អត្ថប្រយោជន៍ទាំង ៥យ៉ាងរបស់ ផ្កាម្ជូរព្រឹក ដែលអ្នកចាំបាច់គួរយល់ដឹង
ផ្កាម្ជូរព្រឹកគឺជារុក្ខជាតិមួយប្រភេទដែលមានដើមកំណើតនៅតំបន់អាហ្វ្រិកកណ្ដាលនិងអាហ្វ្រិកខាងលិច។ ប៉ុន្តែវាក៏អាចយកទៅដាំដុះបាននៅពាសពេញពិភពលោកផងដែរ។ វាត្រូវបានគេស្គាល់ថាផ្កាម្ជូរព្រឹកឬផ្កាក្រចៀបឬផ្កាម្ជូរល្មម។ វាសម្បូរដោយជាតិកាល់ស្យូម វីតាមីនសេ ជាតិដែក វីតាមីនបេ៣ វីតាមីនបេ២ ព្រមទាំងសម្បូរដោយសារធាតុប្រឆាំងនឹងអុកស៊ីតកម្មនិងសារធាតុខនិជទៀតផង។ ដូច្នេះ តើការទទួលទានទឹកផ្កាម្ជូរព្រឹកមានអត្ថប្រយោជន៍យ៉ាងដូចម្ដេចខ្លះចំពោះសុខភាពរបស់អ្នក ?
១) គ្រប់គ្រងសម្ពាធឈាម៖ ដោយសារតែលក្ខណៈរបស់ផ្កាម្ជូរព្រឹកមានការការពារសុខភាពបេះដូង និងកាត់បន្ថយសម្ពាធឈាម វាមានអត្ថប្រយោជន៍សម្រាប់អ្នកដែលមានសម្ពាធឈាមខ្ពស់ និងអ្នកដែលកំពុងតែប្រឈមមុខនឹងហានិភ័យពីជំងឺបេះដូង។ ដើម្បីទទួលបានប្រសិទ្ធភាពរបស់វា អ្នកគួរតែទទួលទានទឹកផ្កាម្ជូរព្រឹក២ទៅ៣ដងជារៀងរាល់ថ្ងៃ។
២) ការពារថ្លើម៖ ការសិក្សាស្រាវជ្រាវបានរកឃើញថាលក្ខណៈរបស់ទឹកផ្កាម្ជូរព្រឹកដែលជាសារធាតុប្រឆាំងនឹងអុកស៊ីតកម្ម អាចជួយដល់ការព្យាបាលជំងឺថ្លើមបាន។ សារធាតុប្រឆាំងនឹងអុកស៊ីតកម្មអាចការពាររាងកាយរបស់អ្នកពីជំងឺ ព្រោះថាពួកវាអាចទប់ទល់ជាមួយពពួករ៉ាឌីកាល់សេរីដែលមានវត្តមាននៅក្នុងកោសិកានិងជាលិការាងកាយរបស់អ្នក។
៣) សម្រាលការឈឺចុកចាប់ពីការមករដូវ៖ អត្ថប្រយោជន៍របស់ទឹកផ្កាម្ជូរព្រឹកក៏មានបន្ថែមនូវការសម្រាលការឈឺចុកចាប់ពីការមករដូវរបស់ស្ត្រីដែរ។ វាជួយរក្សាតុល្យភាពរបស់អ័រម៉ូននៅក្នុងរាងកាយ ដែលមានប្រយោជន៍ដល់ការសម្រាលការឈឺចុកចាប់របស់ស្ត្រីនៅពេលមករដូវម្ដងៗ។ យ៉ាងណាមិញ សម្រាប់ស្ត្រីដែលមានផ្ទៃពោះ មិនបានការណែនាំឲ្យទទួលទានទឹកផ្កាម្ជូរព្រឹកនេះឡើយ ព្រោះថាវាអាចកាត់បន្ថយកម្រិតអឺស្ត្រូហ្សែន ដែលអាចប៉ះពាល់ដល់សមត្ថភាពបង្កកំណើតបាន។
៤) ជួយព្យាបាលជំងឺផ្លូវចិត្ត៖ ទទួលទានទឹកផ្កាម្ជូរព្រឹកអាចបន្ធូរស្រាលប្រព័ន្ធប្រសាទ និងអាចកាត់បន្ថយការអន្ទះអន្ទែងនិងវិបត្តិផ្លូវចិត្តរបស់មនុស្សដែលមានការកង្វាយកង្វល់ចិត្តច្រើនបាន។
៥) ជួយសម្រួលដល់ការរំលាយអាហារ៖ មនុស្សជាច្រើនបានប្រើប្រាស់ទឹកផ្កាម្ជូរព្រឹកដើម្បីដោះស្រាយជាមួយបញ្ហារំលាយអាហាររបស់ពួកគេ។ ទឹកផ្កាម្ជូរព្រឹកជួយធ្វើឲ្យការបន្ទោបង់និងចលនារបស់ពោះវៀនមានភាពទៀងទាត់។ វាក៏អាចជួយសម្រួលអាការទល់លាមក និងជួយធ្វើឲ្យប្រព័ន្ធពោះវៀនរបស់អ្នកបានប្រសើរឡើងផងដែរ៕
ដោយ៖ ស្រីពៅ
