មុន​ពេល​ដំណើរ​ការ​ពាណិជ្ជកម្ម​​​ឬ​ក្រុមហ៊ុន​នីមួយ​​ៗ​ ​ថៅកែ​​ ឬ​ម្ចាស់​ក្រុមហ៊ុន​ តែង​តែ​​រិះរក​ និង​កំណត់​​ពណ៌​ដែល​​ពួក​គាត់​ ចង់​ប្រើប្រាស់​ក្នុង​ម៉ាក​យីហោ​​ជា​និច្ច​ព្រោះ​ពណ៌​​អាច​ជា​វិធី​មួយ​ដែល​ជួយ​ផ្សព្វផ្សាយ​ខ្លឹមសារ​និង​ម៉ាក​យីហោ​​ឱ្យ​អតិថិជន​ និង​សាធារណជន​ឆាប់ស្គាល់​។ ​​

ការ​ជ្រើស​រើស​ពណ៌​ឲ្យ​បាន​ត្រឹមត្រូវ និង​មាន​អត្ថន័យ​ឆ្លុះបញ្ចាំង​ពី​ក្រុមហ៊ុន​ គឺ​មិន​មែន​ជា​រឿង​ងាយ​ស្រួល​នោះ​ឡើយ។ ការ​ជ្រើសរើស​ពណ៌​​បាន​ត្រឹម​ត្រូវ​ពិត​ជា​​សំខាន់។ ខាង​ក្រោម​នេះ​ជា​អត្ថន័យ​​នៃ​ពណ៌​​ទាំង​៤​ដែល​គេ​​និយម​ប្រើប្រាស់​បំផុត​នៅ​តាម​ក្រុមហ៊ុន​ធំៗបើ​តាម​ការ​ចុះ​ផ្សាយ​ដោយ visual.ly​៖

១) ពណ៌លឿង​៖ ពណ៌លឿង​​ គឺ​ជា​ពណ៌​ដែល​លេច​ធ្លោ​ មនុស្ស​​ងាយ​ស្រួល​មើល​ឃើញ។ ហើយ​ពណ៌​នេះ​ច្រើន​តែ​ប្រើ​ប្រាស់​ដើម្បី​ទាក់​ទាញ​​ចំណាប់​អារម្មណ៍​​ ​បង្កើន​ភាព​សប្បាយ​រីករាយ​​ឬ​ឲ្យ​បាន​អារម្មណ៍​កក់​ក្ដៅ​ជា​ដើម។ អ្នក​រក​ឃើញ​ពណ៌លឿង​ក្នុង​ម៉ាក​យីហោ​ដូច​ជា​ McDonald Nikon ជា​ដើម។

២) ពណ៌​ក្រហម៖ ​​ពណ៌​ក្រហម​​គឺ​ជា​ពណ៌​ដែល​បង្ហាញ​អំពី​​ចំណង់ ឬ​ ក្ដី​ស្រឡាញ់​និង​​ជួយ​បង្កើន​អារម្មណ៍​មនុស្ស​ឲ្យ​មាន​ថាមពល។ ម៉ាក​ដែល​មាន​ពណ៌​ក្រហម​មាន​ដូច​ជា​ Red Bull Energy Drink, Canon, CocaCola, Toyota។ល។

៣) ពណ៌​​ខ្មៅ៖ ​ពណ៌​ខ្មៅ​គឺ​ជា​​​ពណ៌​មួយ​ដែល​មិន​សូវ​រើស​ផលិតផល​ព្រោះ​វា​សាមញ្ញ​ប៉ុន្តែ​វា​​បង្ហាញ​ពី​ភាព​ប្រណិត ឬ​កាលីប​។ ​​ ហើយ​ពណ៌​ខ្មៅ​ច្រើន​តែ​បង្ហាញ​​ពី​អំណាច​ ភាព​អាថ៌កំបាំង​និង​ភាព​តែ​ឯង។ ​ម៉ាក​យីហោ​ដែល​មាន​ពណ៌​ខ្មៅ​​មាន​ដូច​ជា៖ Apple, Louis Vuition, Mercedes...។

៤) ពណ៌​​ខៀវ៖ ​ពណ៌​ខៀវ​គឺ​ជា​ពណ៌​បង្ហាញ​​ភាព​ស្ងប់​ស្ងាត់​ ភាព​ជោគជ័យ​​ឬ​សន្តិភាព។ អ្នក​រក​ឃើញ​មើល​​ម៉ាក​យីហោ​ដែល​ប្រើប្រាស់​ពណ៌​ខៀវ​ដូច​ជា​ម៉ាក​យីហោ​​ពេទ្យ​និង​​ខាង​រដ្ឋាភិបាល​ជា​ដើម ដូច​ជា​ United Nations ដែល​មាន​ពណ៌​ស​​លាយ​​ពណ៌​ខៀវ ​UNICEF​ ឬ​ UN environment ។ល៕

ដោយ៖ អឹុង មុយយូ