លោក សេង ពិសិដ្ឋ ស្ថាបនិកក្រុមហ៊ុន ANUSSA៖ កុំរំភើបនឹងអត្ថបទព័ត៌មានពីសហគ្រិនវ័យក្មេងជោគជ័យដែលយើងអានរាល់ថ្ងៃពេក
ដោយសារតែការរីកចម្រើនក្នុងវិស័យសហគ្រិនភាព នៅកម្ពុជានាពេលបច្ចុប្បន្ន បានធ្វើឲ្យយុវជនជាច្រើនកាន់តែមានទំនោរនិងចំណាប់អារម្មណ៍យ៉ាងខ្លាំងទៅលើវិស័យនេះ។
ទន្ទឹមគ្នានោះផងដែរ យើងក៏ឃើញមានការចុះផ្សាយអត្ថបទព័ត៌មានទាក់ទងនឹងភាពជោគជ័យរបស់សហគ្រិនវ័យក្មេងជាហូរហែ ដែលនេះក៏ជាហេតុផលមួយដែលជម្រុញទឹកចិត្តឲ្យយុវជនកាន់តែចង់ចូលប្រឡូកនៅក្នុងវិស័យនេះ។ ដោយឡែក លោក សេង ពិសិដ្ឋ ស្ថាបនិកក្រុមហ៊ុន ANUSSAបានលើកឡើងថា យើងមិនត្រូវរំភើបនឹងអត្ថបទព័ត៌មានដែលគេផ្សាយពីសហគ្រិនវ័យក្មេងជោគជ័យដែលយើងអានរាល់ថ្ងៃពេកនោះទេ។
នៅក្នុងកម្មវិធីសន្និសីទរៀនធ្វើជំនួញលើកទី៣ ដែលទើបបញ្ចប់កាលពីពេលថ្មីៗនេះ លោក សេង ពិសិដ្ឋ ស្ថាបនិកក្រុមហ៊ុន ANUSSA បានចែករំលែកដល់អ្នកចូលរួមថា សន្និសីទលើកទី៣ នេះគឺចង់ឲ្យអ្នកចូលរួមយល់ដឹងពីមូលដ្ឋាននៃការធ្វើជំនួញ ព្រោះមិនចង់ឲ្យអ្នកគ្រប់គ្នារំភើបនៅពេលដែលឃើញគេអស្ចារ្យ ឃើញកាសែតចុះផ្សាយថាយុវជនអាយុ ២០ឆ្នាំស្ដើងមានជំនួញ៤ទៅ៥នៅក្នុងដៃ មានចំណូលរាប់ពាន់ដុល្លាក្នុងមួយខែ តែនៅពីក្រោយនោះយើងមិនបានដឹងទេថាមុននឹងបានចំណូលរាប់ពាន់ដុល្លារ តើគេត្រូវការចំណាយដើមទុនប៉ុន្មាន? ហើយមួយទៀតដែលមនុស្សភាគច្រើនគួរដឹងនោះគឺថា ចំណេញដែលគេប្រាប់យើង មិនមែនជាចំណេញពិតប្រាកដទេ ព្រោះគេខ្លាចយើងចម្លងគំនិតរកស៊ីពីគេ។
ស្ថាបនិកវ័យក្មេងរូបនេះបន្តទៀតថា រាល់អត្ថបទព័ត៌មានដែលគេចុះផ្សាយ ពេលដែលយើងមើលហើយ ត្រូវពិចារណាឲ្យច្បាស់លាស់ផង បើឃើញគេផ្សាយថាយុវជនវ័យក្មេងមានជំនួញ ៤ ទៅ៥នៅក្នុងដៃ យើងត្រូវមើលថាតើគាត់ចូលធ្វើជំនួញនៅអាយុប៉ុន្មាន? ព្រោះថាមុខជំនួញមួយត្រូវការពេលយ៉ាងហោចណាស់ក៏ ៣ទៅ៤ឆ្នាំដែរដើម្បីឲ្យវាបានរឹងមាំ ហើយបើគាត់ទើបតែអាយុប៉ុណ្ណឹងតែមានជំនួញច្រើនក្នុងដៃសួរថាតើជំនួញនិមួយៗនោះរឹងមាំហើយឬនៅ?
លោកបានបន្ត ដោយសង្កត់ធ្ងន់ទៀតថា ៖«ដូច្នេះយើងកុំចេះតែរំភើប ហើយចង់ធ្វើជំនួញទៅតាមអត្ថបទដែលយើងអានរាល់ថ្ងៃនោះ ព្រោះថានៅពេលដែលយើងខាតបង់ គឺគ្មានអ្នកណាមកជួយយើងទេ ដូច្នេះ ហើយយើងត្រូវសួរខ្លួនឯងឲ្យច្បាស់ថាតើ យើងចង់បានអ្វីពីការធ្វើអាជីវកម្ម អ្នកខ្លះធ្វើជំនួញព្រោះចង់បានលុយ អ្នកខ្លះចង់បានកិត្តិយស ហើយអ្នកខ្លះទៀតចង់បានសេរីភាព ដូច្នេះយើងត្រូវសួរខ្លួនឯងឲ្យច្បាស់ព្រោះគោលដៅរបស់មនុស្សម្នាក់ៗគឺខុសគ្នា»៕ អត្ថបទ៖ ជួប ស្រីរ័ត្ន
