សម្រាប់អ្នកមានបញ្ហាគេងមិនលក់ ទាំងនេះគឺជាអាហារ៥ប្រភេទដែលអ្នកគួរទទួលទានមុនពេលចូលគេង
ការគេងមិនបានលក់ស្កប់ស្កល់ជាញឹកញាប់ នឹងជះឥទ្ធិពលមិនល្អជាច្រើនសម្រាប់ការបំពេញកិច្ចការទាំងឡាយរបស់អ្នកនៅថ្ងៃបន្ទាប់។ វាប៉ះពាល់ទាំងចំពោះផ្លូវកាយនិងផ្លូវចិត្តរបស់អ្នកក្នុងពេលដំណាលគ្នា។ ដូច្នេះហើយ អត្ថបទនេះនឹងបង្ហាញអ្នកអំពីអាហារដែលអ្នកអាចទទួលទានមុនពេលចូលគេង ដែលពួកវាអាចបង្កើនគុណភាពដំណេករបស់អ្នកឲ្យល្អប្រសើរជាងពេលមុនបាន៖
១) ទឹកដោះគោ៖ មេឡាតូនីនគឺជាអ័រម៉ូនដែលប្រាប់រាងកាយរបស់អ្នកឲ្យសម្រាកចូលគេង។ ទឹកដោះគោគឺសម្បូរទៅដោយជាតិកាល់ស្យូម ហើយកាល់ស្យូមនេះនឹងជំរុញឲ្យខួរក្បាលរបស់អ្នកផលិតមេឡាតូនីន ដែលអាចជួយឲ្យអ្នកឆាប់ទទួលអារម្មណ៍ថាងងុយគេង និងអាចទទួលទានដំណេកបានលក់ស្កប់ស្កល់ជាងមុន។
២) បាយ៖ បាយដែលអ្នកទទួលទានសម្រាប់អាហារពេលល្ងាចប្រចាំថ្ងៃនេះ ក៏ដើរតួសំខាន់មួយនៅក្នុងការជំរុញអ្នកដែលមានបញ្ហាដំណេកឲ្យឆាប់គេងលក់បានដែរ។ នេះក៏ព្រោះតែនៅក្នុងបាយ មានជាតិកាបូអ៊ីដ្រាតក្នុងកម្រិតខ្ពស់ ហើយសារធាតុនេះនឹងត្រូវបានបម្លែងជាគ្លុយកូសនៅពេលត្រូវបានឆ្លងកាត់ប្រព័ន្ធរំលាយអាហាររបស់អ្នកបានឆាប់រហ័សជាងអាហារដែលមានកម្រិតជាតិកាបូអ៊ីដ្រាតទាបជាង។ ប៉ុន្តែ ដោយសារតែការរំលាយអាហារប្រព្រឹត្តទៅរហ័សជាងនៅពេលអ្នកទទួលទានបាយ នោះវាក៏មានន័យថាការកើនឡើងនៃកម្រិតជាតិស្ករនៅក្នុងឈាម ក៏ប្រព្រឹត្តទៅខ្លាំងជាងអាហារដែលត្រូវបានរំលាយយឺតជាងដែរ។ ដូចនេះអ្នកក៏មិនគួរបរិភោគវាច្រើនពេកនោះដែរ។
៣) ផ្លែចេក៖ ផ្លែចេកសម្បូរដោយម៉ាញេស្យូមនិងប៉ូតាស្យូម ដែលសារធាតុទាំងពីរនេះសុទ្ធតែអាចជួយបន្ធូរសាច់ដុំរបស់អ្នកដែលធ្វើការខ្លាំងពេកឲ្យធូរស្រាលជាងមុនបាន។ ហេតុផលនេះហើយដែលវាជាការល្អណាស់ដែលអ្នកគួរទទួលទានផ្លែចេកមុនពេលចូលគេង បើសិនជាអ្នកតែងមានបញ្ហាក្នុងការគេងលក់ស្កប់ស្កល់។
៤) គ្រាប់ធញ្ញជាតិ៖ ដូចផ្លែចេកដែរ គ្រាប់ធញ្ញជាតិគឺជាប្រភពដ៏ល្អបំផុតមួយសម្រាប់ការទទួលបាននូវជាតិម៉ាញេស្យូម ដែលជួយឲ្យសាច់ដុំរបស់អ្នកសម្រាកបាន។ មិនតែប៉ុណ្ណោះ គ្រាប់ធញ្ញជាតិតែងសម្បូរដោយប្រូតេអ៊ីនជាច្រើនដែលអាចជួយរក្សាកម្រិតជាតិស្ករក្នុងឈាមរបស់អ្នកឲ្យមានតុល្យភាព ហើយក៏ជួយគាំទ្រដល់ដំណេករបស់អ្នកផងដែរ។
៥) ទឹកឃ្មុំ៖ ទឹកឃ្មុំគឺជាស្ករធម្មជាតិមួយបែប ដែលមានគុណប្រយោជន៍ច្រើនបែបសម្រាប់អ្នក។ ក្នុងនោះវាក៏ជួយគាំទ្រដល់ដំណេករបស់អ្នកឲ្យលក់ស្កប់ស្កល់បានដែរ។ មុនពេលចូលគេង អ្នកអាចលាយទឹកឃ្មុំជាមួយតែក្ដៅអ៊ុនៗ ឬក៏ទឹកដោះគោ នោះអ្នកនឹងទទួលបាននូវប្រសិទ្ធភាពពីវាមិនខាន៕
ដោយ៖ ស្រីពៅ
