លោក Tony Robbins៖ ធ្វើរឿង ៥យ៉ាងដើម្បីឲ្យជីវិតអ្នកបានប្រសើរ
លោក Tony Robbins ដែលគេស្គាល់ទូទៅថា ជាគ្រូបង្វឹកផ្នែកគំនិតដ៏ជោគជ័យបំផុតមួយរូប និងជាមហាសេដ្ឋីអាមេរិកបានលើកឡើងថា ដើម្បីឲ្យជីវិតបានប្រសើរអ្នកត្រូវដឹងថា តើអ្នកចង់បានអ្វីឲ្យប្រាកដ?
ក្នុងនាមជាម្ចាស់អាជីវកម្ម ៥៤ កន្លែងដែលមានតម្លៃលក់ ៦ ពាន់លានដុល្លារក្នុងមួយឆ្នាំ មហាសេដ្ឋីរូបនេះបានលើកឡើងដូច្នេះថា៖« បើអ្នកចង់ឲ្យឆ្នាំថ្មីនេះក្លាយជាឆ្នាំល្អបំផុតមិនធ្លាប់មាននៅក្នុងជីវិតរបស់អ្នក អ្នកត្រូវបង្កើតទស្សនវិស័យមួយឲ្យជីវិតខ្លួនឯង។ សួរខ្លួនឯងថា តើអ្នកចង់បានអ្វី? តើមានអ្វីប្លែកខ្លះក្នុងឆ្នាំថ្មីនេះ? តើអ្នកចង់ផ្លាស់ប្ដូរអ្វីខ្លះ? តើអ្នកចង់ក្លាយជាអ្វីឲ្យពិតប្រាកដ?»។
សំនួរទាំងនេះមិនទាន់គ្រប់គ្រាន់នោះទេ នេះបើយោងតាមដំបូន្មានរបស់លោក Robbins។ លោកបន្តដូច្នេះថា៖« នៅពេលអ្នកបានបង្កើតទស្សនវិស័យឲ្យជីវិតខ្លួនឯងហើយ អ្នកត្រូវប្រាកដថា ទស្សនវិស័យរបស់អ្នកមានភាពច្បាស់លាស់បំផុត។ មនុស្សភាគច្រើនគិតថា ពួកគេប្រើពេលតែមួយឆ្នាំអាចសម្រេចបានគោលដៅទាំងនោះ តែទីបំផុត ពួកគេចំណាយពេលរហូតដល់មួយទសវត្សឯណោះ ឬក៏លើសពីនេះក៏មានដែរ»។ លោក Robbins បានបញ្ជាក់បន្តទៀតថា នៅពេលអ្នកធ្វើដំណើរឆ្ពោះទៅកាន់គោលដៅរបស់អ្នក អ្នកនឹងត្រូវប្រឈមមុខដោះស្រាយជាមួយនឹងស្ថានភាពមិនប្រាកដប្រជាមួយចំនួនដែលជាប់ទាក់ទងនឹងស្ថានភាពប្រែប្រួលថ្មីៗដែលវាជារឿងលំបាកមួយសម្រាប់អ្នក។ លោកបន្ថែមថា ដល់ពេលនោះខួរក្បាលរបស់អ្នកចាប់ផ្តើមមានការភ័យខ្លាចនៅពេលជួបបញ្ហាទាំងនោះ។
ប៉ុន្តែប្រសិនបើអ្នកចង់បន្តដំណើរទៅមុខ អ្នកត្រូវរៀនទទួលស្គាល់ហ៊ានប្រឈមមុខនឹងវា។ ក្នុងបទសម្ភាសន៍មួយទៅកាន់ទស្សនាវដ្ដី Success មហាសេដ្ឋីវ័យ ៥៨ ឆ្នាំរូបនេះបានលើកឡើងពីជំហានចំនួន ៥ ដែលជួយឲ្យអ្នកប្រែក្លាយឆ្នាំ ២០១៩ ខាងមុខឲ្យក្លាយជាឆ្នាំមួយមានការផ្លាស់ប្ដូរ និងជោគជ័យបំផុតសម្រាប់អ្នកដូចខាងក្រោម៖
១) រៀនរហូតកុំបោះបង់ លោក Robbins បានស្វែងយល់រួចមកហើយពីតម្លៃការសិក្សារៀនសូត្រនៃវិធីការគិតបែបថ្មីដែលលោកហៅថាជា "ការបំប៉នខួរក្បាល”។ លោកថ្លែងថា៖« អ្នកត្រូវដាក់គំនិតថ្មីៗចូលក្នុងខួរក្បាលរបស់អ្នក បើអ្នកចង់អភិវឌ្ឍទៅកាន់ទីតាំងមួយខ្ពស់ជាងពេលនេះ។ បើមិនដូច្នេះទេ ខួរក្បាលរបស់អ្នកនៅដុះស្នឹមតែគំនិត និងជំនឿចាស់ៗ ជាមួយនឹងអារម្មណ៍រវើរវាយឥតប្រយោជន៍»។
២) រក្សាសុខភាពឲ្យបានល្អ សុខភាពសំខាន់ជាងអ្វីៗទាំងអស់។ សុខភាពល្អ នឹងធ្វើឲ្យសុខភាពផ្លូវចិត្តរបស់អ្នកល្អតាមនោះដែរ ហើយវាអាចឲ្យអ្នកផ្ដោតលើអ្វីដែលអ្នកចង់ធ្វើនៅក្នុងជីវិតរបស់អ្នក។ នេះជាសម្ដីរបស់លោក Robbins។ លោកថា លោកក្រោកពីព្រឹកហាត់ប្រាណ ហែលទឹក ដើរហាត់ប្រាណ ពីព្រោះលោកចង់ឲ្យសុខភាពរបស់លោកល្អ។ នៅពេលលោកមានសុខភាពល្អ លោកនឹងអាចសម្រេចជោគជ័យលើកិច្ចការផ្សេងៗទៀត។
៣) មើលគំរូអ្នកដើរមុនៗ ក្នុងចំណុចនេះលោក Robbins បានផ្តល់ដំបូន្មានដូច្នេះថា៖« ប្រសិនបើអ្នកចង់ឲ្យឆ្នាំ ២០១៩ ក្លាយជាឆ្នាំល្អបំផុតសម្រាប់អ្នក អ្នកត្រូវសម្រេចចិត្តស្វែងយល់ និងយកអ្នកណាម្នាក់មកធ្វើជាគំរូរបស់អ្នក។ តើអ្នកណាខ្លះបានជោគជ័យរួចមកហើយលើផ្លូវដែលអ្នកកំពុងចង់ដើរ? តើបុគ្គលនោះបានធ្វើអ្វីខ្លះ?។ លោកបន្តទៀតថា អ្នកត្រូវរៀនគំរូនេះ។ ប្រសិនបើបុគ្គលនោះជោគជ័យ រៀនពីភាពជោគជ័យរបស់គេ ហើយបើបុគ្គលនោះធ្លាប់បរាជ័យ ត្រូវរៀនស្វែងយល់ពីចំណុចខ្វះខាតរបស់បុគ្គលនោះដើម្បីយកមកបំពេញបន្ថែមឲ្យខ្លួនឯង»។
៤) ធ្វើសកម្មភាព ប៉ុន្តែក៏ត្រូវរីករាយក្នុងការផ្លាស់ប្ដូរគោលដៅដែរ លោក Robbins បានពន្យល់នៅចំណុចនេះ ដូច្នេះថា៖« ពេលខ្លះអ្នកក៏ត្រូវផ្លាស់ប្ដូរគោលដៅដែរ។ បើអ្នកចង់ឃើញថ្ងៃរៀបលិច តែអ្នកបែរមុខទៅទិសខាងកើត អ្នកច្បាស់ជាគ្មានសំណាងបានមើលថ្ងៃលិចឡើយ។ វាមិនសំខាន់ថា អ្នកជាមនុស្សមានសុទិដ្ឋិនិយមបែបណា ព្យាយាមបែបណា ឬឆ្លាតបែបណានោះទេ បើយុទ្ធសាស្ត្រ និងគោលដៅរបស់អ្នកដើរខុស អ្វីៗវាមិនអាចកើតឡើងដូចការចង់បានរបស់អ្នកឡើយ»។
៥) ចេះចែករំលែកទៅអ្នកដទៃ «មូលដ្ឋានគ្រឹះនៃជីវិតរបស់មនុស្សម្នាក់ៗ គឺការចេះចែករំលែកឲ្យអ្នកដទៃ នេះហើយជាអ្វីដែលធ្វើឲ្យយើងរស់នៅទាំងមានតម្លៃ។ ជីវិតមនុស្ស មិនមែនខ្ញុំ មិនមែនអ្នក ហើយក៏មិនមែនយើងទាំងអស់គ្នានោះដែរ។ ការជួយអ្នកដទៃ ធ្វើឲ្យអ្នកកាន់តែងាយស្រួលដើម្បីរក្សាបាននូវទស្សនវិស័យរឹងមាំពីការប្រឈមជាច្រើននៅក្នុងជីវិត។ ជួយអ្នកដទៃ នឹងធ្វើឲ្យជីវិតអ្នកមានតម្លៃ និងរស់នៅជាមួយនឹងក្តីសុបិន្តរបស់អ្នក»។ នេះជាដំបូន្មានរបស់លោក Robbins៕
ប្រភព៖ cnbc
