តើអ្នកមានដឹងទេថា សម្បកចេកមានប្រយោជន៍អ្វីខ្លះសម្រាប់ជីវិតប្រចាំថ្ងៃរបស់អ្នក?
អ្នកប្រាកដជាធ្លាប់តែបោះចោលសម្បកចេកក្រោយពេលទទួលទានសាច់របស់វារួចហើយ។ ប៉ុន្តែតើអ្នកដឹងទេថា សូម្បីតែសម្បករបស់វាដែលអ្នកតែងតែបោះចោលនេះ ក៏នៅមានអត្ថប្រយោជន៍ជាច្រើនសម្រាប់ដោះស្រាយបញ្ហាសាមញ្ញៗក្នុងជីវិតប្រចាំថ្ងៃរបស់អ្នកដែរ។ ខាងក្រោមនេះគឺជាអត្ថប្រយោជន៍ចំនួន៤សំខាន់ៗក្នុងចំណោមប្រយោជន៍ដ៏ច្រើនទៀតដែលសម្បកចេកមាន៖
១) បំបាត់កន្ទួលរមាស់៖ ជំនួសឲ្យឡេលាបផ្សេងៗ អ្នកគ្រាន់តែយកផ្នែកខាងក្នុងនៃសម្បកចេកដែលសល់ចោលមកត្រដុសនៅត្រង់តំបន់ដែលអ្នកមានកន្ទួលរមាស់បានឲ្យជាសះស្បើយបាន។
២) បំបាត់ស្នាមជាំ៖ សម្បកចេកក៏អាចប្រើប្រាស់សម្រាប់ព្យាបាលស្នាមជាំផ្សេងៗយ៉ាងមានប្រសិទ្ធភាពដែរ។ អ្នកអាចបែរផ្នែកខាងក្នុងរបស់សម្បកចេកហើយដាក់ពីលើតំបន់ស្នាមជាំដែលអ្នកមាន ទុកវាចោលបែបនេះ១យប់ នៅពេលព្រលឹមឡើងមកអ្នកនឹងឃើញប្រសិទ្ធភាពវាមិនខាន។
៣) ធ្វើជាជីសម្រាប់ដាំដុះកូនរុក្ខជាតិ៖ សម្បកចេកក៏អាចយកទៅប្រើជាប្រយោជន៍សម្រាប់ធ្វើជាជីដាំដុះកូនរុក្ខជាតិរបស់អ្នកតាមលក្ខណធម្មជាតិបានដែរ។ វិធីសាស្ត្រគឺគ្រាន់តែយកសម្បកចេកទៅដុតឲ្យខ្លោច បន្ទាប់មកយកវាទៅដាក់ក្នុងដីរបស់កូនរុក្ខជាតិគឺជាការស្រេច។
៤) ជួយធ្វើឲ្យធ្មេញស៖ ផ្នែកខាងក្នុងរបស់សម្បកចេកមានជាតិអាស៊ីដស៊ីទ្រិក ដែលជាភ្នាក់ងារសម្អាតឲ្យស និងអាស៊ីដsalicylic ដែលមានប្រយោជន៍ក្នុងការកម្ចាត់កាកសំណល់ផ្សេងៗក្នុងចន្លោះធ្មេញរបស់អ្នក។
ក្រោយពីដុសសម្អាតធ្មេញ អ្នកអាចយកសម្បកចេកមកត្រដុសធ្មេញរយៈពេល២នាទី ហើយវានឹងជួយធ្វើឲ្យធ្មេញរបស់អ្នកសដោយធម្មជាតិបាន៕
ប្រភព៖ quickanddirtytips.com ប្រែសម្រួល៖ ស្រីពៅ
