តើការងារដែលមានផលិតផល (Being Productive) និងការមមាញឹកនឹងការងារ (Being Busy) ខុសគ្នាដូចម្តេច?
តើការងារដែលមានផលិតផល (Being Productive) និងការមមាញឹកនឹងការងារ (Being Busy) ខុសគ្នាដូចម្តេច? នេះជាសំនួរមួយដែលត្រូវបានចោទសួរឡើងសម្រាប់ប្រិយមិត្តដើម្បីយកទៅពិចារណាពីសកម្មភាពការងារប្រចាំថ្ងៃរបស់អ្នកថា តើការងារដែលអ្នកដកខ្លួនទំនេរមិនរួចមានផលិតផលឬអត់? ទាក់ទិននឹងសំនួរនេះ វាគ្មិនអាមេរិកលោក Brian Tracy បានពន្យល់ពីចំណុចខុសគ្នាមួយចំនួនពាក់ព័ន្ធទៅនឹងនិយមន័យលើប្រធានបទនេះ។
យោងតាមការលើកឡើងរបស់លោក Tracy ភាពខុសគ្នារវាងការងារដែលមានផលិតផល (Being Productive) និងភាពមមាញឹកនឹងការងារ (Being Busy) គឺមានលក្ខណៈប្លែកគ្នាខ្លាំង។ នៅក្នុងនិយមន័យរបស់ Tracy ពាក្យ "រវល់ ឬ Busy" មានន័យថា ខ្លួនអ្នកពោរពេញទៅដោយការងារធ្វើគ្មានពេលទំនេរ ខណៈដែលពាក្យ "ផលិតភាព ឬ Productive" មានន័យថា អ្នកធ្វើការផ្ដោតទៅរកគោលដៅមួយ ឬធ្វើការងារមួយស្របតាមគោលបំណងច្បាស់លាស់។
លោក Tracy គាំទ្រការដល់អះអាងនេះដោយលោកបានដាក់ចេញនូវជំហានមួយចំនួនដែលអ្នកអាចអនុវត្តបានដើម្បីប្រាកដថា ការងាររបស់អ្នកពិតជាទទួលបានផលិតផលខ្ពស់៖
១. កាលណាអ្នកសម្រេចបានសមិទ្ធផលបានកាន់តែច្រើន នោះអ្នកនឹងមានអារម្មណ៍កាន់តែល្អប្រសើរឡើង។ លោក Tracy បានសង្កត់ធ្ងន់ថាជំនួសឲ្យការព្រួយបារម្ភអំពីកិច្ចការធំឬតូច អ្នកត្រូវចិញ្ចឹមចិត្តធ្វើការងារនោះឲ្យបានសម្រេច និងដល់ទីបញ្ចប់។ លោកបានបន្តថា រាល់ពេលដែលអ្នកបានដាក់ការងារណាមួយនៅក្នុងបញ្ជីរបស់អ្នកសម្រាប់ធ្វើ អ្នកត្រូវធ្វើឲ្យខួរក្បាលរបស់អ្នកផ្ចិតផ្ចង់ផ្ដោតលើការងារនោះ រហូតដល់ទទួលបានលទ្ធផលដូចអ្វីដែលអ្នកចង់បាន។
២. នៅពេលអ្នកសម្លឹងឃើញអ្វីមួយនៅពេលខាងមុខ អ្នកនឹងមានអារម្មណ៍រំភើបខ្លាំងជាងមុនរហូតដល់ចង់ស្ទុះងើបពីលើគ្រែដើម្បីធ្វើវាភ្លាមៗតែម្តង។ លើសពីនេះទៅទៀត នៅពេលដែលអ្នកមានគោលដៅរឹងមាំដើម្បីធ្វើនៅពេលខាងមុខ អ្នកនឹងមានអារម្មណ៍ប្រកៀកប្រកើយខិតកាន់តែជិតទៅរកគោលដៅនោះជាងមុន និងត្រៀមខ្លួនដើម្បីទទួលយកសមិទ្ធផលនោះ។
៣. ជម្រុះចោលការងាររញ៉េរញ៉ៃនៅក្នុងជីវិតរបស់អ្នក៖ នៅពេលដែលជីវិតអ្នកពោរពេញទៅដោយការងាររញ៉េរញ៉ៃ កំប៉ិកកំប៉ុក គ្មានបានប្រយោជន៍ច្រើនពេក បន្ទាប់មកបញ្ហាតានតឹងក្នុងអារម្មណ៍ (Stress) វានឹងកើតឡើងដោយឯកឯងតែម្តង។
៤. ហាត់ប្រាណ៖ ការហាត់ប្រាណ នឹងធ្វើឲ្យសុខភាពរបស់អ្នករឹងមាំ និងអាចរំញោចអារម្មណ៍របស់អ្នកកាន់តែស្វាហាប់ឡើង។
៥. រកអ្វីដែលត្រូវធ្វើគ្រប់ពេលវេលា៖ នៅពេលអ្នកចំណាយពេលវេលាទាំងអស់លើគម្រោងការងារ ឬភារកិច្ចមួយចំនួនអ្នកទំនងជាមិនអាចអនុញ្ញាតឲ្យគំនិតរបស់អ្នកបើកចំហកាន់តែធំជាងមុន និងមិនអាចដោះស្រាយគំនិតអវិជ្ជមានបានទាំងស្រុងនោះទេ។
៦. គោលបំណង៖ ដូចអ្វីដែលលោក Tracy បានលើកឡើង កូនសោដ៏សំខាន់ដើម្បីកំណត់ថា អ្នកជាមនុស្សមានផលិតផល (Being Productive) ឬជាមនុស្សត្រឹមតែរវល់ជានិច្ច (Being Busy) គឺអាស្រ័យថា តើការងារដែលអ្នកកំពុងធ្វើ មានគោលបំណងមួយច្បាស់លាស់ឬយ៉ាងណា?
ប្រភព៖ Entrepreneur
