លោក ង៉ែត ជូ ជាទីប្រឹក្សាសេដ្ឋកិច្ចនៃក្រុមហ៊ុន Emerging Market Consulting (EMC) ជាទូទៅតែងតែចែករំលែកចំណេះដឹង និង គនិតល្អៗជាច្រើននៅលើបណ្ដាញសង្គម។ ចំណេះដឹងទាំងនោះ ភាគច្រើនទាក់ទងទៅនឹង សេដ្ឋកិច្ច គំនិតអាជីវកម្ម និងការគ្រប់គ្រងហិរញ្ញវត្ថុជាដើម។ ថ្ងៃនេះ Bizkhmer សូមលើកយកនូវចំណុចមួយដែល លោកបានសរសេរនៅលើគណនីហ្វេកបុកផ្ទាល់ខ្លួនរបស់លោក អំពីគន្លឹះ៨ចំណុចដែលគួរអនុវត្ត ដើម្បីកសាងកេរ្តិ៍ឈ្មោះល្អក្នុងសង្គម។ គន្លឹះទាំង៨ ចំណុចនោះរួមមាន៖

១) មានចក្ខុវិស័យ៖ បុគ្គលឆ្នើមជាច្រើនតែងនិយាយពីអនាគត មើលឃើញថានឹងមានអ្វីកើតឡើងនាពេលអនាគត ហើយរៀបចំផែនការឬបេសកកម្មដើម្បីចាប់យកឱកាសដែលនឹងកើតមានឡើង។ ឧទាហរណ៍: សេដ្ឋីជនជាតិថៃលោក សុងសាក់ឌី បានមើលឃើញពីអនាគតនៃក្រុងបាងកកនិងបានវិនិយោគលើផ្ទៃដីប្រមាណ១៦០ហិកតានៅជិតក្រុងបាងកកនាឆ្នាំ១៩៨៤-១៩៨៥។ ចក្ខុវិស័យនេះបានធ្វើអោយលោកក្លាយជាសេដ្ឋីអចនលទ្រព្យក្នុងកំឡុងឆ្នាំ១៩៩៧។

២) បង្កើតសាមិទ្ធិផលឬស្នាដៃនានា៖ បុគ្គលល្បីត្រូវបង្កើតសាមិទ្ធិផលរបស់ខ្លួន ដូចជាកសាងទ្រព្យសម្បត្តិដោយសមត្ថភាព និងកិច្ចខិតខំប្រឹងប្រែងដោយមិនពឹងផ្អែកលើកេរ្តិ៍មរតកគ្រួសារ។ល។ ៣) មានទំនួលខុសត្រូវ៖ ជាទូទៅបគ្គលលេចធ្លោតែងតែជាអ្នកមានទំនួលខុសត្រូវខ្ពស់ចំពោះកិច្ចការរបស់ខ្លួន។ ស្ថាបនិករបស់ Alibaba លោក Jack Ma ដែលបានបង្កើត Alipay លើកឡើងថាពេលលោកបង្កើត Alipay នៅប្រទេសចិនដំបូងលោកស្មគ្រ័ចិត្តដើរចូលគុកប្រសិនបើរដ្ឋាភិបាលចិនចាត់វិធានការតឹងរឹង។ លោកបានលើកឡើងថាភាពជាអ្នកដឹកនាំ គឺជាការទទួលខុសត្រូវ។ ដូចគ្នានេះដែរ ស្ថាបនិករបស់Facebook លោក Mak Zuckerberg បាននិយាយចំពោះមុខសមាជិកព្រឹទ្ធសភាអាមេរិកថា លោកបង្កើត និងគ្រប់គ្រង Facebook ដូច្នេះរាល់កំហុសទាំងឡាយ ជាកំហុសរបស់លោក លោកទទួលខុសត្រូវ។

៤) អភិវឌ្ឍចំណេះដឹងជាប្រចាំ៖ រាល់បុគ្គលឆ្នើមតែងអាន និងស្រាវជ្រាវជាប្រចាំដើម្បីធ្វើបច្ចុប្បន្នភាពចំណេះដឹងអោយទាន់ការវិវត្តនៃទីផ្សារ និងបច្ចេកវិទ្យា។ គេមិននិយាយថារឿងហ្នឹងខ្ញុំចេះហើយ គេតែងតែស្តាប់នូវមតិយោបល់អ្នកដទៃ។

៥) ចេះចែករំលែកនូវចំណេះដឹង និងបទពិសោធន៍នានា៖ ចំណេះដឹង និងចំណេះធ្វើដែលបានមកពីការអាន សិក្សាស្រាវជ្រាវ និងអនុវត្តផ្ទាល់ ត្រូវចែករំលែកបន្តរព្រោះនឹងបានជាប្រយោជន៍ដល់អ្នកដទៃផងដែរ។ មនុស្សជាច្រើននឹងគោរពរាប់អានអ្នកមានសមត្ថភាព និងសណ្តានចិត្តល្អក្នុងការចែករំលែកចំណេះដឹងនានា។

៦) ធ្វើការងារជាក្រុម និងកសាងទំនាក់ទំនងល្អក្នុងសង្គម៖ អ្នកមិនអាចជោគជ័យនោះទេប្រសិនបើមិនចេះសហការ និងធ្វើការជាក្រុម។ នៅពេលអ្នកមានសមត្ថភាព និងចូលរួមសង្គមបានទូលំទូលាយ នោះអ្នកក៏បានចូលរួមកសាងសង្គមតាមរយៈការចូលរួមនោះដែរ។ មានមនុស្សជាច្រើនរង់ចាំមើលសកម្មភាពរបស់អ្នក។

៧) មានភាពស្មោះត្រង់៖ ទោះក្នុងកាលៈទេសៈណាក៏ដោយ ក្នុងតម្លៃណាក៏ដោយ អ្នកត្រូវរក្សាភាពស្មោះត្រង់អោយខានតែបាន។ ភាពស្មោះត្រង់ជាទ្រព្យចាយមិនចេះអស់ អ្នកដទៃនឹងមិនបោះបង់បុគ្គលស្មោះត្រង់ឡើយ។ បើទោះជាអ្នកយាមផ្ទះក៏គេត្រូវការបុគ្គលដែលមានភាពស្មោះត្រង់ដែរ។ ការកុហក កេងប្រវញ្ច័មិនអាចលាក់បាំងបានទេ យូរនិងឆាប់គង់តែអ្នកដទៃដឹងទេ។ សមដូចពាក្យចាស់លោកពោលថា រឿង៣មិនអាចលាក់បាំងបាន គឺ ផោមក្នុងទឹក យកក្រដាសខ្ចប់រងើកភ្លើង និង ដំរីងាប់យកចង្អេបាំង។

៨) មានសីលធម៌រស់នៅល្អ៖ ទោះអ្នកមានទ្រព្យមហាសាល មានចំណេះដឹងទូលំទូលាយយ៉ាងណា ក៏អ្នកមិនអាចកសាងកេរ្តិ៍ឈ្មោះល្អដោយខ្វះសីលធម៌បានដែរ។ ប៉ុន្តែមនុស្សមួយចំនួនក្នុងសង្គមបច្ចុប្បន្នយល់ខុសថា បើមានប្រាក់គឺមានកិត្តិយសហើយ។ ការយល់បែបនេះ មិនអាចអោយយើងកសាងសង្គមកម្ពុជាជាអារ្យ ប្រទេសបានឡើយ៕ ​