មូលហេតុ ៤យ៉ាងដែលជាដើមហេតុនៃអាការវិលមុខឈឺក្បាល
អាការឈឺក្បាលវិលមុខ គឺជារឿងធម្មតាដែលនរណាក៏សុទ្ធតែធ្លាប់មានដូចៗគ្នាដែរ។ ប៉ុន្តែមានពេលខ្លះយើងមិនដឹងថាតើមូលហេតុអ្វីទៅទើបនាំឲ្យមានអាការបែបនោះនោះឡើយ ហេតុនេះយើងក៏មិនដឹងថាត្រូវព្យាបាលអាការនោះដោយរបៀបណាដែរ។ ខាងក្រោមនេះគឺជាមូលហេតុ៤យ៉ាងដែលជាដើមហេតុនៃអាការវិលមុខឈឺក្បាល ដែលអ្នកអាចសង្កេតលើខ្លួនឯងបាន៖
១) ខ្វះជាតិទឹកក្នុងខ្លួន
នៅពេលរាងកាយអ្នកខ្វះជាតិទឹក វានឹងបណ្ដាលឲ្យសម្ពាធឈាមរបស់អ្នកធ្លាក់ចុះ ដែលជាមូលហេតុមួយធ្វើឲ្យអ្នកឈឺក្បាលធេងធោង។ កង្វះជាតិទឹកអាចកើតមានក្រោយពីអ្នកស្ថិតនៅក្រោមកម្ដៅថ្ងៃក្ដៅខ្លាំងច្រើនម៉ោងពេក ឬក្រោយពីបញ្ចេញជាតិញើសច្រើនតាមរយៈការហាត់ប្រាណឬធ្វើសកម្មភាពផ្សេងៗ ឬក៏អាចកើតមកពីការទទួលទានកាហ្វេនិងសារធាតុអាល់កុលជាដើម។
២) កម្រិតជាតិស្ករក្នុងឈាមទាប
ការមិនទទួលទានអាហារ ឬក៏ជាឥទ្ធិពលដែលទទួលរងមកពីថ្នាំពេទ្យផ្សេងៗដែលអ្នកបានប្រើប្រាស់និងមានឥទ្ធិពលធ្វើឲ្យកម្រិតជាតិស្ករក្នុងឈាមរបស់អ្នកធ្លាក់ចុះ ក៏ជាមូលហេតុមួយដែលនាំឲ្យអ្នកវិលមុខឈឺក្បាលបានដែរ។
៣) ស្ត្រេស តប់ប្រមល់ច្រើន
ផ្លូវចិត្តរបស់អ្នកមានទំនាក់ទំនងមិនដាច់ពីគ្នាជាមួយនឹងដំណើរការណ៍សរីរាង្គទាំងឡាយក្នុងរាងកាយរបស់អ្នក។ ហេតុដូច្នេះហើយ នៅពេលអ្នកទទួលអារម្មណ៍ថាស្មុគស្មាញខ្លាំង អ្នកគួរតែរកវិធីសាស្ត្របែបណាដើម្បីអាចឲ្យខ្លួនឯងបន្ធូរអារម្មណ៍បានធូរស្បើយនិងសប្បាយចិត្តជាងមុនទើបជាការប្រសើរ។
៤) កង្វះកោសិកាឈាមក្រហម
អ្នកដែលមានជំងឺខ្វះកោសិកាឈាមក្រហម ឬស្ត្រីទាំងឡាយដែលមករដូវធ្លាក់ឈាមអស់ច្រើន សុទ្ធតែអាចប្រឈមមុខនឹងអាការឈឺក្បាលវិលមុខ៕
