អាហារល្វីងទាំង៤ប្រភេទដែលមានប្រយោជន៍ដល់សុខភាពរបស់អ្នក
ថ្វីត្បិតតែអាហារដែលមានរសជាតិល្វីង មិនសូវជាទីចូលចិត្តរបស់មនុស្សមួយចំនួន និងធ្វើឲ្យពួកគេពិបាកក្នុងការទទួលទាន ប៉ុន្តែអាហារដែលមានរសល្វីងសម្បូរដោយសារធាតុបំប៉ន និងមានសារធាតុគីមីជាច្រើនប្រភេទដែលមានអត្ថប្រយោជន៍សម្រាប់សុខភាព។ ខាងក្រោមនេះគឺជាអាហារល្វីងទាំង៤ប្រភេទដែលមានប្រយោជន៍ដល់សុខភាពរបស់អ្នក៖
១) ម្រះ៖ បើទោះជាផ្លែម្រះមានរសជាតិល្វីង ក៏ប៉ុន្តែសារធាតុគីមីដែលមាននៅក្នុងផ្លែម្រះដូចជា triterpenoids, polyphenol និងflavonoids ត្រូវបានគេរកឃើញថាអាចពន្យឺតការលូតលាស់របស់កោសិកាមហារីកជាច្រើនប្រភេទ។ មិនតែប៉ុណ្ណោះសារធាតុទាំងនេះក៏ត្រូវបានគេយកទៅប្រើប្រាស់នៅក្នុងឱសថសម្រាប់កាត់បន្ថយកម្រិតជាតិស្ករក្នុងឈាមរបស់អ្នកជំងឺទឹកនោមផ្អែមផងដែរ។ ផ្លែម្រះក៏សម្បូរដោយសារធាតុប្រឆាំងនឹងអុកស៊ីតកម្មដែលជួយការពារការខូចខាតកោសិកាដែលបណ្ដាលមកពីពពួករ៉ាឌីកាល់សេរី ថែមទាំងអាចកាត់បន្ថយហានិភ័យពីជំងឺបេះដូងនិងជំងឺទឹកនោមផ្អែមផងដែរ។
២) កាហ្វេ៖ ដូចដែលអ្នកបានដឹងស្រាប់ហើយថាកាហ្វេគឺជាភេសជ្ជៈមួយប្រភេទដែលទទួលបានការពេញនិយមជាងគេបំផុតនៅជុំវិញពិភពលោក។ យ៉ាងណាមិញអ្វីដែលមនុស្សភាគច្រើនមិនសូវដឹងនោះគឺ កាហ្វេក៏មានអត្ថប្រយោជន៍សម្រាប់សុខភាពរបស់ពួកគេផងដែរ។ កាហ្វេមានជាតិអាស៊ីដchlorogenic ដែលអាចកាត់បន្ថយហានិភ័យពីជំងឺបេះដូងនិងជំងឺទឹកនោមផ្អែម។ ម្យ៉ាងទៀតការសិក្សាមួយចំនួនទៀតក៏បានរកឃើញដែរថា កាហ្វេអាចជួយការពារភាពមិនប្រក្រតីនៃសរសៃប្រសាទ ដែលមានដូចជាជំងឺវង្វេងភ្លេចភ្លាំង និងភាពមិនប្រក្រតីនៃមជ្ឈមណ្ឌលប្រសាទដែលប៉ះពាល់ដល់ការធ្វើចលនា។
៣) ប្រូកូលី៖ ប្រូកូលីគឺជាបន្លែដែលមានសុខភាពល្អមួយប្រភេទ ដែលមានវីតាមីនសេខ្ពស់ និងជាតិសរសៃ ព្រមទាំងសម្បូរដោយសារធាតុប្រឆាំងនឹងអុកស៊ីតកម្មដែលជួយធ្វើឲ្យបន្លែនេះទទួលបានការពេញនិយមក្នុងការជួយទប់ស្កាត់ជំងឺមហារីក។
៤) កាកាវ៖ ម្សៅកាកាវដែលត្រូវបានផលិតចេញមកពីផ្លែកាកាវ ត្រូវបានគេយកទៅយកធ្វើជាសូកូឡា និងប្រើប្រាស់នៅក្នុងបង្អែមជាច្រើនប្រភេទ។ កាកាវសុទ្ធមានរសជាតិល្វីងខ្លាំង។ សារធាតុគីមីដូចជា polyphenols និងសារធាតុប្រឆាំងនឹងអុកស៊ីតកម្មដែលមាននៅក្នុងកាកាវ ត្រូវបានគេរកឃើញថាអាចពង្រីកសរសៃឈាម និងការពារបេះដូង។ ម្យ៉ាងទៀតវាក៏មានសារធាតុខនិជដូចជា ទង់ដែង ម៉ង់កាណែស ម៉ាញេស្យូម និងដែក។ ទទួលទានសូកូឡាដែលមានធាតុផ្សំពីម្សៅកាកាវខ្ពស់ និងមានជាតិស្ករទាប នឹងធ្វើឲ្យអ្នកទទួលបានអត្ថប្រយោជន៍ច្រើនពីវា៕
ដោយ៖ ស្រីពៅ
