តើពន្ធប៉ាតង់ត្រូវបង់នៅកន្លែងណា? នៅពេលណា?
នៅលើកមុនប្រិយមិត្តបានស្វែងយល់រួចមកហើយថា អ្វីទៅជាពន្ធប៉ាតង់ និងរបៀបគណនាពន្ធប៉ាតង់។ នៅថ្ងៃនេះ លោកអ្នកនឹងទទួលបានចំណេះដឹងបន្ថែមទៀតជុំវិញប្រធានបទពន្ធប៉ាតង់នេះ។
១.តើត្រូវបង់ពន្ធប៉ាតង់នៅកន្លែងណា? ការបង់ពន្ធប៉ាតង់ត្រូវធ្វើឡើងនៅទីតាំងដូចខាងក្រោម៖ ក.សហគ្រាស ឬ អ្នកជាប់ពន្ធធំ សហគ្រាស ឬអ្នកជាប់ពន្ធធំមានជាអាទិ៍ គម្រោងវិនិយោគមានលក្ខណៈសម្បត្តិគ្រប់គ្រាន់ សាខាក្រុមហ៊ុនបរទេស ឬ ក្រុមហ៊ុនពហុជាតិ សហគ្រាសដទៃទៀតដែលមានផលរបរប្រចាំឆ្នាំចាប់ពី ២ ០០០០ លានរៀលឡើងទៅ ) ពន្ធប៉ាតង់ត្រូវបង់នៅនាយកដ្ឋានគ្រប់គ្រងអ្នកជាប់ពន្ធធំ។ ខ.សហគ្រាសធុនតូច និងសហគ្រាសធុនមធ្យម សហគ្រាសធុនតូច និងសហគ្រាសធុនមធ្យមដែលមានផលរបរប្រចាំឆ្នាំក្រោម ២ ០០០ លានរៀល ត្រូវបង់ពន្ធប៉ាតង់នៅសាខាពន្ធដារខេត្ត-ខណ្ឌដែលសហគ្រាសនោះស្ថិតនៅ ឬនៅតាមសាខាធនាគារអេស៊ីលីដាភីអិលស៊ី ឬ សាខាធនាគារកាណាឌីយ៉ាទូទាំងប្រទេស។ ចំពោះអាជីវកម្មចល័តត្រូវបង់ពន្ធប៉ាតង់នៅការិយាល័យរដ្ឋបាលសារពើពន្ធកន្លែងដែលចុះបញ្ជីអាជីវកម្ម។
២.តើពន្ធប៉ាតង់ត្រូវបង់នៅពេលណា? យោងតាមប្រកាសលេខ ១៨២១ សហវ.ប្រក ចុះថ្ងៃទី ២៩ ខែធ្នូឆ្នាំ ២០១៥ របស់ក្រសួងសេដ្ឋកិច្ច និងហិរញ្ញវត្ថុស្តីពីវិធាន និងនីតិវិធីគ្រប់គ្រងប្រមូលពន្ធប៉ាតង់ អ្នកជាប់ពន្ធទាំងអស់ ត្រូវបង់ពន្ធប៉ាតង់ដូចខាងក្រោម៖ ក.សហគ្រាសចាស់៖ ត្រូវបង់ពន្ធប៉ាតង់នៅក្នុងអំឡុងពេលចាប់ពីថ្ងៃទី ០១ ខែមករា ដល់ថ្ងៃទី ៣១ ខែមីនាជារៀងរាល់ឆ្នាំ។ ខ.សហគ្រាសថ្មី៖ អ្នកជាប់ពន្ធដែលចាប់ផ្តើមប្រកបអាជីវកម្មលើកដំបូងមានរយៈពេល ១៥ ថ្ងៃបន្ទាប់ពីមានសកម្មភាពសេដ្ឋកិច្ចបឋម ឬកាលបរិច្ឆេទនៃការចុះបញ្ជីជាមួយក្រសួងពាណិជ្ជកម្ម។
ប្រភព៖ ក្រសួងសេដ្ឋកិច្ច និងហិរញ្ញវត្ថុ
