ហេតុអ្វីវេជ្ជបណ្ឌិតមានចំណូល១ម៉ឺនដុល្លារក្នុងមួយខែមិនសូវធូរធាជាងអ្នកមានប្រាក់ខែ៣ពាន់?
ចង់ធ្វើឲ្យខ្លួនអ្នកមានលុយច្រើន មិនចាំបាច់ថា លុះត្រាតែអ្នកក្លាយជាអ្នកជំនាញហិរញ្ញវត្ថុដ៏ស្ទាត់ជំនាញផុតលេខនោះទេ។ អ្នកមិនចាំបាច់កើតចេញពីត្រកូលអភិជន ឬអ្នកមានធូរធារស្រាប់ទើបមានលុយច្រើននៅក្នុងដៃនោះឡើយ។ តើអ្នកដឹងទេ អ្នកមានមួយចំនួនទម្រាំតែមានលុយច្រើននៅក្នុងដៃនៅថ្ងៃនេះ តើបុគ្គលទាំងនោះត្រូវធ្វើអ្វីខ្លះ? ប្រើពេលប៉ុន្មាន?
ជុំវិញប្រធានបទនេះ សហគ្រិនវ័យក្មេង និងជាអ្នកប្រឹក្សាហិរញ្ញវត្ថុដ៏ល្បីមួយរូបរបស់អាមេរិកគឺលោក Ramit Sethi បានលើកឡើងថា អ្នកដែលមានសមត្ថភាពរកប្រាក់ចំណូលច្រើន មិនអាចវាស់ស្ទង់អ្នកនោះថា ជាអ្នកមានបានទេ។ ប៉ុន្តែគឺវាអាស្រ័យត្រង់ថា បុគ្គលនោះចេះសន្សំ និងចេះវិនិយោគដែរឬអត់?”។ លោក Ramit បានបញ្ជាក់ថា ជាមធ្យម អ្នកមានលុយច្រើនដូចជា សេដ្ឋីមានលុយស្តុកស្តម្ភជាដើមបានយកប្រាក់ចំណូលរបស់ខ្លួនចំនួន ២០% ទៅវិនិយោគ។
នេះហើយជាមូលហេតុដែលធ្វើឲ្យបុគ្គលិកម្នាក់មានប្រាក់ចំណូល ៣ ០០០ ដុល្លារក្នុងមួយខែ មានជាងវេជ្ជបណ្ឌិត (Doctor) ម្នាក់ដែលមានប្រាក់ចំណូល ១០ ០០០ ដុល្លារក្នុងមួយខែ។ ហេតុអ្វី? នេះពីព្រោះតែបុគ្គលិកម្នាក់នេះមានភាពវៃឆ្លាតជាងវេជ្ជបណ្ឌិតក្នុងការគ្រប់គ្រងលុយដោយការសន្សំ និងយកទៅវិនិយោគជានិច្ច ខណៈដែលវិជ្ជបណ្ឌិតបើតាមអ្នកជំនាញខាងលើរូបនេះអះអាងថា មិនសូវចេះបែងចែកប្រាក់ណាសម្រាប់សន្សំ គិតតែចាយវាយមានខ្ទង់ខ្នាតត្រឹមត្រូវ។ លោក Ramit បានលើកឧទាហរណ៍ដ៏សាមញ្ញមួយទាក់ទងនឹងការសន្សំនេះតាមរយៈការសន្សំផ្តើមចេញពីប្រាក់តិចតួចមួយ។ ឧទាហរណ៍ថា អ្នកសន្សំ ១០ដុល្លារក្នុងមួយសប្តាហ៍៖ -១ខែ = ១០x ៤ = ៤០ ដុល្លារ -១ឆ្នាំ = ៤០x១២ = ៤៨០ ដុល្លារ -៥ឆ្នាំ = ៤៨០ x ៥ = ២ ៤០០ ដុល្លារ។ ចុះបើអ្នកសន្សំ ៥០ ដុល្លារក្នុងមួយសប្តាហ៍ តើរយៈពេល៥ឆ្នាំអ្នកនឹងទទួលបានប៉ុន្មាន? ចម្លើយគឺ ១២ ០០០ ដុល្លារ ឬ បើ ១០០ ដុល្លារក្នុងមួយសប្តាហ៍? នោះប្រាក់សន្សំរបស់អ្នកកើនដល់ ២៤ ០០០ ដុល្លារក្នុងរយៈពេល ៥ឆ្នាំ។
នេះមានន័យថា អ្នកដាក់ប្រាក់សន្សំកាន់តែច្រើន លុយដែលអ្នកសន្សំសល់កាន់តែច្រើន ហើយអាចយកទៅវិនិយោគលើមុខរបរផ្សេងៗដើម្បីបង្កើនប្រាក់ចំណូលបន្ថែមទៀតពីលើចំណូលដែលមានស្រាប់។ បើតាមដំបូន្មានរបស់លោក Ramit នេះបញ្ជាក់ថា ប្រាក់សន្សំបន្តិចបន្តួច មួយកាក់មួយសេនរបស់អ្នក ពិតជាឥទ្ធិពលខ្លាំងណាស់សម្រាប់ហិរញ្ញវត្ថុរបស់អ្នកនៅក្នុងរយៈពេលយូរអង្វែងទៅមុខ។ លោកបន្ថែមថា ចង់វិនិយោគ អ្នកមិនចាំបាច់ទាល់តែមានលុយច្រើននោះទេ។ អ្នកបរាជ័យក្នុងការគ្រប់គ្រងហិរញ្ញវត្ថុកន្លងមក គឺដោយសារតែអ្នកមិនដឹងថា គួរចាប់ផ្តើមវាពីកន្លែងណា? ដោយរបៀបណា? បើអ្នករកចម្លើយឃើញហើយ ចាប់ផ្តើមកាន់តែឆាប់ គឺកាន់តែល្អ៕
ដោយ៖ សូរ៉ាន់ដារ
