តើមានវិធីសាស្ត្រអ្វីខ្លះ ដែលអាចឲ្យអ្នកព្យាបាលឈឺក្បាលតាមបែបធម្មជាតិបាន?
នៅពេលអ្នកទទួលអារម្មណ៍ថា ឈឺក្បាល នោះវិធីសាស្ត្រដែលអ្នកនឹកឃើញមុនគេដើម្បីបំបាត់ការឈឺចុកចាប់របស់អ្នក តែងតែជាថ្នាំពេទ្យនោះឯង។ វាជារឿងចៀសមិនផុតនោះទេ បើសិនជាអាការរបស់អ្នកមិនសភាពធ្ងន់ធ្ងរខ្លាំង។ យ៉ាងណាមិញ ការទទួលទានថ្នាំពេទ្យច្រើននឹងបង្កើតភាពបន្ស៊ាំដល់រាងកាយរបស់អ្នក។ នេះមានន័យថានៅពេលអ្នកឈឺក្បាលលើកក្រោយទៀត នោះបរិមាណថ្នាំដែលរាងកាយរបស់អ្នកបានទទួលដូចកាលពីមុននឹងមិនសូវមានប្រសិទ្ធភាពក្នុងការទប់ទល់ជាមួយការឈឺចុកចាប់របស់អ្នកទៀតហើយ។ ហេតុនេះ អ្នកគួរតែសាកល្បងជាមួយវិធីសាស្ត្រព្យាបាលបែបធម្មជាតិទាំង ៣ចំណុចខាងក្រោមជាមុនសិន៖
១) សម្រាក៖ ជាញឹកញាប់ណាស់ដែលអាការឈឺក្បាលរបស់អ្នកបានចង្អុលប្រាប់ថារាងកាយរបស់អ្នកត្រូវការសម្រាក។ អ្នកអាចគេងមិនលក់ស្កប់ស្កល់ពេញមួយយប់មក ឬក៏គេងមិនបានគ្រប់គ្រាន់ ដែលជាហេតុបណ្ដាលឲ្យអ្នកទទួលអារម្មណ៍ឈឺក្បាលបាន។ នៅពេលអ្នកសម្រាក អ្នកអាចប្រើប្រាស់កន្សែងដែលត្រូវបានជ្រលក់ក្នុងទឹកត្រជាក់ ហើយយកវាមកស្អំនៅពីលើថ្ងាសរបស់អ្នក។ ធ្វើបែបនេះក៏អាចជួយបន្ធូរអាការឈឺចុកចាប់របស់អ្នកបានដែរ។ ឬក៏អ្នកអាចជ្រើសរើសវិធីម៉ាស្សា ដើម្បីបន្ធូរស្រាលការឈឺក្បាលរបស់អ្នកក៏ជាវិធីមានប្រសិទ្ធភាពដែរ។
២) រក្សាជាតិសំណើមក្នុងរាងកាយ៖ នៅពេលអ្នកមានអាការឈឺក្បាលធេងធោងដូចនេះ អ្នកគួរចៀសវាងទម្លាប់ទទួលទានកាហ្វេ ឬភេសជ្ជៈទាំងឡាយណាដែលមានជាតិអាល់កុល និងភេសជ្ជៈប៉ូវកម្លាំងអស់ទាំងនោះចេញ។ មានការសិក្សាជាច្រើនដែលបានរកឃើញទំនាក់ទំនងរវាងកង្វះជាតិទឹកជាមួយនឹងអាការឈឺក្បាល និងការចុះខ្សោយក្នុងការផ្ចង់ស្មារតីផងដែរ។ ហេតុផលនេះហើយដែលអ្នកគួរងាកមកទទួលទានទឹកបរិសុទ្ធឲ្យបានច្រើន ឬក៏ផ្ដល់ជាតិសំណើមដល់រាងកាយរបស់អ្នកតាមរយៈពពួកអាហារដែលសម្បូរជាតិទឹកច្រើនដូចជា ត្រសក់ ឪឡឹក ផ្លែក្រូច ទំពាំងបាយជូរ និងផ្លែស្ត្រប៊ឺរីជាដើម។
៣) ងូតទឹកក្ដៅអ៊ុនៗ៖ វាជាការប្រសើរជាងបើសិនជាអ្នកជ្រើសរើសងូតទឹកក្ដៅអ៊ុនៗនៅពេលអ្នកមានអាការឈឺក្បាលក្រោយពេលក្រោកពីគេង។ ម្យ៉ាងទៀត អ្នកត្រូវចៀសវាងការមិនទទួលទានអាហារពេលព្រឹក។ ទោះជាយ៉ាងនេះក្ដី ប្រសិនបើវិធីខាងលើមិនអាចជួយអ្នកបាន សូមទៅពិគ្រោះជាមួយវេជ្ជបណ្ឌិត។ សូមកុំទុកឱ្យធ្ងន់ធ្ងរ៕
ដោយ៖ ស្រីពៅ
