ពេលវេលាសក្ដិសមបំផុតដើម្បីចាប់ផ្ដើមអាជីវកម្ម ពេលបុគ្គលម្នាក់អាចឆ្លើយសំណួរមូលដ្ឋានទាំង ៣នេះ
ស្ថាបនិក និងជានាយកប្រតិបត្ត ក្រុមហ៊ុនជំនាញនៅក្នុងសេវាជ្រើសរើសបុគ្គលិក HIRE RIGHT COMPANY LIMITED លោក វ៉ន សុខេមរិន្ទ បានលើកឡើងថា ការចាប់ផ្ដើមក្នុងការធ្វើអាជីវកម្មមួយគឺមិនអាចកំណត់ទេបានថាតើយើងគួរចាប់ផ្ដើមត្រឹមវ័យប៉ុណ្ណាទើបសមស្របនោះ ប៉ុន្តែវានឹងក្លាយជាពេលវេលាល្អសម្រាប់មនុស្សម្នាក់ក្នុងការចាប់ផ្ដើមអាជីវកម្មនៅពេលដែលគេអាចឆ្លើយរួចនូវសំណួរមូលដ្ឋានចំនួន៣។
សំណួរទីមួយ គឺតើអ្វីដែលជាកត្តាជម្រុញឱ្យគាត់ចាប់យកអាជីវកម្មនេះ?៖ ជាទូទៅ មានកត្តាពីរដែលគាត់ត្រូវសិក្សាស្វែងយល់ពីខ្លួនឯងសិន មុននឹងគាត់សម្រេចចិត្តចាប់យកអាជីវកម្មណាមួយ។ ទីមួយ គឺកត្តាលើកទឹកចិត្តពីខាងក្រៅដែលយើងហៅថា (Motivations)។ ចំណុចនេះ លោក ខេមរិន្ទ បានលើកឡើងថា ប្រសិនបើគាត់បើកអាជីវកម្មមួយគ្រាន់តែដោយសារការលើកទឹកចិត្តពីខាងក្រៅ ការមិនចង់ធ្វើការឲ្យគេ គេបបួលធ្វើក៏ធ្វើតាមគេ ឬគ្រាន់តែចង់ឲ្យគេហៅខ្លួនថាជាសហគ្រិន លោកគិតថា ដំណើរការអាជីវកម្មនោះ នឹងមិនល្អនោះឡើយ។ កត្តាទីពីរ គឺជាចំណង់ចំណូលចិត្តដែលកើតចេញពីក្នុងខ្លួនគាត់ផ្ទាល់តែម្តងដែលយើងហៅថា (Passionate) ជាការពិតណាស់ នៅពេលដែលគាត់ចាប់ផ្ដើមចាប់យកអាជីវកម្មណាមួយដោយសារតែចំណង់ចំណូលចិត្តដែលកើតចេញពីក្នុងខ្លួនរបស់គាត់ នោះការចាប់ផ្ដើមអាជីវកម្មរបស់គាត់ប្រាកដជាដំណើរការពោរពេញដោយថាមពល មានការលះបង់ និងប្ដេជ្ញាចិត្តខ្ពស់ឆ្ពោះទៅកាន់គោលដៅ ហើយទោះជាជួបឧបសគ្គក៏គាត់មិនបោះបង់ចោលដែរ។ ដូច្នេះជារួមមកគាត់ត្រូវតែមានភាពស្មោះត្រង់ជាមួយខ្លួនឯង និងត្រូវដឹងឱ្យបានច្បាស់ថាកត្តាមួយណាដែលជុំរុញគាត់ពិតប្រាកដអោយគាត់ចាប់យកអាជីវកម្មមួយនោះ។
សំណួរទី២ តើអ្នកបានត្រៀមខ្លួនរួចរាល់ហើយឬនៅមុនពេលចាប់ផ្ដើមអាជីវកម្មនេះ?៖ មុនពេលចាប់ផ្ដើមអាជីវកម្មអ្វីមួយ ម្ចាស់អាជីវកម្មគ្រប់រូបមានរឿងជាច្រើនដែលត្រូវត្រៀមខ្លួនទុកមុន។ ត្រង់ចំណុចនេះគាត់ត្រូវដឹងខ្លួនឯងថាតើគាត់មានចំណេះដឹងពាក់ព័ន្ធនឹងអាជីវកម្មឬវិស័យដែលគាត់ស្រលាញ់ហើយឬនៅ, តើគាត់មានជំនាញគោលឬមានចំណេះធ្វើច្បាស់លាស់ហើយឬនៅ, តើគាត់ចេះជំនាញពាក់ព័ន្ធនានាទៅនឹងជំនាញគោលឬអាជីវកម្មដែរឬទេ, តើគាត់់បានលុតដំឥរិយាបទក្នុងការបំពេញការងាររបស់គាត់ (Soft skills) បានល្អប៉ុណ្ណាដែរ, មានដើមទុនទុកគ្រប់គ្រាន់ហើយឬនៅ បើនៅត្រូវការទៅរកទុននោះនៅកន្លែងណា។ លើសពីនេះអ្នកត្រូវដឹងថា មានមនុស្សជួយធ្វើ ឬដឹងថាត្រូវជ្រើសរើសមនុស្សយ៉ាងម៉េចអោយជួយការងារយើងហើយឬនៅ, គាត់មានថាមពលគ្រប់គ្រាន់ មានការប្តេជ្ញាចិត្តមោះមុត រឹងមាំគ្រប់គ្រាន់ក្នុងការប្រឈមមុខជាមួយហានិភ័យ និងបញ្ហានានាដែលអាចកើតមានគ្រប់ពេលវេលាហើយឬនៅ, តើគាត់មានអត្តចរឹត និងបុគ្គលិកលក្ខណៈស្របតាមសភាពរបស់អាជីវកម្មនោះដែរឬទេ, តើគាត់នឹងរៀបចំដំណើរការផលិតកម្ម ឬសង្វាក់ផលិតកម្មផលិតផល ហើយផ្គត់ផ្គង់នឹងដឹកជញ្ជូនអោយអតិថិជនដូចម្តេច, ចុះបញ្ហាលក្ខខណ្ឌច្បាប់ និងគតិយុត្តិផ្សេងៗទៀងដែលឃុំគ្រងនិងពាក់ព័ន្ធលើអាជីវកម្ម វិស័យ សេវាកម្ម ឬផលិតផលរបស់គាត់នោះ... ដូច្នេះ គាត់ត្រូវយល់ដឹងអោយបានច្បាស់ពីបញ្ហាទាំងនេះជាមុនសិន។
សំណួរទី៣ គឺ តើអ្នកមានគម្រោងអ្វីខ្លះដើម្បីសម្រេចគោលដៅទាំងនោះ?៖ មានសុភាសិតមួយបានពោលថា មនុស្សដែលជោគជ័យគឺជាមនុស្សដែលដឹងថាពួកគេត្រូវធ្វើអ្វីខ្លះ។ នេះគឺជារឿងពិត ជាពិសេសនៅពេលដែលយើងអាជីវកម្មអ្វីមួយ។ នៅពេលខ្លះ មុខបើកអាជីវកម្មមនុស្សម្នាក់នោះមានគោលដៅច្បាស់លាស់ហើយ តែបញ្ហានៅត្រង់ថានៅពេលគាត់ចាប់ផ្តើម គាត់មិនដឹងថាត្រូវធ្វើអ្វីខ្លះ ធ្វើអ្វីមុន ធ្វើអ្វីបន្ទាប់ ធ្វើអ្វីក្រោយគេ ហើយធ្វើរឿងទាំងអស់នោះនៅពេលណាដើម្បីសម្រេចគោលដៅដែលចង់បាន។ ស្ថាបនិករូបនេះបន្តថា ម្ចាស់អាជីវកម្មត្រូវដឹងថានៅពេលគាត់ចាប់ផ្តើមអាជីវកម្មណាមួយ គាត់ត្រូវកំណត់អោយបានច្បាស់ពីគោលដៅរបស់ក្រុមហ៊ុន រៀបចំផែនការយុទ្ធសាស្ត្រនិងសកម្មភាពទៅតាមពេលវេលានិងតំណាក់កាល។ ជាឧទាហរណ៍ ក្នុងរយៈពេលខ្លី ១ខែ ៣ខែ ៦ខែ ក៏ដូចជាក្នុងរយៈពេលវែង ២ឆ្នាំ ៥ឆ្នាំ ឬ១០ឆ្នាំទៅមុខ គាត់ត្រូវកំណត់អោយច្បាស់ៗថាគាត់ចង់អោយអាជីវកម្មរបស់គាត់សម្រេចបានគោលដៅអ្វីខ្លះ ហើយក្នុងរយៈនេះមានផែនការយុទ្ធសាស្ត្រនិងសកម្មភាពណាខ្លះដែលគាត់នឹងអនុវត្តអោយសម្រេចបាននូវគោលដៅទាំងនេះ នៅពេលដែលគាត់បើកដំណើរការអាជីវកម្ម៕
អត្ថបទ៖ ជួប ស្រីរ័ត្ន
