ផលប៉ះពាល់ចំនួន៣ពីការទទួលទានខ្លាញ់ត្រីឬអាស៊ីដខ្លាញ់អូមេហ្កា៣ច្រើនពេក
ខ្លាញ់ត្រីដែលសម្បូរទៅដោយអាស៊ីដខ្លាញ់អូមេហ្កា៣ គឺជាសារធាតុបំប៉នដ៏ល្អបំផុតមួយដែលត្រូវបានគេរកឃើញថាមានប្រយោជន៍យ៉ាងខ្លាំងចំពោះសុខភាពបេះដូង និងព្យាបាលជំងឺជាច្រើនប្រភេទទៀត។ ទោះជាយ៉ាងណា ផលប៉ះពាល់របស់វាមិនសូវទទួលបានការដឹងឮប៉ុន្មាននោះទេ នៅពេលទទួលទានវាច្រើនពេក។ ខាងក្រោមនេះគឺជាផលប៉ះពាល់ចំនួន៣ពីការទទួលទានខ្លាញ់ត្រីឬអាស៊ីដខ្លាញ់អូមេហ្កា៣ច្រើនពេក៖
១) ច្រាលអាស៊ីដពីក្រពះ៖ ថ្វីបើអាស៊ីដអូមេហ្កា៣ត្រូវបានគេរកឃើញថាមានផលប្រយោជន៍ធំធេងចំពោះសុខភាពបេះដូង ក៏ប៉ុន្តែមនុស្សជាច្រើនបានរៀបរាប់ពីអាការផ្សាក្ដៅនៅលើបរិវេណដើមទ្រូងក្រោយពីទទួលទានថ្នាំបំប៉នខ្លាញ់ត្រី។ រោគសញ្ញាដទៃទៀតនៃការច្រាលអាស៊ីដពីក្រពះមានដូចជា វិលមុខ ភើ និងមិនសូវស្រួលពោះ ដែលបណ្ដាលមកពីបរិមាណអាស៊ីដខ្លាញ់ខ្ពស់នៅក្នុងខ្លាញ់ត្រី ដែលធ្វើឲ្យការរំលាយអាហាររបស់អ្នកមិនរំលាយ។ យ៉ាងណាមិញ ការទទួលទានខ្លាញ់ត្រីក្នុងបរិមាណសមល្មមអាចកាត់បន្ថយរោគសញ្ញាទាំងនេះបាន និងអាចសម្រួលដល់ការរំលាយអាហាររបស់អ្នក បើសិនជាអ្នកបែងចែកខ្លាញ់ត្រីជាចំណែកតូចៗសម្រាប់ទទួលទានពេញមួយថ្ងៃ។
២) ឡើងទម្ងន់៖ ក្នុងបរិមាណសមល្មម ខ្លាញ់ត្រីត្រូវបានគេរកឃើញថាមានផលប្រយោជន៍សម្រាប់ការបញ្ចុះទម្ងន់។ យ៉ាងណាមិញ នៅពេលទទួលទានច្រើនពេក វាអាចជាមូលហេតុនៃការឡើងទម្ងន់ទៅវិញបាន ព្រោះដោយសារតែវាសម្បូរអាស៊ីដខ្លាញ់ និងមានកាឡូរីខ្ពស់។
៣) ពុលវីតាមីនអា៖ ខ្លាញ់ត្រីប្រភេទមួយចំនួនសម្បូរវីតាមីនអា ដែលការទទួលទានវាច្រើនពេកអាចបង្កឲ្យអ្នកពុលបាន។ រោគសញ្ញានៃការពុលវីតាមីនអាមានដូចជា វិលមុខ ឈឺសន្លាក់ និងក្រហាយស្បែកជាដើម។ នៅក្នុងរយៈពេលវែង ការពុលវីតាមីនអាអាចបណ្ដាលឲ្យខូចដល់ថ្លើមបាន។ ហេតុនេះហើយអ្នកត្រូវទទួលទានវាក្នុងបរិមាណសមល្មមដើម្បីចៀសវាងពីគ្រោះថ្នាក់ទាំងនេះ៕
ដោយ៖ ស្រីពៅ
