របស់ប្រើប្រាស់ប្រចាំថ្ងៃទាំង ៣ដែលមានផលប៉ះពាល់ចំពោះសុខភាពរបស់យើង
ជាច្រើនលើកដែលយើងបានធ្លាក់ទៅក្នុងការអូសទាញបញ្ចុះបញ្ចូលរបស់ការឃោសនាផលិតផលផ្សេងៗនៅលើបណ្ដាញសង្គមឬទូរទស្សន៍។ មានផលិតផលខ្លះមានគុណវិបត្តិចំពោះសុខភាពរបស់យើងនៅក្នុងរយៈពេលវែងដោយមិនដឹងខ្លួនបាន។ ខាងក្រោមនេះគឺជារបស់ប្រើប្រាស់ប្រចាំថ្ងៃទាំង៣ដែលមានផលប៉ះពាល់ចំពោះសុខភាពរបស់យើង៖
១) សម្ភារចម្អិនអាហារដែលមិនជាប់ស្អិត៖ សារធាតុគីមីដែលត្រូវបានប្រើប្រាស់ដើម្បីកុំឲ្យជាប់ស្អិតនេះ នៅពេលវាត្រូវកម្ដៅលើសពី២៣០អង្សា ផ្ទៃនៃសម្ភារចម្អិនអាហារនឹងបញ្ចេញនូវសារធាតុគីមីដែលគ្រោះថ្នាក់ចេញមក។ អ្នកស្រាវជ្រាវរបស់ដាណឺម៉ាកបានរកឃើញថា វត្តមានរបស់សារធាតុគីមីទាំងនេះនៅក្នុងឈាមមនុស្សអាចនាំឲ្យមានការកកើតឡើងនៃកោសិកាមហារីកបាន។
២) សាប៊ូដែលប្រឆាំងនឹងបាក់តេរី៖ Triclosan គ្រឿងផ្សំដែលត្រូវបានគេប្រើប្រាស់ជាភ្នាក់ងារប្រឆាំងនឹងបាក់តេរី ថ្វីត្បិតតែត្រូវបានគេប្រើប្រាស់ក្នុងបរិមាណបន្តិចក៏ដោយ ប៉ុន្តែវាអាចធ្វើឲ្យប្រព័ន្ធភាពស៊ាំចុះខ្សោយ ធ្វើឲ្យអ័រម៉ូនបាត់បង់តុល្យភាព និងបង្កឲ្យមានជំងឺខ្សោយសាច់ដុំ។ ការស្រាវជ្រាវក៏បានរកឃើញថា ដោយមិនចាំបាច់ប្រើប្រាស់សាប៊ូដែលប្រឆាំងនឹងបាក់តេរី ការលាងសម្អាតដៃជាមួយសាប៊ូធម្មតាក៏អាចកម្ចាត់បាក់តេរីបានដែរ។
៣) ម៉ាស្ការ៉ា៖ គ្រឿងផ្សំនៅក្នុងម៉ាស្ការ៉ាមួយចំនួនដូចជា Parabens ម្សៅអាលុយមីញ៉ូម និង Propylene glycol មានគ្រោះថ្នាក់ចំពោះសុខភាពរបស់ភ្នែក។ ម្យ៉ាងទៀតអ្នកក៏ត្រូវចៀសវាងខ្ចីម៉ាស្ការ៉ារបស់មិត្តភ័ក្ដិប្រើប្រាស់ដែរ ព្រោះថាវាអាចបណ្ដាលឲ្យមានការកកើតបាក់តេរីហើយនាំទៅរកការចម្លងមេរោគបាន៕
