រនឹងមានការកើនឡើង ហើយប្រាក់ចំណូលនឹងហូរចូលទៅតាមនោះដែរ។ ជីវិតអាជីវកម្មគឺមានភាពស្មុគស្មាញណាស់ ប៉ុន្តែផ្លែផ្ការបស់វា គឺនឹងធ្វើឲ្យអ្នកក្លាយជាអ្នកមានប្រសិនបើអ្នកបានជោគជ័យ ហើយនោះគឺជាជីវិតមួយដែលមានសេរីភាពហិរញ្ញវត្ថុបំផុត៕
ប្រភព៖ Entrepreneur
