ប្រយោជន៍ ៥យ៉ាងដែលអ្នកអាចទទួលបានពីត្រសក់ស្រូវ
ដោយសាររសជាតិផ្អែមពីធម្មជាតិ ផ្លែត្រសក់ស្រូវត្រូវបានគេពេញនិយមយកទៅធ្វើជាបង្អែមសម្រាប់ទទួលទាន។ ផ្លែនេះផ្សំឡើងពីជាតិទឹក ៩៥ភាគរយឯណោះ ខណៈពេលដែលវាក៏សម្បូរដោយជីវជាតិបំប៉នជាច្រើនទៀតដែលមានប្រយោជន៍សម្រាប់សុខភាព។ ខាងក្រោមនេះ គឺជាប្រយោជន៍៥យ៉ាងដែលអ្នកអាចទទួលបានពីត្រសក់ស្រូវ៖
១) ជួយដល់សុខភាពបេះដូង៖ ផ្លែត្រសក់ស្រូវអាចបញ្ឈប់កំណកឈាមដែលអាចបង្កជាជំងឺដាច់សរសៃឈាមខួរក្បាលនិងជំងឺបេះដូងដទៃទៀតបាន។ វាអាចកាត់បន្ថយហានិភ័យពីជំងឺបេះដូងបានដោយជួយសម្រួលដល់ឈាមនៅក្នុងរាងកាយ។
២) ជួយដល់សុខភាពតម្រងនោម៖ លក្ខណៈសម្បូរជាតិទឹករបស់ត្រសក់ស្រូវធ្វើឲ្យវាមានប្រយោជន៍សម្រាប់ព្យាបាលជំងឺតម្រងនោម។ ហេតុនេះការទទួលទានផ្លែត្រសក់ស្រូវប្រចាំថ្ងៃអាចជួយថែទាំសុខភាពតម្រងនោមរបស់អ្នកបាន។
៣) ជួយដល់ការរំលាយអាហារ៖ បើអ្នកមានបញ្ហារំលាយអាហារ អ្នកអាចទទួលទានផ្លែត្រសក់ស្រូវជាប្រចាំថ្ងៃដើម្បីជួយសម្រួលដល់ចលនាពោះវៀនរបស់អ្នកឲ្យងាយស្រួលជាងមុនបាន។ លក្ខណៈសម្បូរជាតិទឹករបស់ផ្លែត្រសក់ស្រូវធ្វើឲ្យវាមានផលល្អចំពោះការរំលាយអាហារ រីឯសារធាតុខនិជដែលមានក្នុងត្រសក់ស្រូវអាចកាត់បន្ថយជាតិអាស៊ីដដែលតែងបង្កការលំបាកដល់ការរំលាយអាហារនេះបាន។
៤) បង្កើនថាមពល៖ ផ្លែត្រសក់ស្រូវសម្បូរដោយវីតាមីនបេដែលជាវីតាមីនដ៏សំខាន់សម្រាប់រាងកាយរបស់អ្នកក្នុងការផលិតថាមពល។ វីតាមីនបេត្រូវការដើម្បីដំណើរការស្ករនិងកាបូអ៊ីដ្រាត។ ដូច្នេះការទទួលទានត្រសក់ស្រូវនឹងអាចផ្ដល់ថាមពលដល់រាងកាយបាន។
៥) ជួយបញ្ចុះទម្ងន់៖ ត្រសក់ស្រូវមានកម្រិតជាតិសូដ្យូមនិងកាឡូរីទាប។ ដោយសារត្រសក់ស្រូវសម្បូរជាតិទឹក វាអាចធ្វើឲ្យអ្នកឆ្អែតបានយូរ ខណៈពេលដែលជាតិផ្អែមធម្មជាតិនៅក្នុងត្រសក់ស្រូវអាចកាត់បន្ថយចំណង់របស់អ្នកក្នុងការទទួលទានអាហារផ្អែមបាន៕
ដោយ៖ ស្រីពៅ
