ហេតុអ្វីបានជាអ្នកគួរឈប់សម្លឹងមើលអេក្រង់ទូរស័ព្ទមុនពេលចូលគេង?
មនុស្សជាច្រើនមានទម្លាប់ប្រើប្រាស់ទូរស័ព្ទដៃមុនពេលពួកគេចូលគេង។ ពួកគេអាចគិតថាវាគឺជាទម្លាប់ធម្មតាមួយដែលមិនមានផលប៉ះពាល់អវិជ្ជមានអ្វីដល់ពួកគេនោះទេ។ យ៉ាងណាមិញ មានការសិក្សាជាច្រើនសុទ្ធតែគាំទ្រទៅនឹងការរកឃើញថា ការប្រើប្រាស់ទូរស័ព្ទមុនពេលចូលគេងមានផលប៉ះពាល់ចំពោះដំណេករបស់អ្នក។ តើមានហេតុផលអ្វីខ្លះបានជាវាមានផលអវិជ្ជមានចំពោះការគេងរបស់អ្នក ?
១) ដំណេករបស់អ្នកនឹងមានគុណភាពទាប៖ ពន្លឺពណ៌ខៀវដែលជះចេញពីអេក្រង់ទូរស័ព្ទរបស់អ្នក មានឥទ្ធិពលធ្វើឲ្យការផលិតរបស់អ័រម៉ូនមេឡាតូនីន ដែលជាអ័រម៉ូនធ្វើឲ្យអ្នកមានអារម្មណ៍អស់កម្លាំងចូលគេង និងជួយរក្សាវដ្ដនៃការគេងរបស់អ្នកឲ្យមានភាពទៀងទាត់ ត្រូវចុះថយជាងមុន។ នេះគឺជាមូលហេតុមួយដែលធ្វើឲ្យការសម្លឹងអេក្រង់ទូរស័ព្ទច្រើនម៉ោងមុនពេលចូលគេង អាចប៉ះពាល់ដល់ការគេងរបស់អ្នក និងធ្វើឲ្យប្រសិទ្ធភាពការងារចុះខ្សោយបាន។
២) ប៉ះពាល់ដល់សុខភាពទាំងក្នុងរយៈពេលខ្លីនិងវែង៖ មនុស្សត្រូវការការគេងសម្រាក ជាពិសេសគឺជាការគេងឲ្យបានគ្រប់គ្រាន់ជាប្រចាំ។ នៅពេលអ្នកមិនទទួលបានការសម្រាកឲ្យបានគ្រប់គ្រាន់ជាញឹកញាប់ វាធ្វើឲ្យការចងចាំ និងរយៈពេលនៃការផ្ចង់ស្មារតីត្រូវបានថយចុះ រួមទាំងប្រព័ន្ធភាពស៊ាំរបស់អ្នកផងដែរ ដែលធ្វើឲ្យវាងាយនឹងឆ្លងមេរោគជំងឺផ្សេងៗបាន និងនាំទៅរកហានិភ័យពីជំងឺទឹកនោមផ្អែម ជំងឺបេះដូង ជំងឺធាត់ និងជំងឺធ្លាក់ទឹកចិត្ត។
៣) ប៉ះពាល់ដល់ភ្នែក៖ ពន្លឺពណ៌ខៀវដែលជះចេញពីអេក្រង់ទូរស័ព្ទនេះក៏មានផលប៉ះពាល់ដល់ភ្នែករបស់អ្នកដែរ។ យោងតាម American Macular Degeneration Association ពន្លឺពណ៌ខៀវនេះអាចធ្វើឲ្យរ៉េទីនដែលជាស្រទាប់ខាងក្នុងបង្អស់របស់ភ្នែកមានការខូចខាតនិងនាំទៅរកការចុះខ្សោយនៃចក្ខុប្រសាទ ដែលអាចបណ្ដាលឲ្យបាត់បង់សមត្ថភាពក្នុងការមើល៕
ដោយ៖ ស្រីពៅ សូមអាន៖ យោងតាមអាយុរបស់អ្នក តើរយៈពេលប៉ុន្មានម៉ោងដែលអ្នកត្រូវគេងក្នុងមួយថ្ងៃៗ ?
