ចង់រក្សាតុល្យភាពរវាងការងារនិងជីវិតផ្ទាល់ខ្លួន គន្លឹះ ៣យ៉ាងនេះអាចជួយអ្នកបាន
ពិតណាស់ថា ជីវិតយើងម្នាក់ៗមានតែ ២៤ម៉ោងក្នុងមួយថ្ងៃស្មើៗក្នា ប៉ុន្តែយើងមានទំនួលខុសត្រូវផ្សេងៗគ្នា ដូចជាទំនួលខុសត្រូវការងារ ទំនួលខុសត្រូវក្នុងគ្រួសារឬទំនួលខុសត្រូវរវាងមិត្តភ័ក្ដិថែមទៀតផង។
មនុស្សម្នាក់ៗ ពិតជាចង់រក្សាតុល្យភាព និងចង់ឲ្យទំនាក់ទំនងគ្រប់ផ្នែកសុទ្ធតែល្អ តែការពិត វាពិតជាលំបាកក្នុងការធ្វើវា។ ខាងក្រោមនេះ ជាតាកតិចដែលអាចជួយអ្នកឲ្យរក្សាតុល្យភាពរវាងជីវិតអាជីពនិងជីវិតផ្ទាល់ខ្លួនឲ្យបានល្អជាងមុនបើយោងតាមការចុះផ្សាយរបស់ wikihow៖
១) រៀបចំពេលវេលាឲ្យបានត្រឹមត្រូវ៖ អ្នកត្រូវបែងចែកពេលវេលាសម្រាប់ការងារ និងពេលវេលាសម្រាប់ផ្ទាល់ខ្លួនឲ្យបានច្បាស់លាស់។ ជាធម្មតា អ្នកគួរយកការងារជាអាទិភាពទី ១ទៅ។ ក្រោយការងាររបស់អ្នកបានសម្រេចហើយ អ្នកអាចចំណាយពេលវេលាដែលសល់ទាំងប៉ុន្មានសម្រាប់ខ្លួនឯងឬមនុស្សសំខាន់។
២) រៀបចំកាលវិភាគ៖ ប្រសិនគ្មានកាលវិភាគត្រឹមត្រូវនោះទេ អ្នកនឹងមិនដឹងការងារមួយណាដែលសំខាន់និងការងារមួយណាដែលអ្នកគួរធ្វើមុនឡើយ។ អ្នកគួរតែរៀបចំកាលវិភាគឲ្យច្បាស់លាស់ និងអនុវត្តតាមកាលវិភាគដែលអ្នកបានរៀបចំ។ ក្នុងសប្ដាហ៍ខ្លះ ការងារអាចសំខាន់ជាងគេ ក្នុងសប្ដាហ៍ខ្លះ គ្រួសារអាចសំខាន់ជាងគេវិញ។ ជាខ្លី អ្នកត្រូវមានកាលវិភាគរវាងជីវិតផ្ទាល់ខ្លួននិងការងារឲ្យច្បាស់លាស់។
៣) កាត់បន្ថយរឿងអត់ប្រយោជន៍៖ មនុស្សជាច្រើននាក់ណាស់ចូលចិត្តចំណាលពេលវេលាទៅឆែកFacebook Instagram ឬមើលYoutube។ល។ ទាំងនេះគឺជាពេលវេលាដែលអ្នកអាចប្រើប្រាស់ទៅលើការងារឬគ្រួសារបាន។ តាមការស្រាវជ្រាវមួយក៏បានរកឃើញថា មនុស្សចំណាលពេលយ៉ាងតិច២ម៉ោងទៅលើរឿងដែលអត់សូវមានប្រយោជន៍ដល់ជីវិត។ ដូច្នេះហើយ អ្នកត្រូវរៀនប្រើប្រាស់ពេលវេលាឲ្យបានល្អជាទីបំផុត៕
ដោយ៖ អឹុង មុយយូ
