តើទឹកក្រូចឆ្មារមួយកែវមានអត្ថប្រយោជន៍អ្វីខ្លះចំពោះសុខភាពរបស់អ្នក ?
ទឹកក្រូចឆ្មារគឺជាភេសជ្ជៈដ៏សាមញ្ញបំផុតមួយ តែពោរពេញដោយអត្ថប្រយោជន៍ជាច្រើនដែលអ្នកមិនគួរមើលរំលងនោះឡើយ។ ខាងក្រោមនេះគឺជាគុណសម្បត្តិចំនួន៤របស់ទឹកក្រូចឆ្មារដែលអាចនឹងមានប្រយោជន៍ជាច្រើនសម្រាប់សុខភាពរបស់អ្នក៖
១) សម្រួលដល់ការបន្ទោបង់៖ ទឹកក្រូចឆ្មារក្ដៅអ៊ុនៗមួយកែវនៅពេលព្រឹកព្រលឹម មានអត្ថប្រយោជន៍ជួយជំរុញដល់ចលនាពោះវៀនរបស់អ្នក និងជួយសម្រួលដល់ការបន្ទោបង់របស់អ្នកបាន។ លើសពីនេះ ការទទួលទានទឹកឲ្យបានច្រើន រួមផ្សំនឹងអាហារទាំងឡាយណាដែលសម្បូរដោយជាតិសរសៃខ្ពស់ក៏នឹងជួយអ្នកក្នុងការបន្ទោបង់ផងដែរ។
២) ផ្ដល់នូវវីតាមីនដ៏មានប្រយោជន៍មួយចំនួន៖ ទឹកក្រូចឆ្មារមួយកែវអាចផ្ដល់បាន២០%នៃវីតាមីនCដែលអ្នកចាំបាច់ត្រូវការជាប្រចាំថ្ងៃ និងជាតិប៉ូតាស្យូមនិងវីតាមីនBក្នុងបរិមាណតិចតួចផងដែរ។
៣) ជួយធ្វើឲ្យអារម្មណ៍របស់អ្នកស្រស់ស្រាយជាងមុន៖ អ្នកអាចចាប់ផ្ដើមសាកល្បងថ្ងៃថ្មីរបស់អ្នកដោយទទួលទានទឹកក្រូចឆ្មារអ៊ុនៗមួយកែវនៅព្រឹកព្រលឹម បន្ទាប់មកអ្នកនឹងអាចទទួលបទពិសោធន៍ថ្មីមួយជាមួយនឹងអារម្មណ៍ស្រស់ស្រាយ និងជ្រះស្រឡះជាងមុន នោះអ្នកនឹងអាចបំពេញការងាររបស់អ្នកពោរពេញដោយប្រសិទ្ធភាពមិនខាន។
៤) ជួយគ្រប់គ្រងចំណង់អាហាររបស់អ្នកបាន៖ នៅពេលអ្នកទទួលទានទឹកក្ដៅឬទឹកត្រជាក់មុនពេលទទួលទានអាហារផ្សេងៗ នោះទឹកនឹងធ្វើឲ្យអ្នកកាត់បន្ថយចំណង់ក្នុងការឃ្លានអាហារ ដែលអាចនឹងកាត់បន្ថយបរិមាណអាហារដែលអ្នកទទួលទានផងដែរ។ នេះគឺជាវិធីសាស្ត្រដ៏ល្អមួយសម្រាប់អ្នកដែលលើសទម្ងន់ ឬមនុស្សទាំងឡាយណាដែលមិនអាចគ្រប់គ្រងខ្លួនឯងបានក្នុងការឃ្លាននិងទទួលទានអាហារដែលមិនល្អចំពោះសុខភាពរបស់ខ្លួន៕
ប្រភព៖ quickanddirtytips.com ប្រែសម្រួល៖ ស្រីពៅ
