ការជ្រើសរើសដៃគូត្រូវមានឥទ្ធិពលយ៉ាងណាដល់ភាពជោគជ័យរបស់អ្នក?
ជិតមួយសតវត្សកន្លងទៅ អ្នកកាសែតលោកណាប៉ូឡេអុងហ៊ីល (Napoleon Hill) បានបង្កើតបេសកកម្មមួយដើម្បីស្វែងរក និងចងក្រងឯកសារយុទ្ធសាស្ត្រជាច្រើនដែលអ្នកជំនួញមានទ្រព្យសម្បត្តិល្បីៗ និងបុគ្គលជោគជ័យបំផុតនៅអាមេរិកបានអនុវត្តនៅក្នុងជីវភាពរបស់ខ្លួនម្នាក់ៗ។
អ្នកនិពន្ធម្នាក់នេះបានសិក្សាទៅលើសេដ្ឋីជាង៥០០រូប ដោយប្រើពេលជាង ២០ ឆ្នាំទើបរូបលោកឈានដល់ទៅសម្រេចបានស្នាដៃនិពន្ធសៀវភៅដ៏ល្បីល្បាញមួយក្បាលដែលមានចំណងជើងថា "Think and Grow Rich” នៅក្នុងឆ្នាំ ១៩៣៧ នូវអ្វីដែលគេស្គាល់ថា ជាគោលការណ៍ទាំង ១៣ នៃការបង្កើតលុយយ៉ាងសម្ងាត់របស់ក្រុមអ្នកមាន។ នៅក្នុងគោលការណ៍ទី ១០ របស់លោកគឺអាថ៌កំបាំងមួយដែលនិយាយអំពីការទំនាក់ទំនងផ្លូវភេទ។ គោលការណ៍នេះបានបង្ហាញថា ស្នេហាដ៏ផ្អែមល្ហែម និងការទំនាក់ទំនងផ្លូវភេទគឺជាកត្តាសំខាន់ក្នុងការរួមចំណែកកំណត់ភាពជោគជ័យ និងទ្រព្យសម្បត្តិរបស់មនុស្សម្នាក់ៗ។
សំណេររបស់លោកបានសរសេរដូចខាងក្រោមនេះ៖ "ទំនាក់ទំនងផ្លូវភេទគឺជាបំណងប្រាថ្នាមួយនៅក្នុងចំណោមបំណងប្រាថ្នាផ្សេងទៀតរបស់មនុស្សម្នាក់...នៅពេលវាបានប្រើ និងបម្លែងទៅតាមគន្លងទិសដៅផ្សេងទៀត កម្លាំងជំរុញនេះ នឹងរក្សាឲ្យមាននូវគុណសម្បត្តិនៃការស្រមើស្រមៃ និងភាពក្លាហាន។ ល។ ដែលអាចត្រូវបានប្រើប្រាស់ជាកម្លាំងនៃភាពច្នៃប្រឌិតដ៏មានឥទ្ធិពលនៅក្នុងអក្សរសិល្ប៍ សិល្បៈ ឬត្រូវបានប្រើប្រាស់នៅក្នុងវិជ្ជាជីវៈផ្សេងទៀត ឬដែលគេហៅម្យ៉ាងទៀតថា ជាការប្រមូលផ្ដុំនូវទ្រព្យសម្បត្តិដ៏ច្រើនសំបូរហូរហៀរ... ក្តីស្រលាញ់ ភាពផ្អែមល្ហែម និងការទំនាក់ទំនងផ្លូវភេទគឺជាអារម្មណ៍ដែលមានសមត្ថភាពជំរុញឲ្យបុរសសម្រេចបានសមិទ្ធផលដ៏ត្រចះត្រចង់... នៅពេលវាទាំង៣ នេះកើតមានព្រមគ្នា វានឹងអាចលើកកម្ពស់ទេពកោសល្យរបស់មនុស្សឲ្យកាន់តែអស្ចារ្យឡើង"។
លោក Hill បានអះអាងបន្ថែមដូច្នេះទៀតថា៖ «បុរសដែលទទួលបានសមិទ្ធផលដ៏អស្ចារ្យបំផុតក្នុងជីវិត គឺបុរសដែលបានកសាងទំនាក់ទំនងផ្លូវភេទដ៏ល្អមួយជាមួយដៃគូរបស់ខ្លួន និងជាបុរសដែលបានសាងទ្រព្យសម្បត្តិដ៏ច្រើនមហាសាល... ដែលត្រូវបានជំរុញពីស្ត្រីនៅពីក្រោយខ្នង»។ ទន្ទឹមនឹងនេះ ខណៈដែលគោលការណ៍ច្រើនទសវត្សមួយនេះហាក់បីដូចជាមិនសូវខុសឆ្ងាយពីគោលការណ៍ជោគជ័យកើតចេញពីមានដៃគូប្រចាំជីវិតល្អនោះ ៨១ ឆ្នាំក្រោយមក ទស្សនៈ និងគោលគំនិតរបស់បុគ្គលល្បីល្បាញជាច្រើនរួមមានមហាសេដ្ឋី អ្នកជំនួញ និងអ្នកនយោបាយនានាបានលើកឡើងផងដែរថា មានទំនាក់ទំនងដៃគូត្រឹមត្រូវពិតជាបានរួមចំណែកយ៉ាងសំខាន់សម្រាប់ភាពជោគជ័យហិរញ្ញវត្ថុ និងអាជីពរបស់ខ្លួន។
មហាសេដ្ឋីអាមេរិកលោកស្រី Sheryl Sandberg ប្រធានប្រតិបត្តិរបស់ក្រុមហ៊ុន Facebok លោក Jim Rohn វាគ្មិន និងជាគ្រូបង្វឹកផ្នត់គំនិត លោកMark Zuckerberg ប្រធានក្រុមហ៊ុន Facebook លោក Bill Gates ប្រធានក្រុមហ៊ុន Microsoft និង Obama អតីតប្រធានាធិបតីអាមេរិកសុទ្ធតែបានលើកឡើងថា ដៃគូជីវិតរបស់បុគ្គលទាំងនេះបានរួមចំណែកសំខាន់ណាស់សម្រាប់ភាពជោគជ័យក្នុងជំនួញ និងឆាកនយោបាយ។ លោកស្រី Sheryl Sandberg ធ្លាប់និយាយថា ជម្រើសដ៏ល្អបំផុតក្នុងអាជីពរបស់អ្នកគឺថា តើអ្នកណាដែលអ្នកគួររៀបការជាមួយ?
ចំណែកលោក Jim Rohn វិញបានលើកឡើងថា ជ្រើសរើសដៃគូជីវិតបានត្រឹមត្រូវ ជីវិតរបស់អ្នកនឹងមានអនាគតត្រចះត្រចង់ ខណៈដែលលោក Mark Zuckerberg វិញធ្លាប់បានបញ្ជាក់ផងដែរថា ភរិយារបស់លោកមិនមែនជានារីស្អាតល្អឥតខ្ចោះនោះទេ ប៉ុន្តែនាងបានរួមចំណែកមិនតិចទេក្នុងការជួយឲ្យលោកជោគជ័យដើរតួជាអ្នកជំនួញ និងឪពុកល្អម្នាក់។ ងាកមកមើលមហាសេដ្ឋី Bill Gates វិញក៏ដូច្នេះដែរ ពីព្រោះលោកធ្លាប់បានសារភាពថា លោកស្រី Melinda Gates ជាមនុស្សកម្រពីព្រោះថា លោកស្រីមានទស្សនវិស័យ និងទស្សនដូចលោកជាពិសេសលើកិច្ចការមនុស្សធម៌។ រីឯលោក Obama វិញតែងសរសើរពីសមត្ថភាពរបស់លោកស្រី Michelle Obama ថា ជានារីមានភាពប៉ិនប្រសព្វ ឈ្លាសវៃដែលតែងតែនៅពីក្រោយចាំជួយគាំទ្រលោក។ នេះសបញ្ជាក់ឲ្យឃើញថា គូស្វាមីភរិយាដែលមានក្តីស្រលាញ់ និងមនោសញ្ចេតនាផ្អែមល្ហែមអាចអនុញ្ញាតឲ្យដៃគូរបស់ខ្លួនយកចិត្តទុកដាក់ និងផ្តោតកាន់តែខ្លាំងឡើងលើអាជីពការងារ។ អវត្តមាននៃភាពតានតឹងនៅក្នុងជីវភាពអាពាហ៍ពិពាហ៍ នឹងអនុញ្ញាតឲ្យដៃគូទាំងនោះមានថាមពល និងកម្លាំងចិត្តកាន់តែច្រើនដើម្បីកសាងជីវភាពរបស់ខ្លួនប្រកបដោយសុភមង្គល និងទទួលបានភាពជោគជ័យ៕
ប្រភព៖ Businessinsider
