តើទឹកសណ្ដែកផលប្រយោជន៍អ្វីខ្លះចំពោះសុខភាពរបស់អ្នក?
ទឹកសណ្ដែកគឺជាភេសជ្ជៈធម្មជាតិមួយប្រភេទ ដែលសម្បូរទៅដោយប្រូតេអ៊ីនយ៉ាងខ្ពស់។ ប៉ុន្តែ តាមប្រភពរបស់organicfacts.net វានៅមានគុណសម្បត្តិជាច្រើនទៀតចំពោះសុខភាពទាំងមូលរបស់អ្នក ដូចមានរៀបរាប់នៅខាងក្រោម៖
១) ជួយដល់ដំណើរការរំលាយអាហាររបស់អ្នកឲ្យប្រសើរជាងមុន៖ ទឹកសណ្ដែកអាចផ្ដល់គុណសម្បត្តិបែបនេះបាន ក៏ដោយសារតែវាគឺជាប្រភពនៃប្រូតេអ៊ីន។ នៅពេលរាងកាយអ្នកទទួលបានប្រូតេអ៊ីនគ្រប់គ្រាន់ នោះវានឹងជួយជំរុញឲ្យដំណើរការរំលាយអាហាររបស់អ្នករឹតតែប្រសើរជាងមុន ហើយបន្ទាប់មកប្រព័ន្ធទាំងមូលរបស់រាងកាយក៏ប្រព្រឹត្តទៅប្រសើរជាងមុនដែរ។ ប្រូតេអ៊ីនពីទឹកសណ្ដែកនឹងជួយថែទាំសុខភាពរបស់កោសិកា និងការលូតលាស់ឡើងវិញរបស់វា។
២) ជួយបំបាត់អាការឈឺចុកចាប់ពីការរាំងរដូវរបស់ស្ត្រី៖ ការផ្លាស់ប្ដូរដ៏ធំមួយនេះនៅក្នុងជីវិតរបស់ស្ត្រី ដែលបានជះឥទ្ធិពលធ្វើឲ្យមិនមានលំនឹងអារម្មណ៍ ការឡើងកម្ដៅខ្លួនភ្លាមៗមួយរំពេច និងការឈឺចុកចាប់រាងកាយជាដើម។ នេះក៏ដោយសារតែអំឡុងពេលរាំងរដូវនេះ កម្រិតអ័រម៉ូនអឺស្ត្រូហ្សែនរបស់ស្ត្រីមានការធ្លាក់ចុះយ៉ាងខ្លាំង ហើយទឹកសណ្ដែកមានសមាសធាតុម្យ៉ាងហៅថា Isoflavones ដែលវាមានទំនាក់ទំនងដោយចងភ្ជាប់ជាមួយកោសិកាទាំងឡាយរបស់អឺស្ត្រូហ្សែនដែលមាននាទីចាំទទួលយកព័ត៌មានពីខាងក្រៅ ដែលអាចធ្វើឲ្យអាការឈឺចុកចាប់របស់ស្ត្រីអំឡុងពេលរាំងរដូវប្រែជាធូរស្បើយបាន។
៣) ជួយដល់សុខភាពរបស់ទារកក្នុងផ្ទៃ៖ ដោយសារតែទឹកសណ្ដែកសម្បូរទៅដោយវីតាមីនB និងអាស៊ីដហ្វូលិក ដែលពួកវាសុទ្ធតែចាំបាច់សម្រាប់ម្ដាយដែលពពោះទារកក្នុងផ្ទៃ នោះវានឹងជួយឲ្យទារកក្នុងផ្ទៃនេះមានសុខភាពល្អផងដែរ។
ដោយ៖ ស្រីពៅ
