បើចង់ឲ្យកូនជោគជ័យនាថ្ងៃអនាគត ត្រូវចិញ្ចឹមកូនតាមរបៀបទំនើប ៥យ៉ាងខាងក្រោមនេះ
ឪពុកម្ដាយគ្រប់រូប អ្នកណាថា មិនចង់ឲ្យកូនរបស់ខ្លួនឯងជោគជ័យនោះ? ភាពជោគជ័យរបស់កូនគឺជាក្តីបំណងដ៏ធំមួយរបស់ឪពុកម្ដាយគ្រប់រូប។ យ៉ាងណាមិញ មិនថាអ្នកតឹងរឹងយ៉ាងណានោះទេ ប្រសិនបើអ្នកចិញ្ចឹមកូន និងមិនបានលើកទឹកចិត្តត្រឹមត្រូវ កូនរបស់អ្នកច្បាស់ជាខូតជាមិនខាន។ ខាងក្រោមនេះ ជារបៀបចិញ្ចឹមកូនតាមបែបសម័យថ្មី ប្រសិនអ្នកចង់ឱ្យកូនរបស់អ្នកក្លាយជាមនុស្សឯករាជ្យនិងជោគជ័យនាថ្ងៃអនាគត៖
១) ឪពុកម្ដាយដែលបង្ហាញសិទ្ធិ តែមិនប្រើប្រាស់សិទ្ធិអំណាចនោះទេ ( Be Authoritative ) ៖ ឪពុកម្ដាយគួរបង្ហាញក្តីស្រឡាញ់និងការយកចិត្តទុកចិត្តឲ្យបានច្រើន ប៉ុន្តែត្រូវមានច្បាប់ទម្លាប់ត្រឹមត្រូវ ប៉ុន្តែមិនប្រើប្រាស់សិទ្ធិអំណាចរបស់ខ្លួនគាបសង្កត់កូនឱ្យធ្វើអ្វីតាមតែយើងគិត និងចង់បានរហូតនោះទេ។
២) កុំខ្វល់ពីរឿងកិច្ចការសាលា៖ ពិន្ទុគឺសំខាន់មែនទែន ប៉ុន្តែ សម្រាប់កូនក្មេង ឪពុកម្ដាយគួរបង្រៀនពួកគេឲ្យមានទំនួលខុសត្រូវ និងមានរបៀបរៀបរយសិន មុននឹងគិតដល់ការចង់បានពិន្ទុច្រើនតែម្ដង។ នៅពេលដែលពួកគេមានទម្លាប់ល្អ មានទំនួលខុសត្រូវ និងមានរបៀបរៀបរយកិច្ចការសាលាហើយនោះ ចាំដល់ពេលដែលឪពុកម្ដាយគិតគួរពីកិច្ចការសាលា។
៣) លើកទឹកចិត្តកូនឲ្យហ៊ាន៖ បើពួកគេអ្វីក៏ខ្លាច ពួកគេនៅតែស្ថិតនៅស្ថានភាពដដែលហ្នឹង ដែលភាសាអង់គ្លេសហៅថា Comfort Zone។ ដូច្នេះហើយ ត្រូវលើកទឹកចិត្តពួកគេឲ្យហ៊ានសាកល្បងអ្វីថ្មី ពោលគឺហ៊ានឱ្យពួកគេដើរចេញពី comfort zone។
៤) ចំណេះដឹងហិរញ្ញវត្ថុ៖ អ្នកគួរបង្រៀនពួកគេឲ្យយល់ពីសារៈសំខាន់នៃវត្ថុនិងសារៈសំខាន់នៃការសន្សំលុយ។ ដូច្នេះហើយ ពេលពួកគេធំឡើយ ពួកគេមិនចាយលុយខ្ជះខ្ជាយនិងចេះថែរក្សាវត្ថុដែលពួកគេមានថែមទៀតផង។ ជាក់ស្ដែង លោកអ្នកអាចចាប់ផ្ដើមពីការទិញកូនជ្រូក ដោយបង្រៀនពួកគេឱ្យចេះសន្សំលុយ។ ការចេះសន្សំពីតូចទៅ នឹងធ្វើឱ្យពួកគេមានទម្លាប់ដ៏ល្អលើការសន្សំនេះរហូតដល់ធំ។
៥) ឲ្យកូនធ្វើកិច្ចការផ្ទះ៖ កូនរបស់លោកអ្នកនឹងត្រូវចេះធ្វើកិច្ចការផ្ទះ ចេះជួយសម្រួលការងារក្នុងគ្រួសារ ព្រោះថាពួកគេត្រូវមានទំនួលខុសត្រូវធ្វើកិច្ចការជាច្រើននាពេលដែលធំឡើង៕
ដោយ៖ អុឹង មុយយូ
