ចង់ដឹងថាខ្លួនឯងចោលម្សៀតឬអស្ចារ្យប៉ុណ្ណា កុំភ្លេចសួរខ្លួនឯង៣សំនួរនេះ
ពេលវេលាដើរលឿនណាស់ លឿនរហូតដល់ថ្នាក់មិនគួរឲ្យជឿ។ ប្រសិនបើអ្នកមិនបានត្រៀមខ្លួនឲ្យរួចរាល់ ឬ ចេះប្រើពេលវេលាឲ្យមានប្រយោជន៍ទេ អ្នកនឹងក្លាយជាមនុស្សគ្មានបានការ និង រស់នៅគ្រាន់តែចាំថ្ងៃស្លាប់ប៉ុណ្ណោះ។ ដូច្នេះហើយ ដើម្បីជៀសឲ្យឆ្ងាយពីជីវិតគ្មានបានការ អ្នកត្រូវតែចំណាយពេល សួរខ្លួនឯង៣សំនួរនេះ៖
១) មកដល់ពេលនេះមានអាយុប៉ុន្មានហើយ?៖ សំនួរនេះហាក់ដូចជាកំប្លែង ហើយប្រហែលអ្នកអាចនឹងគិតថា គ្មានប្រយោជន៍អ្វីទាំងអស់។ ប៉ុន្តែសូមកុំភ្លេចថា មានមនុស្សមិនតិចនោះទេ កំពុងតែបណ្តោយខ្លួនធ្វើរឿងគ្មានប្រយោជន៍ជាច្រើន ព្រោះគិតថា ខ្លួនឯងមានពេលច្រើនទៀត រហូតដល់ពេលមួយដែលសឹងតែហួសពេលអស់។ ដូច្នេះហើយ ការចោទជាសំនួរបែបនេះចំពោះខ្លួនឯង នឹងអាចជាការដាស់សតិខ្លួនឯងឲ្យរលឹកដឹងថា ខ្លួនកំពុងស្ថិតក្នុងវ័យណា និង ដំណាក់កាលមួយណាក្នុងជីវិត ដែលងាយស្រួលក្នុងការរៀបចំខ្លួនសម្រាប់អនាគត។
២) មកដល់ពេលនេះ មានសម្រេចអ្វីខ្លះហើយ?៖ បើអ្នកសាកចំណាយពេលបន្តិចដើម្បី គិតត្រួសៗអំពីកំណត់ត្រាជោគជ័យ និង សមិទ្ធផលរបស់ខ្លួន អ្នកនឹងមើលឃើញយ៉ាងច្បាស់ថា ខ្លួនឯងអស្ចារ្យប៉ុណ្ណា ឬ ចោលម្សៀតប៉ុណ្ណា។ អ្នកខ្លះរវល់តែសប្បាយភ្លេចខ្លួន រហូតបណ្តោយឲ្យពេលវេលាកន្លងផុត ដោយធ្មេចបើកៗ គឺជាងពាក់កណ្តាលជីវិតបាត់ទៅហើយ ដោយអ្វីដែលគួរឲ្យអៀនខ្មាសបំផុតនោះ គឺគ្មានឡើយកំណត់ត្រាជោគជ័យ តែសម្បួរណាស់រឿងអត់ប្រយោជន៍។ សំនួរនេះ អ្នកគួរតែសាកសួរខ្លួនឯងលេងៗ ក្រែងដឹងថា ខ្លួនឯងចោលម្សៀតប៉ុណ្ណា។
៣) ចង់បានអ្វីឲ្យប្រាកដក្នុងជីវិត?៖ អ្នកខ្លះនិយាយថា លុយគឺជារឿងសំខាន់បំផុតក្នុងជីវិត ឬ និយាយបានថា មានលុយគឺមានអ្វីៗគ្រប់យ៉ាង រួមទាំងសេចក្តីសុខផងដែរ។ មិនហ៊ានថា គំនិតនេះខុសទេ តែបើគំនិតនេះពិតជាត្រូវមែន តើហេតុអ្វីអ្នកមានៗ និង តារាល្បីៗមួយចំនួន ក្នុងលោកនេះបានសម្រេចចិត្តបញ្ចប់ជីវិតរបស់ខ្លួន ដោយចាកចោលគំនរលុយយ៉ាងច្រើនរបស់ខ្លួនយ៉ាងផុយៗបែបនេះ? មិនស្តាយទេឬ? សង្ឃឹមថា ចំណុចនេះអាចដាស់សតិរបស់អ្នកឲ្យដឹងថា អ្វីដែលសំខាន់ក្នុងជីវិតរបស់ខ្លួន ជាជាងចំណាយពេលធ្វើរឿងដែលខ្លួនមិនពេញចិត្ត ឬ ប្រឡំធំថា វាជាអ្វីដែលខ្លួនពេញចិត្ត ព្រោះឃើញមនុស្សភាគច្រើនគិតបែបនេះ៕
