ទម្លាប់គ្រោះថ្នាក់ចំនួន៣ដែលយើងធ្វើដោយមិនដឹងខ្លួនជារៀងរាល់ថ្ងៃ
តើមានទម្លាប់គ្រោះថ្នាក់អ្វីខ្លះដែលយើងធ្វើដោយមិនដឹងខ្លួនជារៀងរាល់ថ្ងៃ ? ទាំងនេះគឺជាទម្លាប់ចំនួន៣ដែលត្រូវបានគេសិក្សាឃើញពីផលប៉ះពាល់របស់វា៖
១) អុជធូប៖ ការអុជធូបជះឥទ្ធិពលល្អទៅដល់មជ្ឈមណ្ឌលប្រសាទរបស់យើង ព្រោះវាអាចបន្ធូរអារម្មណ៍តានតឹងរបស់យើងបាន។ ប៉ុន្តែបើយោងតាមការស្រាវជ្រាវមួយដែលបានធ្វើឡើងនៅឯ the South China University of Technology បានរកឃើញថា ការអុជធូបជាច្រើនម៉ោងជារៀងរាល់ថ្ងៃ អាចជាមូលហេតុនៃមហារីកថ្លើម ដុះដុំសាច់ក្នុងខួរក្បាល និងមហារីកគ្រាប់ឈាម។ ធូបមានសារធាតុគីមីដែលអាចធ្វើឲ្យមានការបម្រែបម្រួលនៃហ្សែនបាន។ ដូច្នេះបើអ្នកចង់អុជធូប អ្នកមិនគួរអុជច្រើនពេកនោះទេ អ្នកគួរអុជតែបន្តិច ហើយបើកទ្វារឬបង្អួចឲ្យមានខ្យល់ចេញចូល។
២) ទទួលទានភេសជ្ជៈប៉ូវកម្លាំងច្រើនពេក៖ ភេសជ្ជៈប៉ូវកម្លាំងអាចបង្កើនថាមពលអ្នកនិងបង្កើនប្រសិទ្ធភាពរបស់អ្នកបាន។ ប៉ុន្តែតាមការសិក្សារបស់ the University of Pacific បានបង្ហាញថាភេសជ្ជៈប៉ូវកម្លាំងមួយចំនួនអាចបង្កើនហានិភ័យពីការប្រឈមមុខនឹងភាពមិននឹងននៃចង្វាក់បេះដូងបាន។ ហេតុនេះអ្នកមិនគួរទទួលទានវាច្រើនពេកនិងញឹកញាប់ពេកនោះទេ។
៣) ចិតសម្បកផ្លែប៉ោមចោល៖ ១០០%នៃសារធាតុប្រឆាំងនឹងអុកស៊ីតកម្មមួយប្រភេទដែលគាំទ្រទៅដល់សុខភាពបេះដូងគឺនៅត្រង់សម្បករបស់ផ្លែប៉ោមនេះឯង។ ការទទួលទានផ្លែប៉ោមទាំងសម្បកអាចការពារពីជំងឺធ្ងន់ធ្ងរដែលមានទំនាក់ទំនងនឹងប្រព័ន្ធបេះដូងបាន។ តែអ្នកមិនត្រូវភ្លេចថាត្រូវលាងសម្អាតវាឲ្យស្អាតមុនពេលទទួលទាន៕
ដោយ៖ ស្រីពៅ
