៦១%​នៃ​ការ​វាយ​ប្រហារ​ផ្នែក​ទិន្នន័យ​គឺ​កើត​ឡើង​លើ​ Small Business ដែល​ធ្លាប់​បាន​កើត​ឡើង ​៥៣%​នៅ​ក្នុង​ឆ្នាំ​២០១៧​ ដូច្នេះ​អ្នក​ដែល​ទទួល​រងគ្រោះ​ភាគ​ច្រើន​គឺ​មិនមែន​ក្រុមហ៊ុន​ធំៗ​នោះ​ទេ គឺ​ក្រុមហ៊ុន​តូចៗ ​SME និង Start-up។ នេះ​ជា​ការ​លើក​ឡើង​របស់​លោក​ អ៊ូ ផាន់ណារិទ្ធិ នាយក​ផ្នែក​ ICT Security នៃ​ក្រសួង​ប្រៃសណីយ៍ និង​ទូរគមនាគមន៍ នៅ​ក្នុង​កម្មវិធីសិក្ខាសាលា BARCAMP នា​វិទ្យាស្ថាន​បច្ចេក​វិទ្យា​កម្ពុជា​កាល​ពី​ពេល​ថ្មីៗ​កន្លង​ទៅ​នេះ។

លោក អ៊ូ ផាន់ណារិទ្ធ បាន​លើក​ឡើង​ថា ៦០%​នៃ​ក្រុមហ៊ុន​ទាំង​នោះ​នឹង​ត្រូវ​សារតូប​ក្នុង​រយៈ​ពេល​ ៦​ខែ​បន្ទាប់​ពី​ការ​វាយ​ប្រហារ​ ដោយ​ក្នុង​នោះ ​៩០%​នៃ​ក្រុមហ៊ុន​តូចៗ​ទាំង​នោះ​គឺ​មិន​មាន​ Data Protection និង​ Data Protection Customer នៅ​ឡើយ​ទេ​ នេះ​បើ​តាម​ការ​ស្រាវ​ជ្រាវ​កាល​ពី​ពេល​ថ្មីៗ​នេះ ដូច្នេះ ​SME និង Start-up គួរ​តែ​​មាន​ការ​យក​ចិត្ត​ទុក​ដាក់​និង​ប្រុង​ប្រយ័ត្ន​ឲ្យ​បាន​ខ្ពស់​បំផុត​ចំពោះ​បញ្ហា​នេះ។

«សហគ្រាស​ខ្នាត​តូច និង​មធ្យម ​SME និង Start up ជា​ច្រើន​តែង​តែ​ចោទ​សួរ​ថា​ ហេតុ​អ្វី​គេ ​hack​ក្រុមហ៊ុន​ឬ​ស្ថាប័ន​របស់​ខ្ញុំ? ខ្ញុំ​មិន​មែន​ជា​ក្រុមហ៊ុន​ហិរញ្ញវត្ថុ​ដូច​ជា​ធនាគារ​ឬ​គ្រឹះ​ស្ថាន​មីក្រូ​ហិរញ្ញវត្ថុ​អ្វី​ទេ ក្រុមហ៊ុន​របស់​ខ្ញុំ​តូច​ណាស់​ដែល​មិនមែន​ជា​គោល​ដៅ​របស់ ​Hacker​ ទេ នេះ​គឺ​ជា​អ្វី​ដែល​SME និងStart up តែង​តែ​យល់​ច្រឡំ»។ លោក​បាន​បន្ថែម​ថា​ តើ​យើង​មាន​អ្វី​ខ្លះ​ដែល​ទាក់​ទាញ​ឧក្រិដ្ឋកម្ម​ប្រព័ន្ធ​អ៊ីន​ធឺណេត? មាន​ដូច​ជា(Customer data)​ទិន្នន័យ​អតិថិជន, (Innovation your research) ​ការ​ស្រាវ​ជ្រាវ​ថ្មីៗ​របស់​អ្នក​, (Infrastructure) ហេដ្ឋារចនា​សម្ព័ន្ធ​ក្នុង​ក្រុមហ៊ុន និង​ពិសេស​មួយ​ទៀត​គឺ​ធនធាន​មនុស្ស​នៅ​ក្នុង​ក្រុមហ៊ុន៕

អត្ថបទ​៖ ជួប ស្រីរ័ត្ន