ហេតុចំនួន ៨ បញ្ជាក់ថា ហេតុអ្វីបានជាអ្នកមិនអាចសម្រេចគោលដៅបាន?
ពីមួយឆ្នាំទៅមួយឆ្នាំ អ្នកចេះតែស្រមៃថាសម្រេចបានគោលដៅនេះគោលដៅនោះ ប៉ុន្តែគ្មានគោលដៅណាមួយអ្នកសម្រេចបានតាមអ្វីដែលអ្នកប៉ងនោះឡើយ។ វាបន្តបរាជ័យជាបន្តបន្ទាប់ ហើយបន្ទាប់មកអ្នកចេះតែមានអារម្មណ៍ធុញថប់ ខកចិត្ត អស់សង្ឃឹម រហូតដល់បញ្ហាទាំងនេះវាបានក្លាយជាទម្លាប់ដ៏គួរឲ្យស្អប់ខ្ពើមរបស់អ្នក។ តើអ្នកមានបានត្រួតពិនិត្យឡើងវិញទេថា តើអ្វីទៅ ជាឧបសគ្គមិនឲ្យសម្រេចគោលដៅនេះបាន? ចំណុចខាងក្រោមនេះ អាចបង្ហាញមូលហេតុមួយចំនួនដែលធ្វើឲ្យអ្នកមិនអាចសម្រេចគោលដៅបាន។ តើមានចំណុចណាខ្លះដែលអ្នកកំពុងតែជួប?
១.ខ្លួនគ្មានលំនឹងច្បាស់លាស់
អ្នកសប្បាយចិត្តនឹងគោលដៅរបស់អ្នក តែក្រោយមកអ្នកបានរេចិត្តងាកទៅធ្វើអ្វីផ្សេងដែលនៅទីបំផុតអ្នកមិនបានបញ្ចប់វាតាមការគ្រោងទុក។ គោលដៅចាស់មិនបានបញ្ចប់ ហើយគោលដៅថ្មីក៏មិនជោគជ័យ ជាលទ្ធផលអ្នកបរាជ័យទាំងអស់។
២.មិនបានចងក្រងផែនការដែលត្រូវធ្វើ
ពេញមួយឆ្នាំអ្នកចង់បានផ្ទះធំដោយមិនបានសង់គ្រឹះដ៏រឹងមាំ តើវាអាចទៅរួចទេ? ចម្លើយគឺមិនអាចឡើយ។ ចង់សម្រេចគោលដៅក្នុងឆ្នាំថ្មីឆ្នាំ ២០១៩ ខាងមុខ អ្នកត្រូវរៀបផែនការមួយឡើងថា អ្នកចង់បានអ្វី? ត្រូវធ្វើអ្វីខ្លះ? ប្រើពេលប៉ុន្មាន? និងលម្អិតពីចំណុចផ្សេងៗដែលត្រូវធ្វើដើម្បីសម្រេចគោលដៅនោះ។
៣.ខ្វះឆន្ទ មហិច្ឆតាតូច
គោលដៅរបស់អ្នកធំកម្រិតណា? សូមចាំថា បើគោលដៅរបស់អ្នកធំ អ្នកធ្វើតិច លទ្ធផលគឺបរាជ័យ។ នេះទាមទារឲ្យអ្នកមានមហិច្ឆតាធំ ការប្ដេជ្ញាចិត្តធំ និងប្រឹងប្រែងឲ្យខ្លាំងបំផុត ពោលគឺថា អ្នកត្រូវធ្វើឲ្យវាមានតុល្យភាពរវាងអ្វីដែលអ្នកចង់បាន និងអ្វីដែលអ្នកត្រូវធ្វើ។
៤.ខ្វះភាពជឿជាក់លើគោលដៅរបស់ខ្លួន
អ្នកទំនងដាក់គោលដៅថា អ្នកនឹងរកលុយឲ្យបាន ១ម៉ឺនដុល្លារក្នុងរយៈពេល ២ ខែ ឬ ចង់រកស៊ីនៅឆ្នាំក្រោយជាដើម។ ប៉ុន្តែវាត្រូវបានដុតបំផ្លាញដោយសារតែសម្ដីអវិជ្ជមានរបស់មនុស្សជុំវិញខ្លួន ហើយនៅទីបំផុតអ្នកក៏បោះបង់វាចោលទៅ។ ខ្វះជំនឿជឿជាក់លើគោលដៅខ្លួនឯងដោយអនុញ្ញាតឲ្យអ្នកដទៃមកកំណត់ អ្នកនឹងគ្មានថ្ងៃស្គាល់សេចក្តីសុខលើភាពជោគជ័យពីគោលដៅរបស់ខ្លួនឡើយ។
៥.ទំនាក់ទំនងនៅមានកម្រិត
បើអ្នកមិនបានស្វែងរកដៃគូទំនាក់ទំនងឲ្យបានត្រឹមត្រូវទេនោះ គោលដៅរបស់អ្នកក៏មិនងាយជោគជ័យដែរ។ទំនាក់ទំនងមានឥទ្ធិពលដល់ភាពជោគជ័យ។ រាប់អានអ្នកជោគជ័យ អ្នកនឹងជោគជ័យដែរ។ ចង់ឲ្យគោលដៅជោគជ័យ អ្នកគួរស្វែងរកអ្នកណាដែលអាចពិភាក្សាពីគោលដៅរបស់អ្នកបាន និងជួយជ្រោមជ្រែងផ្តល់ប្រឹក្សាឲ្យអ្នកនៅពេលអ្នកពឹងពាក់។
៦.មិនចូលចិត្តការរិះគន់របស់អ្នកដទៃ
គ្រប់ការរិះគន់របស់អ្នកដទៃមិនមែនសុទ្ធតែមិនល្អទាំងអស់នោះទេ។ មនុស្សមួយចំនួនមានចេតនាចង់កែលំអអ្នកឲ្យកាន់តែ ប្រសើរជាងមុន។ ប៉ុន្តែបើអ្នកយល់ថា ការរិះគន់ទាំងនោះគ្មានតម្លៃ វានឹងក្លាយជាឧបសគ្គមួយទៀតដល់សម្រេចគោលដៅរបស់អ្នក។
៧.មានទម្លាប់ធ្វើការងារដដែលៗ
ទម្លាប់មានឥទ្ធិពលដល់ខ្លាំងណាស់ដល់ភាពជោគជ័យរបស់អ្នក។ នៅពេលអ្នកមានគោលដៅត្រូវធ្វើ អ្នកត្រូវដឹងថា អ្នកត្រូវតែផ្លាស់ប្ដូរសកម្មភាពជាច្រើនរបស់អ្នក ។ ទម្លាប់ចាស់ៗមិនល្អពី មុនមក អ្នកត្រូវជម្រុះចោល។ គោលដៅថ្មី ទាមទារសកម្មភាពថ្មី ទើបអាចសម្រេចបានជោគជ័យថ្មី។
៨.មិនរៀនធ្វើការងារជាក្រុមឲ្យបានច្រើន
ការធ្វើការងារជាក្រុមពិតជាមានសារសំខាន់ខ្លាំងណាស់ដើម្បីប្រមែប្រមូលគំនិតថ្មីៗ។ ការងារជាក្រុមអាចធ្វើឲ្យអ្នកដើរកាន់តែបានឆ្ងាយ និងអាចដោះស្រាយបានបញ្ហាយ៉ាងមានប្រសិទ្ធភាពជាជាងគំនិតអ្នកតែម្នាក់ឯង។ បើអ្នកមិនចូលចិត្តធ្វើការបែបនេះទេ គោលដៅផ្សេងៗរបស់អ្នកនឹងពិបាកសម្រេចបានណាស់៕
ប្រភព៖ entrepreneur
