ពិតទេដែលលុយមិនអាចទិញសេចក្ដីសុខឲ្យអ្នកបាន?
លុយមិនអាចទិញសេចក្ដីសុខឲ្យអ្នកបានឡើយ ប៉ុន្តែបើមិនមានលុយទេ នោះអ្នកក៏មិនអាចរស់នៅដោយមានសេចក្ដីសុខបានដែរ។ ប៉ុន្តែតម្លៃរបស់បុគ្គលម្នាក់ៗ មិនស្ថិតនៅត្រង់ចំនួនទឹកលុយដែលពួកគេមាននៅក្នុងហោប៉ៅឬក្នុងគណនេយ្យធនាគាររបស់ពួកគេនោះឡើយ។ បើសិនជាតម្លៃរបស់អ្នកស្ថិតនៅលើចំនួនទឹកលុយដែលអ្នកមាន នេះក៏មានន័យដូចគ្នាដែរថាតម្លៃរបស់អ្នកអាចយកលុយមកទិញដូរដូចទំនិញដែលគេដាក់លក់នៅផ្សារបានដែរហើយ។ គ្មានអ្វីអាក្រក់នៅនឹងលុយនោះទេ ប៉ុន្តែគឺរបៀបដែលមនុស្សប្រើប្រាស់លុយទៅវិញទេដែលកែប្រែលុយឲ្យក្លាយជារបស់ពិសពុលឬរបស់ល្អបាននោះ។
នរណាថាលុយមិនសំខាន់ ? បើគ្មានលុយ ម្ដេចនឹងអ្នកអាចបំពេញតម្រូវការមូលដ្ឋានដ៏ចម្បងរបស់អ្នក ដូចជាតម្រូវការក្រពះ តម្រូវការជម្រកស្នាក់នៅ តម្រូវការសំលៀកបំពាក់ជាដើមនេះ ? ថ្វីត្បិតតែលុយមិនអាចទិញសេចក្ដីសុខឲ្យអ្នកបាន តែអ្នកត្រូវការវាដើម្បីរស់។ ប៉ុន្តែលុយគួរតែត្រូវបានចាត់ទុកជាផ្នែកសំខាន់មួយនៅក្នុងការរស់រានមានជីវិតរបស់មនុស្សម្នាក់ៗ មិនមែនជាអ្វីៗគ្រប់បែបយ៉ាងនៅក្នុងជីវិតរបស់មនុស្សម្នាក់ៗឡើយ។ នេះក៏មានន័យដូចគ្នានឹងការណ៍ដែលអ្នកធ្វើជាចៅហ្វាយរបស់លុយ មិនមែនឲ្យលុយធ្វើជាចៅហ្វាយគ្រប់គ្រងអ្នកវិញនោះទេ។ មនុស្សម្នាក់ៗសុទ្ធតែមានតម្លៃរបស់ពួកគេរៀងៗខ្លួន។
យ៉ាងណាមិញ មនុស្សមួយចំនួនបានរត់ដេញចាប់តម្លៃពីខាងក្រៅ ដើម្បីមកបំពេញតម្លៃនៅខាងក្នុងខ្លួនរបស់ពួកគេដែលកំពុងតែទទេស្អាត។ នៅពេលពួកគេមិនអាចធ្វើឲ្យខាងក្នុងខ្លួនរបស់ពួកគេ ឬអត្តចរិតខាងក្នុងរបស់ពួកគេ មានតម្លៃបាន នោះពួកគេនឹងប្រើប្រាស់លុយដើម្បីទិញតម្លៃពីខាងក្រៅដើម្បីលម្អខ្លួនពួកគេឲ្យមានតម្លៃ ដែលមិនខុសអ្វីពីទំនិញដែលអាចយកលុយទៅទិញដូរបានដូច្នោះដែរ។ គ្មានបុគ្គលមានអំណាចណាម្នាក់អាចប្រឆាំងនឹងច្បាប់ធម្មជាតិមួយដែលចែងថា នៅលើលោកនេះគ្មានអ្វីជាភាពអមតនោះឡើយ។ ហេតុនេះនៅពេលដែលបុគ្គលទាំងនោះអស់សិទ្ធិអំណាចតទៀតទៅលើតម្លៃពីខាងក្រៅអស់ទាំងនោះ នោះតម្លៃរបស់ពួកគេក៏នឹងអស់តម្លៃអ្វីតទៅទៀតដែរ។ ជ័យជម្នះដែលពិបាកនឹងយកឈ្នះបំផុតនៅក្នុងជីវិត នោះគឺជាការយកឈ្នះលើខ្លួនឯង ហើយបើអ្នកអាចយកឈ្នះលើការប្រកួតប្រជែងនេះបានហើយ នោះក៏គ្មានជ័យជម្នះណាដែលមានតម្លៃលើសពីនេះទៀតដែរ៕
ដោយ៖ ស្រីពៅ
