បើចង់ចាប់ផ្ដើមអាជីវកម្ម អ្នកត្រូវមានផ្នត់គំនិតជោគជ័យជាមុនសិនទោះត្រូវហែលឆ្លងបរាជ័យច្រើនក៏ដោយ
ប្រាកដណាស់ថា មនុស្សគ្រប់គ្នាមិនមែនសុទ្ធតែអាចជោគជ័យក្នុងការចាប់ផ្ដើមអាជីវកម្មនោះទេ ប៉ុន្តែអ្នកត្រូវជឿជាក់ថា នៅតែមានអ្នកដែលអាចជោគជ័យ ក្នុងការប្រឡូកក្នុងវិស័យនេះ។ ដូច្នេះតើធ្វើយ៉ាងណា ទើបអាចជោគជ័យក្នុងការធ្វើអាជីវកម្មរបស់អ្នកបាន? លោក កែវ បណ្ឌិត ស្ថាបនិកក្រុមហ៊ុន Akworld បានបង្ហើបប្រាប់ថា "បើចង់ចាប់ផ្ដើមអាជីវកម្មអ្នកត្រូវមានផ្នត់គំនិតជោគជ័យជាមុនសិន ទោះត្រូវហែលឆ្លងបរាជ័យយ៉ាងណាក៏ដោយ"។
និយាយក្នុងន័យអវិជ្ជមានបន្តិចចុះ មនុស្សមួយចំនួនធ្វើអាជីវកម្មគឺគ្រាន់តែចង់បង្ហាញ និងចង់បង្អូតប្រាប់អ្នកដទៃប៉ុណ្ណោះថាខ្លួនក៏ជាម្ចាស់អាជីវកម្ម ខ្លួនឯងក៏មានមុខជំនួញនៅក្នុងដៃដែរ ប៉ុន្តែជាក់ស្ដែង ខ្លួនឯងបែរជាគ្មានគោលដៅច្បាស់លាស់ក្នុងការធ្វើអាជីវកម្មទៅវិញ។ នេះជាការលើកលើងរបស់លោក កែវ បណ្ឌិត។
ស្ថាបនិកក្រុមហ៊ុនរូបនេះបានលើលឡើងបន្តថា ចង់ចាប់ផ្ដើមអាជីវកម្មអ្នកត្រូវមានផ្នត់គំនិតជោគជ័យដែលផ្ដើមចេញពីខ្លួនឯងដំបូងបំផុត ព្រោះនៅពេលដែលអ្នកមានផ្នត់គំនិតវិជ្ជមាន ឬផ្នត់គំនិតជោគជ័យ អ្នកនឹងមានជំនឿចិត្តលើខ្លួនឯងក្នុងការសម្រេចក្ដីសុបិន ឬធ្វើអាជីវកម្មដែលអ្នកស្រលាញ់ ដូច្នេះអ្នកនឹងអាចជម្នះបាននូវរាល់បញ្ហាលំបាកៗ និងសម្ពាធការងារជាច្រើនដែលអ្នកត្រូវឆ្លងកាត់ពេលខាងមុខដើម្បីឈានទៅសម្រេចគោលដៅ។
បើទោះបីជាយើងជឿជាក់លើខ្លួនឯង យើងមានការគិតវេជ្ជមានក៏ពិតមែន ប៉ុន្តែវាក៏មិនប្រាកដថា អាចឲ្យយើងទទួលជោគជ័យបានទាំងស្រុងនោះដែរក្នុងការធ្វើអាជីវកម្ម ពោលគឺយើងអាចនឹងត្រូវបាត់បង់វា (ជួបបរាជ័យ) ប្រសិនបើយើងគ្មានការតស៊ូ និងការលះបង់ខ្ពស់ក្នុងការដំណើរការអាជីវកម្មនោះឲ្យរីកចម្រើនទៅមុខនោះទេ។ នេះជាការលើកឡើងបន្ថែមទៀតរបស់ស្ថាបនិកក្រុមហ៊ុន AKworld រូបនេះ៕
អត្ថបទ៖ ជួប ស្រីរ័ត្ន
