តើមានផលវិបាកអ្វីនៅពេលអ្នកទទួលទានអាហារលឿនពេក?
មនុស្សមួយចំនួនមានទម្លាប់ទទួលទានអាហារលឿនៗ ដោយសារតែពួកគេយល់ថាវានឹងធ្វើឲ្យពួកគេចំណេញពេលវេលា។ យ៉ាងណាមិញ ផលវិបាកដែលទទួលបានពីការទទួលទានអាហារលឿនៗ នឹងអាចបង្កជាបញ្ហាផ្សេងៗចំពោះសុខភាពរបស់អ្នកបាន។
បើយោងតាមការចុះផ្សាយពីគេហទំព័រ lifehack.com បានឱ្យដឹងថា អ្នកត្រូវដឹងថា ក្រោយពេលដែលអ្នកបានទំពាហើយលេបអាហារចូល ក្រពះរបស់អ្នកត្រូវការរយៈពេល២០នាទីទម្រាំតែប្រព័ន្ធរំលាយអាហារចាប់ផ្ដើមដំណើរការ។
ដូច្នេះហើយបើសិនជាអ្នកទទួលទានអាហារលឿនៗ នោះវានឹងមិនអាចធ្វើការទាន់និងអាចផ្ដល់សញ្ញាបញ្ជូនប្រាប់ទៅខួរក្បាលរបស់អ្នកថាឆ្អែតហើយនោះឡើយ ដែលជាហេតុនាំឲ្យអ្នកអាចទទួលទានលើសបរិមាណដោយមិនដឹងខ្លួនបាន។
ហេតុផលនេះហើយដែលវាអាចបង្កើនហានិភ័យពីជំងឺទឹកនោមផ្អែម និងជំងឺធាត់លើសទម្ងន់បាន។ មិនតែប៉ុណ្ណោះ នៅពេលដែលក្រពះរបស់អ្នកធ្វើការខ្លាំងដើម្បីទប់ទល់ជាមួយនឹងល្បឿនដែលអ្នកបញ្ចូលអាហារមកយ៉ាងលឿននោះ វាអាចធ្វើឲ្យអ្នកមានបញ្ហាច្រាលអាស៊ីដក្នុងក្រពះមកនៅពេលក្រោយបាន។
ហេតុនេះ បើសិនជាអ្នកធ្លាប់មានទម្លាប់ទទួលទានអាហារលឿនៗ អ្នកគួរតែផ្លាស់ប្ដូរទម្លាប់មួយនេះចោលហើយចាប់ផ្ដើមទំពាយឺតៗ និងយ៉ាងហោចណាស់ចំណាយពេល២០នាទីសម្រាប់ការទទួលទានអាហារម្ដងៗ ដើម្បីផ្ដល់ភាពងាយស្រួលដល់ក្រពះរបស់អ្នកឲ្យធ្វើការ៕
ដោយ៖ ស្រីពៅ
