អ្នកដែលចង់បើកអាជីវកម្មលើកដំបូង សូមអានសារនេះជាមុនសិន
អ្នកធ្លាប់បានដឹងជារឿយៗហើយថា ចង់ធ្វើជាសហគ្រិនម្នាក់ វាមិនមែនជាមុខរបរមួយដែលសុទ្ធតែផ្តល់កាដូដ៏គាប់ចិត្តសម្រាប់មនុស្សគ្រប់គ្នានោះឡើយ។ វាជាការងារមួយដែលពោរពេញទៅដោយភាពផ្អែមល្ហែមនៅពេលជោគជ័យ ហើយក៏ពោរពេញទៅដោយភាពល្វីងជូរចត់យំមិនចេញដែរនៅពេលវាបរាជ័យ។ មានដំណាក់កាលជាច្រើនណាស់ដែលសហគ្រិនម្នាក់ៗត្រូវឆ្លងកាត់មុនអាចសម្រេចភាពជោគជ័យរបស់ខ្លួនបាន។
យ៉ាងណាមិញ បន្ទាប់ពីអ្នកបានវិភាគលើសមត្ថភាពរបស់អ្នក គោលដៅ និងអ្វីដែលអ្នកចង់ធ្វើពិតប្រាកដនៅក្នុងជីវិតរបស់អ្នករួចហើយថា អ្នកនឹងចាប់ផ្តើមជំនួញនោះ បន្ទាប់មកនៅមានមេរៀនមួយចំនួនទៀតដែលអ្នកត្រូវសិក្សារៀនសូត្រនៅមុនពេលចូលប្រឡូកក្នុងពិភពអាជីវកម្ម។
១.ការអនុវត្តជាក់ស្តែងលើរឿងលុយកាក់
ចំណុចដំបូង និងអ្វីដែលសំខាន់បំផុតសម្រាប់សហគ្រិនថ្មីថ្មោងគួរចងចាំនោះ គឺទាក់ទងនឹងការអនុវត្តជាក់ស្តែងពីការគ្រប់គ្រងលុយកាក់។ វាបានក្លាយជាកំហុសទូទៅមួយដែលសហគ្រិនភាគច្រើនបានធ្វើនៅពេលមានចរន្តសាច់ប្រាក់ចេញចូល និងការគ្រប់គ្រងប្រាក់ចំណេញ។ ជំនួសឲ្យការផ្ដោតទៅលើស្ថានភាពជាក់ស្តែងកំពុងកើតមាន និងតម្រូវការហិរញ្ញវត្ថុដែលជួយក្នុងការកសាងក្រុមហ៊ុន សហគ្រិនថ្មីថ្មោងតែងតែខ្វាយខ្វល់គិតគូរអំពីអនាគតដូចជារបៀបរកចំណូលមកវិញនៅថ្ងៃខាងមុខដែលចំណុចនេះវាមិនមានប្រសិទ្ធភាពទាំងស្រុងនោះឡើយ។ មានផែនការគឺជារឿងល្អ ប៉ុន្តែការផ្ដោតអារម្មណ៍យកចិត្តទុកដាក់លើការងារជាក់ស្តែងរបស់អ្នក គឺមានសារៈសំខាន់ខ្លាំងណាស់ហើយអ្នកត្រូវតែឈរជើងឲ្យរឹងមាំលើបច្ចុប្បន្នភាពរបស់អ្នកដោយកុំគិតរឿងអនាគតច្រើនពេក។ អ្នកត្រូវប្រាកដថា លុយរបស់អ្នកនៅមានដង្ហើមជានិច្ច ដោយសាកសួរដោយខ្លួនឯងថា តើអ្នកត្រូវការលុយប៉ុន្មានដើម្បីឲ្យអាជីវកម្មអាចរស់បន្តទៅមុខទៀត? តើអ្នកអាចប្រើលុយនៅក្នុងចំនួនដូចគ្នានេះបានប៉ុន្មានខែ ប៉ុន្មានឆ្នាំទៅមុខទៀត? នេះជាបញ្ហាដ៏ធំមួយសម្រាប់សហគ្រិនគ្រប់រូបជួបប្រទះនៅពេលចាប់ផ្តើមបើកជំនួញនៅលើកដំបូង។ ដូច្នេះហើយអ្នកត្រូវច្បាស់លើចំណុចនេះដើម្បីជៀសវាងបញ្ហាខ្វះលុយនៅមុនពេលចាប់ផ្តើមអាជីវកម្ម។ តាមការសិក្សាស្រាវជ្រាវកន្លងមក សហគ្រិនថ្មីថ្មោងភាគច្រើនស្ថិតនៅក្នុងស្ថានភាព ២ ប្រភេទខាងក្រោមនេះនៅពេលចាប់ផ្តើមអាជីវកម្ម៖
ប្រភេទទី១៖សហគ្រិនវ័យក្មេងភាគច្រើនមិនមានលុយគ្រប់គ្រាន់សម្រាប់បើកអាជីវកម្ម ហើយក៏មិនបានធ្វើការប្រមែប្រមូលឬ កៀងគរដើមទុនឲ្យបានច្រើនពីអ្នកផ្សេងដែរ។ លុយដែលសម្រាប់ត្រៀមចំណាយ ពេលប្រតិបត្តិការអាជីវកម្មរបស់សហគ្រិនដំបូងៗ គឺភាគច្រើនអាចរស់បានដល់ ៦ ខែប៉ុណ្ណោះ ហើយក្រៅពីនោះពួកគេចាំដេកស្រមៃថា គោលដៅរបស់ខ្លួននឹងបានសម្រេចដូចបំណង។ ទន្ទឹមនឹងនេះនៅពេលដែលពួកគេកំពុងស្រមៃបែបនេះ ក្រោយមកពួកគេក៏ដឹងថា ខ្លួននឹងទទួលរងការវាយសំពងយ៉ាងដំណំមួយនោះគឺ អស់លុយ។
ប្រភេទទី២៖ក្រៅពីសហគ្រិនភាគច្រើនខាងលើ នៅមានសហគ្រិនក្មេងខ្ចីមួយចំនួនតូចផ្សេងទៀតដែលទទួលបានទុនឧបត្ថម្ភយ៉ាងល្អហើយពួកគេហាក់មិនសូវខិតខំប្រឹងប្រែង ឬ ខ្វាយខ្វល់ច្រើនរឿងបង្កើតប្រាក់ចំណូលនោះឡើយ។ សហគ្រិនមួយក្រុមនេះ យកចិត្តទុកដាក់ខ្លាំងលើគំនិតដែលចន្លោះប្រហោងជាជាងផ្ដោតលើលុយកាក់ដែលខាតបង់ដោយសារតែពួកគេជាក្រុមហ៊ុនមានលុយគ្រប់គ្រាន់សម្រាប់ត្រៀមចាយវាយក្នុងករណីចាំបាច់រួចទៅហើយ។ សហគ្រិនក្រុមនេះច្រើនប្ដេជ្ញាចិត្តក្នុងការស្រោចស្រង់អាជីវកម្មរបស់ពួកគេឡើងវិញនៅជុំទីពីរ ជាជាងផ្តោតលើប្រាក់ចំណូលពេលចាប់ផ្តើមបើកជំនួញដំបូង។ ទោះជាស្ថិតនៅក្នុងស្ថានការណ៍អ្វីក៏ដោយ ការចាប់ផ្តើមផែនការធ្វើអាជីវកម្ម តម្រូវឲ្យមានការត្រៀមហិរញ្ញវត្ថុឲ្យបានគ្រប់គ្រាន់ជាមុនសិន ហើយដំណើរផ្លូវមួយនេះមិនគ្រាន់តែចំណាយពេលវេលារបស់អ្នកប៉ុណ្ណោះទេប៉ុន្តែ វាថែមទាំងអាចបង្ហូរលុយយ៉ាងច្រើនចេញពីហោប៉ៅរបស់អ្នកដោយងាយៗទៀតផង។ វាជាការសំខាន់ណាស់ដែលអ្នកត្រូវយល់ថាអ្នកគួរតែមានភាពរឹងមាំផ្នែកហិរញ្ញវត្ថុដើម្បីទូទាត់ថ្លៃការចំណាយចាំបាច់ដូចជាការផ្គត់ផ្គង់សម្ភារៈ ជួលបុគ្គលិក ឬការចំណាយផ្ទាល់ខ្លួនជាដើម។ ភាពជាក់ស្តែងហិរញ្ញវត្ថុ ធ្វើឲ្យការចំណាយរបស់អ្នកមានប្រសិទ្ធភាពខ្ពស់។
២.ត្រូវដឹងថា ការបង្កើតអាជីវកម្មគឺត្រូវការពេលវេលា និងការប្ដេជ្ញាចិត្តដ៏ធំមួយ
រឿងមួយទៀតដែលសហគ្រិនដំបូងៗគួរចងចាំនោះគឺថា ការឈានជើងចូលប្រឡូកក្នុងអាជីវកម្មគឺទាមទារឲ្យអ្នកចំណាយពេលវេលាច្រើនណាស់ និងប្រឹងប្រែងឲ្យអស់ពីសមត្ថភាពបំផុត។ នេះមានន័យថា អ្នកមិនត្រូវប្រើប្រាស់ពេលវេលារបស់អ្នកដោយឥតប្រយោជន៍ និង ខុសទិសដៅនោះឡើយ។ ពេលវេលាលេងហ្គេម ជួបជុំគ្រួសារ ចូលរួមកម្មវិធីផ្សេងៗ ដើរកម្សាន្ត ក៏នឹងលែងមានច្រើនដូចមុនទៀតដែរ។ អ្នកនឹងក្លាយជាមនុស្សថ្មីដែលទទួលខុសត្រូវលើការងារ និងតាមប្រមាញ់មើលយ៉ាងដិតដល់លើសកម្មភាពអាជីវកម្មរបស់អ្នក ជាជាងផ្ដោតលើអ្វីផ្សេងទៀត។ អ្វីដែលកាន់តែសំខាន់ជាងនេះទៀតនោះគឺការប្តេជ្ញាចិត្តរបស់អ្នកក្នុងការធ្វើឲ្យគោលដៅ និងក្តីសុបិនអាជីវកម្មរបស់អ្នកទទួលបានជោគជ័យ។ នៅក្នុងទិដ្ឋភាពជាក់ស្តែង អ្នកគួរសាកសួរខ្លួនឯងថា តើអាជីវកម្មបែបណាដែលអ្នកចង់បានទៅពេលអនាគត? អ្នកត្រូវចាំថា បើអាជីវកម្មរបស់អ្នកកាន់តែធំ អ្នកត្រូវការពេលវេលាកាន់តែច្រើនឆ្នាំ ប្រើមនុស្សកាន់តែច្រើន មានយុទ្ធសាស្ត្រអាជីវកម្មកាន់តែស្មុគស្មាញ និងការប្តេជ្ញាចិត្តកាន់តែធំជាដើមដើម្បីសម្រេចក្តីប្រាថ្នាមួយនេះ។
៣.សមត្ថភាពរបស់អ្នកមានឥទ្ធិពលដល់អនាគតអាជីវកម្មទាំងមូល
មួយក្នុងចំណោមដំបូន្មានល្អៗជាច្រើនទៀត អ្នកត្រូវដឹងថា នៅក្នុងដំណើរការទាំងមូលនៃអាជីវកម្មមួយ គឺវាទាក់ទងទៅនឹងសមត្ថភាពរបស់អ្នកទៅនឹងការសម្រេចចិត្តផ្សេងៗនៅក្នុងអាជីវកម្ម។ ការសម្រេចចិត្តមិនបានល្អដែលកើតចេញពីភាពអសមត្ថភាពរបស់អ្នកនៅក្នុងអាជីវកម្ម អាចធ្វើឲ្យអ្នកក្លាយទៅជាសហគ្រិនដែលនឹងជួបហានិភ័យ។ សូមក្រឡេកមើលទៅបទពិសោធន៍កន្លងមករបស់សហគ្រិនថ្មីថ្មោងអ្នកនឹងដឹងថា សហគ្រិនភាគច្រើនបានបរាជ័យនៅក្នុងរយៈពេល ១៨ ខែដំបូង។ មូលហេតុសំខាន់នៅទីនេះគឺថា សហគ្រិនទាំងនោះមិនបានដឹងថា សហគ្រិនបានជួបផលលំបាកអ្វីខ្លះនោះទេមុនពេលជោគជ័យនោះ។ គ្មានអ្នកណាម្នាក់អាចធានាបានទេថា អាជីវកម្មរបស់អ្នកនឹងជោគជ័យ ១០០%។ សូមចាំថា ដំណើរផ្លូវនេះជាដំណើរផ្លូវដ៏វែងឆ្ងាយដ៏សែនលំបាក បរាជ័យច្រើន តែវានឹងជោគជ័យនៅពេលអ្នកមិនបោះបង់។ ប៉ុន្តែទោះជោគជ័យ ឬបរាជ័យ ដំណើរផ្លូវមួយនេះសំបូរមេរៀនល្អៗច្រើនណាស់សម្រាប់ជីវិតរបស់អ្នក៕
ប្រភព៖ entrepreneur
