ហេតុអ្វីជីវជាតិបំប៉នក្នុងការ៉ុតមានសារសំខាន់សម្រាប់អ្នក?
ការ៉ុតគឺជាបន្លែមួយប្រភេទដែលងាយស្រួលនៅក្នុងការស្វែងរកដើម្បីយកមកទទួលទាន និងអ្វីដែលសំខាន់ជាងនេះនោះគឺ បន្លែនេះមានប្រយោជន៍ដ៏ច្រើនសន្ធឹកសន្ធាប់នៅក្នុងដំណើរការរាងកាយរបស់មនុស្សយើង។ អ្នកអាចយកវាទៅចម្អិន ឬទទួលទានឆៅ ឬក៏អាចយកទៅកិនធ្វើជាទឹកការ៉ុតទៅតាមចំណង់ចំណូលចិត្តរបស់អ្នក ហើយតាមរបៀបណាក៏វានៅតែអាចផ្ដល់ប្រយោជន៍របស់វាដល់អ្នកបានដែរ។
ខាងក្រោមនេះគឺជាហេតុផលទាំង៣ដែលអ្នកគួរទទួលទានការ៉ុតជាប្រចាំ៖
១) ថែទាំសុខភាពរបស់ខួរក្បាលនិងដំណើរការណ៍របស់វា
ទាំងការ៉ុតឆៅនិងទឹកការ៉ុត វាសុទ្ធតែមានសមត្ថភាពជួយការពារអ្នកពីជំងឺភ្លេចភ្លាំង និងជួយបង្កើនការចងចាំ ក៏ដូចជាការពារពីជំងឺដទៃទៀតដែលជាប់ពាក់ព័ន្ធនឹងការចុះអន់ថយនៃដំណើរការណ៍ខួរក្បាលរបស់អ្នកផងដែរ។
២) សុខភាពភ្នែក
ចំពោះដំណើរការនៃភ្នែករបស់អ្នក វីតាមីនAដើរតួនាទីសំខាន់ខ្លាំងណាស់។ នៅក្នុងការ៉ុតឆៅក៏ដោយ ឬក៏អ្នកចង់យកវាទៅកិនធ្វើទៅទឹកការ៉ុតក៏ដោយ វាសុទ្ធតែផ្ដល់វីតាមីនAឲ្យអ្នក ក្នុងទម្រង់ជាសារធាតុម្យ៉ាងដែលមានឈ្មោះថា Beta carotene គឺជាសារធាតុដែលបានផ្ដល់ពណ៌ទឹកក្រូចដល់ការ៉ុត ព្រមទាំងសារធាតុគីមី២ប្រភេទទៀតដែលមានឈ្មោះថា Lutein និង Zeaxanthin ដែលទាំងអស់នេះសុទ្ធតែធ្វើការដើម្បីកាត់បន្ថយហានិភ័យពីជំងឺទាំងឡាយដែលបណ្ដាលឲ្យមុខងាររបស់ភ្នែកអន់ថយជាងមុន ជាពិសេសនៅពេលមនុស្សមានអាយុកាន់តែច្រើន។ ការទទួលទានទឹកការ៉ុតឬការ៉ុតឆៅជាប្រចាំ នឹងអាចជួយអ្នកពីការកកើតឡើងនូវជំងឺងងឹតភ្នែក និងជំងឺភ្នែកឡើងបាយ។
៣) ជាប្រភពដ៏ល្អបំផុតនៃសារធាតុប្រឆាំងនឹងអុកស៊ីតកម្ម
សារធាតុប្រឆាំងនឹងអុកស៊ីតកម្មដែលមានវត្តមាននៅក្នុងការ៉ុតមានដូចជា Beta carotene វីតាមីនC Lutein និង Zeaxanthin ពួកវាទាំងអស់នេះមានប្រយោជន៍ខ្លាំងណាស់សម្រាប់ប្រព័ន្ធភាពស៊ាំរបស់អ្នក ដោយវាធ្វើការការពាររាងកាយរបស់អ្នកពីពពួករ៉ាឌីកាល់សេរី ពពួកវីរុសនិងមេរោគបាក់តេរីដែលមានគ្រោះថ្នាក់ និងការចម្លងមេរោគផ្សេងៗ។ លើសពីនេះការសិក្សាមួយចំនួនក៏បានរកឃើញថា សារធាតុប្រឆាំងនឹងអុកស៊ីតកម្មដែលមាននៅក្នុងការ៉ុត អាចទប់ទល់ប្រឆាំងជាមួយនឹងការកកើតឡើងនៃជំងឺមហារីកផងដែរ៕
ដោយ៖ ស្រីពៅ
