តើម្សៅសូដាអាចប្រើប្រាស់សម្រាប់ធ្វើអ្វីបានខ្លះ?
ម្សៅសូដាមានគុណប្រយោជន៍ជាច្រើនលើសលប់ មិនថាសម្រាប់ព្យាបាលបញ្ហាសុខភាព សម្រាប់លាងសម្អាតសម្ភារប្រើប្រាស់ផ្សេងៗ និងប្រើប្រាស់ក្នុងការចម្អិនអាហារនោះឡើយ។ ខាងក្រោមនេះគឺជាប្រយោជន៍៥យ៉ាងដែលអ្នករកបាននៅក្នុងម្សៅសូដា៖
១) ប្រើជាទឹកខ្ពុរមាត់៖ ម្សៅសូដាអាចប្រើជាទឹកសម្រាប់ខ្ពុរបំបាត់ក្លិនមាត់បាន ដោយគ្រាន់តែយកម្សៅសូដា១ស្លាបព្រាកាហ្វេដាក់ចូលទៅក្នុងទឹក១កែវ។ ឬក៏អាចអ្នកអាចប្រើម្សៅសូដាសម្រាប់ធ្វើជាថ្នាំដុសសម្អាតធ្មេញរបស់អ្នក ដើម្បីទទួលបានធ្មេញសភ្លឺថ្លា និងធ្វើឲ្យខ្យល់ដង្ហើមស្រស់ស្រាយផងដែរ។
២) សម្អាតសម្ភារប្រើប្រាស់ក្នុងផ្ទះ៖ ដោយលាយម្សៅសូដាបន្តិចជាមួយនឹងទឹកក្ដៅ អ្នកអាចយកវាទៅលាងសម្អាតស្នាមប្រឡាក់ផ្សេងៗនៅលើឥដ្ឋផ្ទះរបស់អ្នក លាងជម្រះចានឆ្នាំងដែលប្រឡាក់ខ្លាញ់ គ្រឿងសង្ហារិម រថយន្ត និងសម្ភារប្រើប្រាស់ជាច្រើនមុខទៀតដែលមាននៅក្នុងផ្ទះបាយ។
៣) បំបាត់ក្លិនមិនល្អដែលចេញពីបង្គន់៖ បើបង្គន់របស់អ្នកមានក្លិនមិនល្អ អ្នកអាចចាក់ម្សៅសូដាចូលក្នុងបង្គន់នោះ ហើយទុកវាចោលប្រហែល១ម៉ោងមុននឹងកាច់ទឹក។
៤) លាងសម្អាតបន្លែផ្លែឈើ៖ ប្រយោជន៍របស់ម្សៅសូដាមួយទៀតក៏អាចឲ្យអ្នកប្រើប្រាស់វាដើម្បីលាងសម្អាតបន្លែផ្លែឈើដែលត្រូវបានបាញ់ថ្នាំសម្លាប់សត្វល្អិតបានផងដែរ។
៥) ព្យាបាលបញ្ហាច្រាលជាតិអាស៊ីដក្នុងក្រពះ៖ បើអ្នកមានបញ្ហាច្រាលជាតិអាស៊ីដក្នុងក្រពះ ឬក៏ក្រហាយក្រពះ អ្នកអាចលាយម្សៅសូដាចូលទៅក្នុងទឹក១កែវ នោះវានឹងអាចជួយសម្រាលអាការនេះឲ្យធូរស្រាលបាន៕
ប្រភព៖ lifehack.com ប្រែសម្រួល៖ ស្រីពៅ
