ទាំងនេះគឺជាអាហារដែលអ្នកមានបញ្ហាសម្ពាធឈាមឡើងខ្ពស់ ត្រូវប្រុងប្រយ័ត្នក្នុងការទទួលទាន
សម្ពាធឈាមឡើងខ្ពស់អាចមានមូលហេតុមកពីកត្តាជាច្រើនដូចជា ទឹកនោមផ្អែម លើសទម្ងន់ អសកម្មមិនហាត់ប្រាណ របបអាហារដែលសម្បូរជាតិខ្លាញ់ច្រើន និងអាហារដែលប្រើប្រាស់អំបិលច្រើន ទទួលទានជាតិអាល់កុល ជក់បារី និងអាចមកពីតំណហ្សែនជាដើម។
ខាងក្រោមនេះគឺជាអាហារដែលអ្នកមានបញ្ហាសម្ពាធឈាមឡើងខ្ពស់ ត្រូវប្រុងប្រយ័ត្នក្នុងការទទួលទាន៖
១) ភីហ្សា
អ្នកប្រហែលជាធ្លាប់ដឹងរួចហើយថា ការទទួលទានភីហ្សាច្រើនមិនសូវជាមានផលល្អចំពោះសុខភាពនោះទេ។ អាហារនេះក៏មានផលអវិជ្ជមានច្រើនចំពោះអ្នកដែលមានបញ្ហាកើនឡើងសម្ពាធឈាមដែរ។ ដូច្នេះបើសិនជាអ្នកចង់ទទួលទានវា នោះអ្នកគួរតែទទួលទានតែ១ចំណិត ហើយយករសជាតិណាដែលប្រើប្រាស់ឈីសតិច និងអំបិលតិច។
២) នំប៉័ង
នេះអាស្រ័យទៅលើប្រភេទនំប៉័ង ដុំនំប៉័ងខ្លះក្នុង១បន្ទះរបស់វាមានបរិមាណសូដ្យូមរហូតដល់ទៅ២៣០មីលីក្រាម ដែលស្មើនឹង១៥ភាគរយនៃកម្រិតសូដ្យូមចំនួន១៥០០មីលីក្រាមដែលត្រូវបានអនុញ្ញាតឲ្យអ្នកដែលមានកម្រិតសម្ពាធឈាមខ្ពស់ទទួលទានប្រចាំថ្ងៃ។ នេះគឺជាមូលហេតុមួយដែលអ្នកគួរតែកាត់បន្ថយការទទួលទាននំប៉័ងដើម្បីការពារកុំឲ្យទទួលទានជាតិសូដ្យូមលើសកម្រិត ដែលនាំឲ្យសម្ពាធឈាមកើនឡើងខ្ពស់បាន។
៣) អាហារនៅតាមភោជនីយដ្ឋាន
ភាគច្រើនអាហារនៅខាងក្រៅដូចជានៅតាមភោជនីយដ្ឋានផ្សេងៗ ត្រូវបានចុងភៅប្រើប្រាស់អំបិលច្រើនដើម្បីបង្កើនរសជាតិអាហាររបស់ពួកគេ។ ដូច្នេះបើអ្នកមានបញ្ហាសម្ពាធឈាមឡើង នោះអ្នកគួរតែសាកសួរចុងភៅពីគ្រឿងផ្សំដែលគេប្រើប្រាស់ ហើយស្នើសុំពួកគេឲ្យបន្ថយការប្រើប្រាស់អំបិលនៅពេលទៅទទួលទានអាហារនៅតាមភោជនីយដ្ឋានម្ដងៗ៕
ដោយ៖ ស្រីពៅ
អត្ថបទទាក់ទង៖ អាហារអ្វីខ្លះដែលមានប្រសិទ្ធភាពក្នុងការកាត់បន្ថយសម្ពាធឈាមឡើងខ្ពស់បាន ?
