អាហារទាំងនេះហើយ ដែលអ្នកត្រូវប្រុងប្រយ័ត្ន ពីផលប៉ះពាល់របស់វាចំពោះសុខភាពធ្មេញអ្នក
ដូចគ្នានឹងផ្នែកដទៃទៀតនៃសារពាង្គកាយរបស់យើង ធ្មេញក៏ត្រូវការការថែទាំដោយយកចិត្តទុកដាក់ មិនថាជាការដុសសម្អាត និងជាអាហារដែលអ្នកបរិភោគនោះទេ ដើម្បីឲ្យវាមានសុខភាពល្អ។ អាហារដែលសម្បូរវីតាមីន A និង D កាល់ស្យូម ផូស្វ័រ និងជាតិសរសៃ សុទ្ធតែជួយការពារ និងពង្រឹងធ្មេញឲ្យរឹងមាំ។ យ៉ាងណាមិញ អាហារមួយចំនួនវិញនឹងធ្វើឲ្យធ្មេញឆាប់សឹកពុកផុយ។ តើអាហារដែលអ្នកគួរចៀសវាងទាំងនោះមានអ្វីខ្លះ ?
១) អាហារដែលមានជាតិអាស៊ីដ៖ តួយ៉ាងដូចជាទឹកក្រូចឆ្មារ ឬទឹកក្រូចច្របាច់ជាដើម ថ្វីត្បិតតែវាមានគុណសម្បត្តិជាច្រើនយ៉ាងចំពោះសុខភាពរបស់អ្នក ប៉ុន្តែវាក៏មានគុណវិបត្តិដែលធ្វើឲ្យធ្មេញរបស់អ្នកឆាប់សឹកពុកផុយដែរ។ ប៉ុន្តែ បើអ្នកចង់ទទួលទានវា អ្នកត្រូវទទួលទានវាមុនពេលដុសធ្មេញរយៈពេល៣០នាទី។
២) ភេសជ្ជៈប៉ូវកម្លាំង៖ ដូចគ្នានឹងទឹកក្រូចកំប៉ុងដែរ ភេសជ្ជៈប៉ូវកម្លាំងសម្បូរដោយស្ករ ដែលនៅក្នុងភេសជ្ជៈប៉ូវកម្លាំងខ្លះប្រើប្រាស់ស្កររហូតដល់ទៅ១៣ស្លាបព្រាកាហ្វេក្នុង១កំប៉ុង ហើយវាមានផលប៉ះពាល់អវិជ្ជមានជាខ្លាំងចំពោះធ្មេញ។ ឯការសិក្សាខ្លះក៏បានរកឃើញថា ភេសជ្ជៈប៉ូវកម្លាំងមានជាតិអាស៊ីដខ្ពស់ជាងទឹកក្រូចកំប៉ុងទៅទៀត ដែលវាងាយធ្វើឲ្យធ្មេញឆាប់ពុកផុយបាន។ អាល់កុលក៏ដូចគ្នាដែរ វាអាចធ្វើឲ្យធ្មេញឆាប់ពុកផុយ និងមានការឆ្លងមេរោគក្នុងមាត់។
៣) ជ្រក់ត្រសក់៖ ដើម្បីធ្វើជ្រក់ត្រសក់ គេប្រើប្រាស់ទឹកខ្មេះ ដែលជាតិអាស៊ីដនៅក្នុងទឹកខ្មេះនេះក៏មានផលប៉ះពាល់ដល់ធ្មេញដែរ។ ហេតុនេះ បើអ្នកចង់ទទួលទាន អ្នកក៏មិនគួរទទួលទានវាច្រើនពេកនោះដែរ។
៤) ដំណាប់ផ្លែឈើ៖ ជាតិស្ករនៅក្នុងដំណាប់ផ្លែឈើ នឹងទៅចិញ្ចឹមបាក់តេរីមិនល្អដែលមាននៅក្នុងមាត់របស់អ្នក។ ម្យ៉ាងទៀត ដំណាប់ផ្លែឈើមានជាតិស្អិត ដែលធ្វើឲ្យវាងាយនឹងជាប់ធ្មេញរបស់អ្នកបានយូរ ហើយបណ្ដាលឲ្យបាក់តេរីកាន់តែច្រើនប្រមូលផ្ដុំគ្នានៅក្នុងធ្មេញ។ ជាជាងដំណាប់ផ្លែឈើ អ្នកគួរតែងាកមកទទួលទានផ្លែឈើស្រស់ៗទើបជាការប្រសើរសម្រាប់សុខភាពធ្មេញ។
៥) ដុំទឹកកក៖ ដុំទឹកកកសម្រាប់ប្រើប្រាស់ឲ្យទឹកត្រជាក់ ប៉ុន្តែបើអ្នកយកដុំទឹកកកមកទំពា នោះវាអាចធ្វើឲ្យធ្មេញរបស់អ្នកខូចបាន ព្រោះវាគឺជាវត្ថុរឹង៕
ដោយ៖ ស្រីពៅ អត្ថបទទាក់ទង៖ ទាំងនេះគឺជាអាហារដែលសម្បូរជាតិប្រូតេអ៊ីនចំនួន៥ ដែលអ្នកអាចរកបានដោយមិនចាំបាច់ចំណាយច្រើន
