ការណែនាំ ៤យ៉ាងអំពីសុខភាពដែលអ្នកគួរតែផ្លាស់ប្ដូរទម្លាប់ចេញ
ពួកយើងទាំងអស់គ្នាសុទ្ធតែចង់រស់នៅប្រកបដោយសុខភាពល្អ។ ហេតុនេះហើយទើបយើងតែងប្រតិបត្តិតាមការណែនាំផ្សេងៗដើម្បីធ្វើឲ្យសុខភាពរបស់យើងបានល្អប្រសើរ។ ប៉ុន្តែក្នុងចំណោមការណែនាំអំពីសុខភាពដែលអ្នកធ្លាប់ដឹងនិងប្រតិបត្តិតាម តើការណែនាំណាខ្លះដែលអ្នកគួរតែជម្រុះចោលនិងផ្លាស់ប្ដូរចេញ ?
១) ការរត់មានផលល្អសម្រាប់មនុស្សគ្រប់គ្នា៖ វាមិនសុទ្ធតែមានផលល្អសម្រាប់មនុស្សគ្រប់គ្នានោះទេ ជាពិសេសវាអាចមានគ្រោះថ្នាក់សម្រាប់មនុស្សដែលដាក់សម្ពាធខ្លាំងទៅលើកែងជើងរបស់ពួកគេ មនុស្សធាត់លើសទម្ងន់ និងមនុស្សដែលមានបាតជើងមិនរាបស្មើ។ មិនតែប៉ុណ្ណោះការរត់អាចបង្កឲ្យមានបញ្ហាបេះដូងសម្រាប់មនុស្សចាស់ថែមទៀតផង។ ជាការល្អអ្នកគួរតែរត់រយៈពេលពី៣០ទៅ៥០នាទីក្នុង១ថ្ងៃបានហើយ។
២) អ្នកគួរតែហាត់ប្រាណឲ្យបានរៀងរាល់ថ្ងៃ៖ នៅពេលអ្នកហាត់ប្រាណញឹកញាប់ពេក សាច់ដុំរបស់អ្នកមិនមានឱកាសដើម្បីសម្រាក ដែលអាចធ្វើឲ្យប៉ះពាល់ដល់សាច់ដុំរបស់អ្នកបាន។ ប៉ុន្តែអ្នកអាចហាត់យូហ្កា ឬធ្វើចលនាដៃជើងបន្តិចបន្តួចជារៀងរាល់ព្រឹកបាន។ សម្រាប់ការធ្វើលំហាត់ប្រាណដែលប្រើកម្លាំងខ្លាំងៗ អ្នកវិទ្យាសាស្ត្របានណែនាំឲ្យហាត់តែ៥ម៉ោងក្នុង១សប្ដាហ៍ទើបជាការល្អ។
៣) អ្នកគួរតែតមអាហារពេលល្ងាច៖ មានមនុស្សជាច្រើនយល់ថាវាមិនមែនជាការល្អនោះឡើយក្នុងការទទួលទានអាហារពេលល្ងាច។ ប៉ុន្តែការសិក្សាសម័យទំនើបបានរកឃើញថា ការតមមិនទទួលទានអាហារពេលល្ងាចធ្វើឲ្យការរំលាយអាហាររបស់អ្នកចុះខ្សោយ ហើយធ្វើឲ្យកម្រិតជាតិស្ករក្នុងឈាមធ្លាក់ចុះ ធ្វើឲ្យអ្នកអស់កម្លាំង និងធ្វើឲ្យអ្នកញាំុច្រើនសម្រាប់អាហារពេលព្រឹកនៅថ្ងៃបន្ទាប់។ ជាជាងតមមិនទទួលទានទាំងស្រុង អ្នកគួរតែទទួលទានបន្តិចបន្តួចនូវអាហារដែលមានសុខភាពល្អដូចជា បនែ្ល និងប្រូតេអ៊ីនទើបវាមិនមានផលប៉ះពាល់ដល់សុខភាពរបស់អ្នក។
៤) បើអ្នកបែកញើសកាន់តែច្រើនប៉ុណ្ណា នោះអ្នកនឹងសម្រកទម្ងន់បានកាន់តែរហ័សប៉ុននោះ៖ តាមការពិតបរិមាណនៃការបែកញើសមិនមានឥទ្ធិពលអ្វីទៅលើប្រសិទ្ធភាពនៃការហ្វឹកហាត់របស់អ្នកនោះឡើយ។ ជាក់ស្ដែងដូចជាការរត់ ថ្វីត្បិតតែអ្នកបែកញើសជោគនៅពេលរត់ក៏ដោយ ក្នុងរយៈពេល១ម៉ោងអ្នកអាចដុតកាឡូរីបានចន្លោះពី២៧០ទៅ៣០០កាឡូរី ខណៈពេលដែលលំហាត់ប្រាណដែលមិនសូវចេញញើសដូចជាការលើកដុំដែក ក្នុងរយៈពេល១ម៉ោងដូចគ្នា អាចដុតកាឡូរីបានប្រហែល៣៦០ឯណោះ៕
ដោយ៖ ស្រីពៅ
