វិធីសាស្ត្រ ៣យ៉ាងដើម្បីពង្រឹងប្រព័ន្ធភាពស៊ាំរបស់អ្នកឲ្យមានថាមពលខ្លាំងក្លា
ប្រព័ន្ធភាពស៊ាំរបស់អ្នកដើរតួសំខាន់ណាស់សម្រាប់ការពារអ្នកពីមេរោគផ្សេងៗដែលអាចបង្កជំងឺកាចសាហាវផ្សេងៗដល់អ្នកបាន។ ហេតុនេះការថែទាំប្រព័ន្ធភាពស៊ាំរបស់អ្នកឲ្យមានថាមពលខ្លាំងក្លាគឺជារឿងសំខាន់ដែលអ្នកត្រូវធ្វើ ហើយ៣ចំណុចខាងក្រោមនេះដែរគឺជាអ្វីដែលអ្នកគួរដឹង។ នេះបើយោងតាមការចុះផ្សាយរបស់គេហទំព័រ powerofpositivity៖
១) គេងឲ្យបានគ្រប់គ្រាន់៖ នៅពេលអ្នកគេង កោសិការបស់អ្នកនឹងត្រូវបានជួសជុលហើយកោសិកាថ្មីៗក៏ត្រូវបានផលិតជាបន្តបន្ទាប់ទៀត ហេតុនេះហើយទើបវាជារឿងសំខាន់បំផុតមួយដែលអ្នកត្រូវប្រាកដថាអ្នកបានឲ្យរាងកាយនិងខួរក្បាលរបស់អ្នកសម្រាកគ្រប់គ្រាន់ជារៀងរាល់យប់។ នៅពេលអ្នកគេងគ្រប់គ្រាន់ នោះប្រព័ន្ធភាពស៊ាំរបស់អ្នកក៏មានថាមពលខ្លាំងក្លាសម្រាប់ការពារអ្នកទប់ទល់នឹងមេរោគរាតត្បាតផ្សេងៗពីខាងក្រៅមកដែរ។
២) វីតាមីនC៖ វីតាមីនC បើនិយាយចំពោះដំណើរការណ៍រាងកាយរបស់មនុស្សពិតជាដើរតួសំខាន់ណាស់។ វីតាមីនCជួយព្យាបាលអ្នកនៅពេលអ្នកគ្រុនផ្ដាសាយ ហើយវាថែមទាំងអាចជួសជុលក៏ដូចជាផលិតជាលិកា ជួយការពារប្រព័ន្ធភាពស៊ាំរបស់អ្នក និងដើរតួជាសារធាតុធម្មជាតិដែលការពារប្រឆាំងនឹងអុកស៊ីតកម្មផងដែរ។ មានវិធីជាច្រើនដែលអ្នកអាចបញ្ចូលវីតាមីនCក្នុងរាងកាយរបស់អ្នក ដូចជាតាមរយៈការទទួលទានផ្លែក្រូចឬទឹកក្រូចច្របាច់ស្រស់ៗ ផ្លែប៉េងប៉ោះ ផ្លែត្រសក់ស្រូវ ម្ទេសប្លោកពណ៌ក្រហមឬបៃតង និងផ្កាខាត់ណាប្រូកូលីជាដើម។
៣) អាហារដែលសម្បូរជាតិស័ង្កសី៖ មនុស្សភាគច្រើនខ្វះនូវសារធាតុដ៏សំខាន់មួយនេះ។ ជាតិស័ង្កសីជួយទប់ទល់រាងកាយអ្នកពីមេរោគបាក់តេរីផ្សេងៗ និងជួយរក្សាលំនឹងដល់ប្រព័ន្ធភាពស៊ាំរបស់អ្នក ហើយវាក៏មានសមត្ថភាពក្នុងការជួសជុលកោសិកាផងដែរ។ សណ្ដែកខៀវ ពោត ផ្លែប៊ឺរី និងទំពាំងបាយជូរក្រៀមជាដើម សុទ្ធតែជាប្រភពនៃជាតិស័ង្កសីដ៏ល្អសម្រាប់អ្នក៕
ដោយ៖ ស្រីពៅ
