តើមានទម្លាប់អ្វីខ្លះដែលអាចឲ្យអ្នកបណ្ដុះនូវការចាយវាយដោយការសន្សំសំចៃបាន?
តើមានទម្លាប់អ្វីខ្លះដែលអាចឲ្យអ្នកបណ្ដុះនូវការចាយវាយដោយការសន្សំសំចៃបាន ? ខាងក្រោមនេះគឺជាទម្លាប់៣យ៉ាងដែលអាចផ្ដល់ជាគំនិតសម្រាប់ឲ្យអ្នកសិក្សានិងអនុវត្តតាមបាន៖
១) តាមដានរាល់ការចំណាយបន្តិចបន្តួច៖ មនុស្សភាគច្រើនច្រើនតែមិនសូវចាប់អារម្មណ៍ទៅលើការចំណាយបន្តិចបន្តួចនោះឡើយ ប៉ុន្តែជាញឹកញាប់ណាស់ដែលការចំណាយបន្តិចបន្តួចនេះឯងដែលប្រមូលផ្ដុំគ្នាធ្វើឲ្យប្រាក់របស់អ្នកកាន់តែឆាប់អស់ទៅៗទាំងមិនដឹងខ្លួន។ ដូចនេះអ្នកមិនត្រូវធ្វេសប្រហែសទៅលើការចំណាយបន្តិចបន្តួចរបស់ខ្លួនឯងឡើយ។
២) មានសតិដឹងពីអ្វីដែលទើបជាការចំណាយដ៏ចាំបាច់ពិតប្រាកដ៖ តើអ្វីទៅទើបជាការចំណាយដ៏ចាំបាច់ពិតប្រាកដ ? មនុស្សជាច្រើនយល់ថាពួកគេខិតខំធ្វើការខ្លាំងណាស់ ហេតុនេះហើយវាជារឿងស័ក្ដិសមបំផុតដែលពួកគេគួរតែលើកទឹកចិត្តខ្លួនឯងជាមួយនឹងគ្រឿងសម្ភារទំនើបៗឡូយឆាយអស់ទាំងនោះ។ ប៉ុន្តែបើគិតឲ្យដិតដល់ទៅ ពួកគេត្រូវការវាដើម្បីមកលម្អជីវិតរបស់ខ្លួនតែប៉ុណ្ណោះឯង ព្រោះមានពេលខ្លះរបស់អស់ទាំងនោះពិតជាមិនចាំបាច់ទាល់តែសោះឡើយសម្រាប់ការរស់នៅរបស់ពួកគេ ឬក៏អាចនិយាយបានថាបើទោះជាពួកគេអត់មានរបស់ទាំងនោះក៏ពួកគេនៅតែអាចរស់នៅបានដោយមិនលំបាកនោះដែរ។ ហេតុនេះហើយអ្នកមិនគួរឲ្យការចំណាយទៅលើអ្វីដែលមិនចាំបាច់ទាំងនោះ មកគាបសង្កត់ឲ្យជីវិតរបស់ខ្លួនឯងកាន់តែលំបាកដោយសារតែវានោះឡើយ។
៣) ការសន្សំត្រូវតែមានការចាប់ផ្ដើមពីបន្តិចៗទៅមុន៖ មិនចាំបាច់ទាល់តែមានប្រាក់ច្រើនចាំចាប់ផ្ដើមសន្សំនោះទេ ពេលវេលាដែលអ្នកត្រូវចាប់ផ្ដើមសន្សំគឺជាឥឡូវនេះឯង បើទោះជាតិចតួចក៏ដោយ។ បើអ្នកមិនទាន់បានចាប់ផ្ដើមសន្សំទេ នោះអ្នកនឹងរកលេសឲ្យខ្លួនឯងមិនខាន។ តែបើសិនជាអ្នកបានដាក់ចិត្តថាសន្សំហើយ នោះវានឹងធ្វើឲ្យអ្នកមិនសូវហ៊ានដាច់ចិត្តចាយវាផ្ដេសផ្ដាសដូចកាលពីមុនទៀតឡើយ៕
ដោយ៖ ស្រីពៅ
