ចំណាយលើរបស់ ៦ យ៉ាងនេះបើទោះបីជាអស់ច្រើនប៉ុណ្ណាក៏មិនគួរស្តាយលុយដែរ
លុយពិបាករកណាស់ ប៉ុន្តែចាយទៅវិញស្រួលណាស់។ បើគ្មានការគ្រប់គ្រងហិរញ្ញវត្ថុឲ្យបានត្រឹមត្រូវ និងប្រើលុយឲ្យបានចំទិសដៅប្រកបដោយប្រសិទ្ធភាពទេនោះ វាស្មើនឹងធ្វើឲ្យលុយរបស់អ្នកបាត់បង់ទៅដោយគ្មានតម្លៃទាល់តែសោះ។ ដូចនេះ បើអ្នកចង់ឲ្យលុយរបស់អ្នកដែលបាត់បង់ទៅដោយនាំផលប្រយោជន៍មកវិញ អ្នកគួរចំណាយលុយលើរបស់ ៦ យ៉ាងខាងក្រោមនេះ៖
១) ចំណាយលើការអប់រំ ថ្វីត្បិតតែការចំណាយលើវិស័យអប់រំ អាចធ្វើឲ្យអ្នកចំណាយប្រាក់រាប់ពាន់ ឬដល់ខ្ទង់ម៉ឺនដុល្លារក៏ដោយ អ្នកត្រូវចាំថា ការចំណាយបែបនេះគឺជាការចំណាយដ៏មានតម្លៃបំផុតសម្រាប់មនុស្សម្នាក់ៗ។ ការអប់រំ នឹងជួយបង្កើនចំណេះដឹងរបស់អ្នក។ នៅពេលចំណេះដឹងអ្នកកាន់តែទូលំទូលាយ មានន័យថា អ្នកកំពុងកសាងធនធានដ៏ច្រើនសំបូរបែបឲ្យខ្លួនឯង។ បើតាមសម្ដីរបស់លោក Benjamin Franklin បានមានប្រសាសន៍ថា ការវិនិយោគលើចំណេះដឹង ផ្តល់ប្រាក់ចំណេញល្អជាងគេបំផុត។
២) ចំណាយលុយលើដំណើរកម្សាន្ត ការធ្វើដំណើរ មានគុណប្រយោជន៍ច្រើនណាស់សម្រាប់សុខភាព និងជីវិតរបស់អ្នក។ ក្រៅតែផ្តល់ភាពស្រស់ស្រាយដល់ជីវិត វាផ្តល់ឲ្យអ្នកនូវចំណេះដឹងថ្មីៗ រៀនសិក្សាពីវប្បធម៌ផ្សេងៗគ្នា ការធ្វើជំនួញ របៀបរស់នៅ និងបទពិសោធន៍ដ៏មានតម្លៃជាច្រើនទៀតដែលអ្នកមិនគួរស្តាយលុយលើដំណើរកម្សាន្តនោះឡើយ។
៣) ចំណាយលើសម្ភារៈប្រើប្រាស់សម្រាប់ទទួលទានដំណេក វាជារឿងមួយគួរឲ្យអស់សំណើចពេលនិយាយដល់ចំណុចនេះ។ ប៉ុន្តែសូមចាំថា ការទទួលទានដំណេកបានត្រឹមត្រូវ និងនៅកន្លែងដែលមានផាសុកភាពល្អ នឹងជួយឲ្យសុខភាពរបស់អ្នកល្អប្រសើរ។ យោងតាមវិទ្យាស្ថានសុខភាពជាតិរបស់អាមេរិក (NIH) បានឲ្យដឹងថា ការទទួលទានដំណេក គឺមានប្រយោជន៍ និងសំខាន់ណាស់សម្រាប់សុខភាព។ សុខភាពល្អ ជួយបង្កើនគុណភាពជីវិត។ មួយជីវិតរបស់អ្នកត្រូវការពេល ស្ទើរតែ ១ភាគ៣ទៅហើយលើការទទួលទានដំណេក ដូចនេះហេតុអ្វីត្រូវស្តាយគ្រាន់តែចំណាយលុយទិញសម្ភារៈផ្សេងៗដើម្បីធ្វើឲ្យសុខភាពខ្លួនឯងល្អនោះ។
៤) ចំណាយលើសំលៀកបំពាក់ដែលស័ក្តិសមនឹងរូបរាងរបស់អ្នក ការទិញសំលៀកបំពាក់ទៅតាមចិត្តចង់ ហើយមិនស័ក្តិសមនឹងរូបរាងមិនចូលភ្នែកអ្នកដទៃ នឹងធ្វើឲ្យអ្នកដទៃមើលមកអ្នកថា ជាមនុស្សគ្មានរបៀបរៀបរយ និងគ្មានភាពថ្លៃថ្នូរ។ ជាយោបល់ ជាជាងផ្ដោតលើម៉ាកយីហោល្បីៗ អ្នកគួរហ៊ានចំណាយលុយប៉ុន្មានក៏ដោយទៅលើសំលៀកបំពាក់ទាំងឡាយណាដែលស័ក្តិសមសម្រាប់អ្នកទាំងសំលៀកបំពាក់នៅផ្ទះ ដើរលេង ចូលរួមកម្មវិធី ឬ នៅកន្លែងធ្វើការជាដើម។ សំលៀកបំពាក់សមរម្យនឹងជួយលើកសម្រស់ និងភាពថ្លៃថ្នូររបស់អ្នក អាចចូលចុះក្នុងចំណោមមនុស្សម្នាទាំងឡាយ។
៥) ចំណាយលើសេវាកម្មដែលជួយសន្សំពេលវេលាឲ្យអ្នក មានការងារច្រើនណាស់ដែលអ្នកត្រូវធ្វើជារៀងរាល់ថ្ងៃដើម្បីរកប្រាក់ចំណូលត្រឡប់មកវិញ។ ភាពរវល់នេះបានធ្វើឲ្យអ្នកមិនមានពេលគ្រប់គ្រាន់សម្រាប់យកពេលទៅធ្វើកិច្ចការផ្សេងៗទៀតដែលជាមូលហេតុសម្រាប់អ្នកត្រូវស្វែងរកសេវាកម្មណាមួយមកជួយធ្វើ ជំនួសអ្នក។ អ្នកប្រហែលត្រូវការម្ហូបអាហារ ជួសជុលផ្ទះ រថយន្ត ឬទិញសម្ភារៈប្រើប្រាស់ផ្សេងៗជាដើម។ អ្នកអាចត្រូវការសេវាដឹកជញ្ជូនព្រោះវាឆាប់រហ័ស និងសល់ពេលធ្វើកិច្ចការផ្សេងទៀតផង។ ដូចនេះ ហេតុអ្វីអ្នកមិនហ៊ានចំណាយលុយដើម្បីសេវាកម្មទាំងនេះ។ លុយអាចរកបាន ប៉ុន្តែពេលវេលាមិនអាចរកបានត្រឡប់មកវិញឡើយ។
៦) ចំណាយលុយដើម្បីសុខភាព តើអ្នកណាខ្លះដែលនិយាយថា សុខភាពមិនសំខាន់នោះ? រវាងលុយ និងសុខភាព តើគួរជ្រើសមួយណា? មនុស្សគ្រប់គ្នានឹងឆ្លើយថា យកសុខភាព។ មានសុខភាពល្អសិនទើបរកលុយបាន។ ដូចនេះ ការចំណាយលើការថែទាំសុខភាព ការព្យាបាល ឬសេវាកម្មធ្វើឲ្យសុខភាពរឹងមាំដូចជា ចូលក្លឹបហាត់ប្រាណ ទិញឧបករណ៍ហាត់ប្រាណជាដើម បើទោះបីជាមានតម្លៃថ្លៃយ៉ាងណាក៏ដោយ អ្នកមិនគួរសុញសាញលើចំណុចនេះឡើយ។ នៅពេលមានសុខភាពល្អផ្លូវកាយ និងផ្លូវចិត្តរបស់អ្នកក៏ល្អទៅតាមនោះដែរ នេះហើយជាការរួមចំណែកដ៏សំខាន់ធ្វើឲ្យជីវិតរបស់អ្នកមានភាពស្រស់បំព្រង៕
ប្រភព៖ businessinsider
