តើគួរទទួលទានអ្វីដើម្បីទប់ទល់នឹងបញ្ហារាគមួលបាន ?
អ្នកប្រាកដជាមានអារម្មណ៍មិនស្រួលនោះឡើយនៅពេលអ្នកកំពុងមានបញ្ហារាគមួល។ ចុះបើសិនជាអ្នកចូលបង្គន់ច្រើនដងមិនចេះបាត់សោះ តើមានអាហារអ្វីខ្លះដែលអាចជួយអ្នកក្នុងដំណាក់កាលនេះបាន ?
១) ផ្លែចេក៖ បើអ្នកមានបញ្ហារាគញឹកញាប់ នោះផ្លែចេកគឺស្ថិតក្នុងជម្រើសដ៏ល្អបំផុតមួយសម្រាប់អ្នកហើយ។ បើអ្នកមានបញ្ហាទល់លាមក អ្នកគួរទទួលទានអាហារដែលមានកម្រិតជាតិសរសៃខ្ពស់ ប៉ុន្តែដោយសារតែផ្លែចេកមានកម្រិតជាតិសរសៃទាប នោះវាគឺជាផ្លែឈើដែលអ្នកគួរទទួលទានដើម្បីទប់ទល់នឹងបញ្ហារាគរបស់អ្នកហើយ។ ម្យ៉ាងទៀត ផ្លែចេកក៏ជួយបន្ថែមនូវជាតិប៉ូតាស្យូមមកវិញ ដែលត្រូវបានបាត់បង់ទៅនៅពេលអ្នករាគផងដែរ។
២) មាន់ចំហុយឬស្ងោរ៖ មាន់ចំហុយឬក៏យកទៅស្ងោរក៏បាន ក៏អាចជួយទប់លំនឹងប្រព័ន្ធរំលាយអាហាររបស់អ្នកបានដែរ។ ម្យ៉ាងទៀតវាក៏មានប្រូតេអ៊ីនដែលរាងកាយអ្នកត្រូវបានបាត់បង់ទៅនៅពេលអ្នករាគញឹកញាប់។ ប៉ុន្តែអ្នកមិនត្រូវប្រើប្រាស់គ្រឿងបន្ថែមរសជាតិ លើកលែងអំបិលអាចដាក់បន្តិចបន្តួចបាន និងចៀសវាងការដាក់បន្ថែមប្រេងពីលើវាផងដែរ។
៣) បាយស៖ បាយសដែលអ្នកទទួលទានជាអាហារប្រចាំថ្ងៃនេះក៏អាចជួយអ្នកក្នុងការទប់ទល់ជាមួយបញ្ហារាគបានដែរ ព្រោះថាបាយសមានកម្រិតជាតិសរសៃទាប ហើយវាក៏ជួយធ្វើឲ្យប្រព័ន្ធពោះវៀនរបស់អ្នកដំណើរការណ៍បានល្អជាងមុន។
៤) ទឹកស៊ុបមាន់៖ ក្រៅពីសាច់មាន់ចំហុយឬស្ងោរ ទឹកស៊ុបមាន់ក៏អាចជួយសម្រួលដល់បញ្ហារាគបានដែរ។ នៅពេលអ្នករាគញឹកញាប់ ពោះវៀននិងក្រពះរបស់អ្នកអាចនឹងឡើងហើមបន្តិចបាន ដូច្នេះហើយទឹកស៊ុបមាន់ក្ដៅអ៊ុនៗនឹងអាចជួយបន្ធូរការហើមនេះឲ្យល្អប្រសើរវិញបាន ហើយវាក៏មានជីវជាតិបំប៉នសម្រាប់ប៉ូវអ្នកនូវជីវជាតិដែលបានបាត់បង់តាមរយៈការរាគ៕
ប្រភព៖ lifehack ប្រែសម្រួល៖ ស្រីពៅ
