ដំបូន្មានអ្នកជំនាញហិរញ្ញវត្ថុ៖ «ខំប្រឹងធ្វើការមិនអាចឲ្យអ្នកក្លាយជាអ្នកមានឡើយ»
លោក Ric Edelman គឺជាស្ថាបនិក និងជានាយកប្រតិបត្តិនៃក្រុមហ៊ុន Edelman Financial Services ដែលជាក្រុមហ៊ុនផ្តល់ប្រឹក្សាហិរញ្ញវត្ថុឈានមុខគេបំផុតមួយរបស់អាមេរិក។ ជាអ្នកនិពន្ធសៀវភៅថ្មីមួយដែលមានចំណងជើងថា "ការពិតអំពីអនាគតរបស់អ្នក: មគ្គុទ្ទេសក៍លុយដែលអ្នកត្រូវការនៅពេលនេះនិងពេលបន្ទាប់ ឬ The Truth About Your Future: The Money Guide You Need Now, Later, and Much Later" លោក Ric Edelman បានលើកឡើងថា ប្រឹងតែធ្វើការមិនអាចធ្វើឲ្យអ្នកក្លាយជាអ្នកមានឡើយ "Just working hard will not make you wealthy"។
ជុំវិញប្រធានបទនេះលោក Ric Edelman បានពន្យល់ពីមូលហេតុដូចនេះថា៖ " មនុស្សជាច្រើនមានការភាន់ច្រឡំអំពីការបង្កើតទ្រព្យសម្បត្តិហើយនេះត្រូវបានគ្របដណ្ដប់ដោយប្រព័ន្ធអប់រំរបស់អាមេរិកដែលបានបង្កើតឱ្យមានការប្រថុយប្រថាន ពោលគឺវាបង្កើតឡើងក្នុងគោលបំណងមួយតែប៉ុណ្ណោះ។ គោលបំណងនៃប្រព័ន្ធអប់រំនេះ គឺដើម្បីផ្តល់ចំណេះដឹងដល់អ្នក រួចហើយឲ្យអ្នកទៅរកការងារធ្វើដោយយកចំណេះដឹងនោះទៅអនុវត្តបង្កើតអាជីពផ្ទាល់ខ្លួន និងរកលុយចិញ្ចឹមជីវិត។ នៅក្នុងន័យផ្សេងទៀត ប្រព័ន្ធអប់រំនេះកំពុងបង្រៀនមនុស្សឲ្យអ្នកខិតខំធ្វើការយ៉ាងលំបាក និងទទួលបានរង្វាន់តបស្នងនោះគឺប្រាក់ខែ។ វាជារឿងមួយល្អដែលខ្ញុំមិនទាន់ជំទាស់ត្រង់ចំណុចនេះ ពីព្រោះថា រឿងខំធ្វើការយកប្រាក់ខែនេះ ការពិតនេះគ្រាន់តែជារឿងមួយត្រឹមត្រូវតែពាក់កណ្តាលតែប៉ុណ្ណោះ។ ជាការពិតអ្វីដែលអ្នកត្រូវតែធ្វើ នោះគឺការធ្វើការងារដោយភាពឆ្លាតវៃ (Work Smart) មិនមែនខំប្រឹងធ្វើការគ្មានសម្រាកតែមួយមុខនោះទេ។ នេះជាមូលហេតុដែលខ្ញុំនិយាយនៅពេលនេះ។
ប្រសិនបើអ្នកយកប្រាក់ខ្លះដែលអ្នករកបានប្រហែល ១០% នៃប្រាក់ខែ ហើយយកទៅដាក់ធនាគាររាប់ឆ្នាំដើម្បីយកការប្រាក់ តើអ្នកអាចប្រាប់ខ្ញុំបានទេថា អ្នកបានស៊ីការប្រាក់ប៉ុន្មាន? ចម្លើយនោះ វាមិនច្រើនទេ ព្រោះថា អតិផរណាទំនិញសព្វគ្រប់បែបយ៉ាងក៏ឡើងថ្លៃដែរ ហើយនេះគឺជាវិធីសាស្ត្រដ៏ឆោតល្ងង់មួយ។ ជាយោបល់របស់ខ្ញុំ នៅពេលសេដ្ឋកិច្ចកំពុងលូតលាស់ អ្នកត្រូវធ្វើម៉េចឲ្យចំណូលផ្ទាល់ខ្លួនមានកំណើនចន្លោះពី ៦% ៧% ៨% ឬ ៩% ជានិច្ចក្នុងមួយឆ្នាំ។ បំភ្លេចចោលទៅរឿងដែលថា ពិតជាអាចធ្វើឲ្យប្រាក់ចំណូលកើនឡើង ១០% ២០% ៣០% ឬ ៤០% ក្នុងមួយឆ្នាំ។ នោះគឺជារឿងបោកប្រាស់។ គ្មានអ្នកណាមានសមត្ថភាពធ្វើឲ្យចំណូលរបស់ខ្លួនមានកំណើនពី ១០% ២០% ឬ ៣០% ក្នុងមួយឆ្នាំៗ រហូតនោះទេ”។
ផ្អែកតាមដំបូន្មានរបស់លោក Ric Edelman អ្វីដែលអ្នកត្រូវធ្វើគឺការបង្កើតនូវការវិនិយោគតាមបែបចម្រុះដោយប្រើទុនដែលមានតម្លៃទាប( Investments Using Low Cost) នៅតាមមុខជំនួញជាច្រើនដែលអ្នកពេញចិត្ត និងយល់ថា អាចរកចំណូលបានមកវិញ។ បើមិនដូច្នេះទេ អ្នកអាចដាក់ទុនជួញដូរក្នុងទីផ្សារភាគហ៊ុន (Exchange-traded Funds) ឬ មូលនិធិសង្គហៈ (Mutual Funds-ជាមូលនិធិដែលគ្រប់គ្រង និងវិនិយោគទុនសម្រាប់ភាគទុនិកដែលរួមទុនគ្នា ដើម្បីទិញមូលបត្រនៅលើទីផ្សារ) ហើយអាច អាចបង្កើតផលប័ត្រចម្រុះពីទីផ្សារសាកលលោក។ នេះនឹងជួយឲ្យអ្នកមានឱកាសរកប្រាក់ចំណូលច្រើនសម្រាប់ការចំណាយរាប់ទសវត្សទៅមុខ និងឈានទៅរកការសម្រេចបានភាពជោគជ័យហិរញ្ញវត្ថុ៕
ប្រភព៖ Businessinsider
