អាហារ៥យ៉ាងដែលជួយឲ្យអ្នកគេងលក់ស្រួល
មានមនុស្សមិនតិចទេនៅជុំវិញពិភពលោកដែលកំពុងតែជួបប្រទះនឹងបញ្ហាគេងមិនលក់។ ស្ថានភាពរបស់អ្នកខ្លះអាចមកពីការគិតខ្វាយខ្វល់ច្រើន អ្នកខ្លះវិញអាចជាលទ្ធផលបណ្ដាលមកពីស្ថានភាពជំងឺផ្សេងទៀត ឬក៏អាចមកពីបរិយាកាសនៅក្នុងបន្ទប់គេងរបស់គាត់មិនអំណោយផលដល់ការគេង។ ទោះជាយ៉ាងណាបើសិនជាអ្នកមានបញ្ហាគេងមិនលក់ អ្នកអាចសាកល្បងទទួលទានអាហារខាងក្រោមនេះ ដើម្បីឲ្យការគេងរបស់អ្នកបានលក់ស្រួលវិញ៖
១) ដំឡូងជ្វា៖ ដំឡូងជ្វាគឺជាប្រភពអាហារដ៏ល្អសម្រាប់ទទួលបាននូវជាតិប៉ូតាស្យូម ម៉ាញេស្យូម និងកាល់ស្យូម ដែលអាចជួយដល់ការគេងរបស់អ្នក។ ដើម្បីទទួលបានប្រសិទ្ធភាពនេះ អ្នកអាចយកដំឡូងជ្វាទៅស្ងោរសម្រាប់ធ្វើជាអាហារពេលល្ងាចបាន។
២) តៅហ៊ូ៖ តៅហ៊ូសម្បូរដោយសមាសធាតុម្យ៉ាងហៅថា isoflavones ដែលត្រូវបានគេរកឃើញថាជួយដល់ការគេងរបស់អ្នកបាន។ ម្យ៉ាងទៀតវាក៏មិនមានជាតិកូឡេស្តេរ៉ុល និងថែមទាំងជាប្រភពដ៏ល្អសម្រាប់ទទួលយកជាតិកាល់ស្យូមនិងជាតិដែកផងដែរ។
៣) ត្រសក់ស្រូវ៖ កង្វះជាតិទឹកក៏អាចជះឥទ្ធិពលទៅលើការគេងរបស់អ្នក ហេតុនេះការទទួលទានផ្លែឈើដែលសម្បូរជាតិទឹកដូចជាផ្លែត្រសក់ស្រូវនេះ អាចជួយឲ្យអ្នកឆាប់គេងលក់បាន។
៤) តែក្ដៅ៖ តែក្ដៅមានសមត្ថភាពអាចធ្វើឲ្យសរសៃប្រសាទរបស់អ្នកបន្ធូរស្រាល ហើយវាក៏ជួយបំពេញជាតិទឹកក្នុងរាងកាយរបស់អ្នកដែរ។ ក្នុងនោះតែខ្ញី ឬតែជីអង្កាម អាចជាជម្រើសដ៏ល្អបំផុតសម្រាប់សម្រួលដល់ការគេងរបស់អ្នក។
៥) គ្រាប់អាល់មន៖ គ្រាប់អាល់មនមានសមាសធាតុtryptophan និងម៉ាញេស្យូម ដែលអាចជួយកាត់បន្ថយដំណើរការរបស់សាច់ដុំនិងសរសៃប្រសាទ និងជួយថែទាំចង្វាក់បេះដូងឲ្យមានតុល្យភាពផងដែរ៕
ដោយ៖ ស្រីពៅ
