គុណសម្បត្តិ ៤យ៉ាងដែលអ្នកអាចទទួលបានពីកម្ដៅថ្ងៃ
ការប៉ះត្រូវកម្ដៅថ្ងៃច្រើនពេកអាចផលអវិជ្ជមានចំពោះស្បែករបស់អ្នក ប៉ុន្តែមានការសិក្សាជាច្រើនសុទ្ធតែបានអះអាងពីប្រយោជន៍របស់កម្ដៅថ្ងៃនៅពេលអ្នកទទួលវាសមល្មមជាប្រចាំថ្ងៃ។ ខាងក្រោមនេះគឺជាគុណសម្បត្តិ៤យ៉ាងដែលអ្នកអាចទទួលបានពីកម្ដៅថ្ងៃ៖
១) នៅពេលស្បែករបស់អ្នកប៉ះត្រូវនឹងកាំរស្មីស្វាយអ៊ុលត្រាB របស់ពន្លឺព្រះអាទិត្យ វានឹងផលិតវីតាមីនD ដែលវីតាមីននេះចាំបាច់សម្រាប់ការលូតលាស់របស់ឆ្អឹងនិងការការពារពីជំងឺពុកឆ្អឹង។
២) ការប៉ះត្រូវនឹងកាំរស្មីពន្លឺព្រះអាទិត្យខ្លាំងពេកអាចបណ្ដាលឲ្យមានមហារីកស្បែក តែបើសិនជាក្នុងកម្រិតសមល្មម នោះវីតាមីនDដែលទទួលបានមកពីស្បែកប៉ះត្រូវនឹងកម្ដៅថ្ងៃ នឹងមានប្រយោជន៍សម្រាប់ការពារពីជំងឺមហារីកនេះវិញ។
៣) អ្នកស្រាវជ្រាវមួយក្រុមពី University of Edinburgh បានរកឃើញថា សមាសធាតុនីទ្រិចអុកស៊ីតដែលជួយកាត់បន្ថយសម្ពាធឈាម ត្រូវបានឃើញមានវត្តមាននៅក្នុងសរសៃឈាមនៅពេលដែលស្បែកបានប៉ះជាមួយនឹងកម្ដៅថ្ងៃភ្លាម។ នេះបង្ហាញថា កម្ដៅថ្ងៃមានប្រយោជន៍ដល់ការកាត់បន្ថយសម្ពាធឈាមរបស់អ្នកជំងឺលើសឈាមបាន។
៤) កម្ដៅថ្ងៃក៏អាចជួយបង្កើនភាពរឹងមាំដល់ប្រព័ន្ធភាពស៊ាំរបស់អ្នកដែរ នេះក៏ព្រោះតែកោសិកាឈាមសនៅពេលដែលវាប៉ះជាមួយកម្ដៅថ្ងៃ វានឹងបង្កើនការផលិតរបស់វា ហើយកោសិកាឈាមសនេះមាននាទីប្រឆាំងនឹងជំងឺផ្សេងៗ និងការពាររាងកាយពីការឆ្លងមេរោគផ្សេងៗ៕
ដោយ៖ ស្រីពៅ សូមអាន៖ តើអ្នកធ្លាប់ដឹងឬទេថា ផ្លែអំពិលមានអត្ថប្រយោជន៍ទាំង ៦យ៉ាងនេះ?
